ਕੁਦਰਤ ਦੀ ਕੀ ਗੱਲ ਸੁਣਾਵਾਂ, ਕੁਦਰਤ ਬੜੀ ਨਿਆਰੀ।

ਜੰਗਲ, ਪਰਬਤ, ਨਦੀਆਂ, ਸਾਗਰ, ਕੁਦਰਤ ਲੱਗੇ ਪਿਆਰੀ।

ਖਾਣੀਆਂ, ਬਾਣੀਆਂ ਕੁਦਰਤ ਵਿੱਚ ਨੇ, ਕੁਦਰਤ ਹੈ ਚਹੁੰ-ਪਾਸੇ

ਧਰਤ-ਆਕਾਸ਼ ਇਸੇ ਨੂੰ ਕਹਿੰਦੇ, ਕੁਦਰਤ ਦੀ ਸਰਦਾਰੀ।

ਬਾਬੇ ਨਾਨਕ ‘ਵਾਰ ਆਸਾ’ ਵਿੱਚ, ਕੁਦਰਤ ਦਾ ਜੱਸ ਗਾਇਆ

ਕੁਦਰਤ ਵਿੱਚ ਸਾਰੇ ਜੀਅ ਜੰਤੂ, ਏਸੇ ਵਿੱਚ ਨਰ-ਨਾਰੀ।

ਗਰਮੀ, ਸਰਦੀ, ਪਤਝੜ ਜਾਂ, ਫਿਰ ਹੋਏ ਬਸੰਤ ਦਾ ਮੌਸਮ 

ਤਪਦੀ ਧਰਤੀ, ਮੱਚਦਾ ਸੂਰਜ, ਕੁਦਰਤ ਮੇਘ ਮਲਾਰੀਂ।

ਬੰਦੇ ਅੱਡ-ਅੱਡ ਕੰਮੀਂ ਰੁੱਝੇ, ਇਹ ਕੁਦਰਤ ਦੀ ਮਾਇਆ

ਕੁਦਰਤ ਨੇ ਹੈ ਬਖ਼ਸ਼ੀ ਮੇਰੀ, ਕਲਮ ਨੂੰ ਸ਼ਕਤੀ ਭਾਰੀ।

ਮਾਸਾਹਾਰੀ, ਸ਼ਾਕਾਹਾਰੀ, ਜਾਂ ਫਿਰ ਪੌਣ-ਆਹਾਰੀ

ਕੁਦਰਤ ਦਾ ਹੀ ਖੇਲ ਹੈ ਸਾਰਾ, ਪੰਛੀ ਲਾਉਣ ਉਡਾਰੀ।

ਕੁਦਰਤ ਦਿੱਸਦੀ, ਕੁਦਰਤ ਸੁਣਦੀ, ਕੁਦਰਤ ਹੈ ਕਰਤਾਰੀ

ਕੁਦਰਤ ਦੇ ਨੇ ਚੋਜ ਨਿਰਾਲੇ, ਮੈਂ ਜਾਵਾਂ ਬਲਿਹਾਰੀ। 

* ਪ੍ਰੋ. ਨਵ ਸੰਗੀਤ ਸਿੰਘ 

# ਅਕਾਲ ਯੂਨੀਵਰਸਿਟੀ, ਤਲਵੰਡੀ ਸਾਬੋ-151302 (ਬਠਿੰਡਾ).   9417692015.