ਨੌਂ ਮਹੀਨੇ ਬਾਅਦ ਵੀ ਅਧੂਰੇ ਪਾਰਕ ਦੀ ਸਥਿਤੀ ਜਿਉ ਦੀ ਤਿਉ
ਬਠਿੰਡਾ 29 ਨਵੰਬਰ (ਗੁਰਪ੍ਰੀਤ ਚਹਿਲ/ਵਰਲਡ ਪੰਜਾਬੀ ਟਾਈਮਜ਼)
ਪੰਜਾਬ ਦੀ ਮੌਜੂਦਾ ਸਰਕਾਰ ਇੱਕ ਪਾਸੇ ਤਾਂ ਵਿਕਾਸ ਦੀਆਂ ਗੱਲਾਂ ਕਰਦੀ ਨਹੀਂ ਥੱਕਦੀ, ਪ੍ਰੰਤੂ ਜ਼ਮੀਨੀ ਪੱਧਰ ਤੇ ਸਥਿਤੀ ਕੁੱਝ ਹੋਰ ਹੀ ਵੇਖਣ ਨੂੰ ਮਿਲਦੀ ਹੈ। ਸਰਕਾਰ ਦੇ ਹੋ ਰਹੇ ਕੁੱਝ ਕੰਮਾਂ ਨੂੰ ਵੇਖ਼ ਕੇ ਤਾਂ ਇੰਝ ਲੱਗਦਾ ਹੈ ਕਿ ਹਾਥੀ ਦੇ ਦੰਦ ਖਾਣ ਦੇ ਹੋਰ ਤੇ ਦਿਖਾਉਣ ਲਈ ਹੋਰ। ਜਿਸ ਤਰ੍ਹਾਂ ਕਿ ਪਿਛਲੇ ਕਰੀਬ ਚਾਰ ਸਾਲਾਂ ਤੋਂ ਦੇਖਦੇ ਆਏ ਹਾਂ ਕਿ ਪੰਜਾਬ ਦੀ ਮੌਜੂਦਾ ਸਰਕਾਰ ਦੇ ਉਹ ਚਾਹੇ ਕੋਈ ਮੰਤਰੀ ਹੋਵੇ, ਵਿਧਾਇਕ ਹੋਵੇ ਜਾਂ ਕਿਸੇ ਮਹਿਕਮੇ ਦਾ ਚੇਅਰਮੈਨ ਹੋਵੇ ਉਦਘਾਟਨ ਕਰਨ ਨੂੰ ਜਿਆਦਾ ਹੀ ਕਾਹਲੇ ਅਤੇ ਤਿਆਰ ਬਰ ਤਿਆਰ ਰਹਿੰਦੇ ਹਨ। ਭਾਵੇਂ ਕਈ ਵਾਰ ਸਥਿਤੀ ਬੜੀ ਹਾਸੋਹੀਣੀ ਬਣ ਜਾਂਦੀ ਹੈ।ਬਿਲਕੁੱਲ ਇਸੇ ਤਰ੍ਹਾਂ ਦਾ ਹੀ ਮਾਮਲਾ ਬਠਿੰਡਾ ਜਿਲ੍ਹੇ ਦੇ ਬਲਾਕ ਸੰਗਤ ਅਧੀਨ ਆਉਂਦੇ ਪਿੰਡ ਕੋਟਗੁਰੂ ਤੋਂ ਸਾਹਮਣੇ ਆਇਆ ਹੈ ਜਿੱਥੇ ਅੱਜ ਤੋਂ ਕਈ ਮਹੀਨੇ ਪਹਿਲਾਂ ਬਠਿੰਡਾ ਨਗਰ ਸੁਧਾਰ ਟਰੱਸਟ ਦੇ ਚੇਅਰਮੈਨ ਤੇ ਜਿਲ੍ਹਾ ਪ੍ਰਧਾਨ ਜਤਿੰਦਰ ਸਿੰਘ ਭੱਲਾ ਨੇ ਫੋਕੀ ਵਾਹ ਵਾਹ ਖੱਟਣ ਲਈ ਪਿੰਡ ਵਿੱਚ ਬਨਣ ਵਾਲੇ ਪਾਰਕ ਦਾ ਉਦਘਾਟਨ ਬਿਨਾਂ ਕੰਮ ਪੂਰਾ ਹੋਏ ਹੀ ਕਰ ਦਿੱਤਾ। ਜਦੋਂ ਕਿ ਪਾਰਕ ਦਾ ਅਜੇ ਤੱਕ ਅੱਧਾ ਕੰਮ ਵੀ ਪੂਰਾ ਨਹੀਂ ਹੋਇਆ ਸੀ। ਇਸਤੋਂ ਵੀ ਵੱਧ ਹੈਰਾਨੀ ਇਸ ਗੱਲ਼ ਦੀ ਹੈ ਕਿ ਉਹਨਾਂ ਦੇ ਉਦਘਾਟਨ ਕਰਨ ਸਮੇਂ ਪਿੰਡ ਦੀ ਪੰਚਾਇਤ, ਬਲਾਕ ਵਿਕਾਸ ਦਫ਼ਤਰ ਸੰਗਤ ਦੇ ਅਧਿਕਾਰੀ ਅਤੇ ਕਰਮਚਾਰੀ ਵੀ ਹਾਜ਼ਰ ਸਨ। ਪਰ ਕਿਸੇ ਨੇ ਅਧੂਰੇ ਪਾਰਕ ਦਾ ਉਦਘਾਟਨ ਕਰਨ ਦਾ ਵਿਰੋਧ ਨਹੀਂ ਕੀਤਾ। ਪ੍ਰੰਤੂ ਸਭ ਤੋਂ ਵੱਧ ਹੈਰਾਨੀ ਵਾਲੀ ਗੱਲ ਤਾਂ ਇਹ ਹੈ ਕਿ ਉਦਘਾਟਨ ਕਰਨ ਤੋਂ ਬਾਅਦ ਵੀ ਤਕਰੀਬਨ ਪੌਣਾ ਸਾਲ ਬੀਤਣ ਦੇ ਬਾਵਜੂਦ ਵੀ ਪਾਰਕ ਦਾ ਕੰਮ ਪੂਰਾ ਕਰਨ ਦੀ ਬਜਾਏ ਸਥਿਤੀ ਅੱਜ ਵੀ ਜਿਉ ਦੀ ਤਿਉਂ ਹੀ ਹੈ। ਪਾਰਕ ਅੱਗੋਂ ਦੀ ਲੰਘਣ ਵਾਲ਼ਾ ਹਰ ਜਾਗਰੂਕ ਇਨਸਾਨ ਅਧੂਰੇ ਪਾਰਕ ਦੇ ਉਦਘਾਟਨ ਦਾ ਰੱਖਿਆ ਹੋਇਆ ਪੱਥਰ ਵੇਖ ਕੇ ਬਹੁਤ ਹੈਰਾਨੀ ਪ੍ਰਗਟ ਕਰਦਾ ਹੋਇਆ, ਮਨ ਹੀ ਮਨ ਸਰਕਾਰ ਨੂੰ ਕੋਸਦਾ ਹੋਇਆ ਅੱਗੇ ਲੰਘ ਜਾਂਦਾ ਹੈ। । ਇਥੇ ਇਹ ਵੀ ਜ਼ਿਕਰ ਕਰਨਾ ਬਹੁਤ ਜਰੂਰੀ ਹੈ ਕਿ ਜਤਿੰਦਰ ਸਿੰਘ ਭੱਲਾ ਕਈ ਪਲਾਂਟਾਂ ਦੇ ਮਾਮਲੇ ਚ ਪੀੜਤ ਲੋਕਾਂ ਨੂੰ ਇਨਸਾਫ ਨਹੀਂ ਦਵਾ ਸਕੇ। ਜ਼ਿਕਰਯੋਗ ਹੈ ਕਿ ਪਿਛਲੀ ਕਾਂਗਰਸ ਸਰਕਾਰ ਦੇ ਸਮੇਂ ਉਸ ਵੇਲੇ ਦਾ ਕੈਪਟਨ ਅਮਰਿੰਦਰ ਸਿੰਘ ਦਾ ਇੱਕ ਕਥਿਤ ਨੇੜਲਾ ਈ ਓ ਜਿਸਨੇ ਕਿ ਬੜੀਆਂ ਧਾਂਦਲੀਆਂ ਕੀਤੀਆਂ ਅਤੇ ਵੱਡੀਆਂ ਕਲੋਨੀਆਂ ਵਿੱਚ ਮੋਟੇ ਪੈਸੇ ਲੈਕੇ ਲੋਕਾਂ ਦੇ ਪਲਾਟ ਏਧਰੋਂ ਉੱਧਰ ਕੀਤੇ ਉਸ ਵੱਲ ਵੀ ਪੰਜਾਬ ਸਰਕਾਰ ਅਤੇ ਮਹਿਕਮੇ ਦੇ ਚੇਅਰਮੈਨ ਨੇ ਕੋਈ ਖ਼ਾਸ ਧਿਆਨ ਨਹੀਂ ਦਿੱਤਾ।
