ਰਿਸ਼ਵਤ ਦੇ ਮਾਮਲੇ ’ਚ ਕਿਸੇ ਨਾਲ ਨਹੀਂ ਕੀਤੀ ਜਾਵੇਗੀ ਕੋਈ ਲਿਹਾਜ : ਈ.ਓ.
ਕੋਟਕਪੂਰਾ, 15 ਫਰਵਰੀ (ਟਿੰਕੂ ਕੁਮਾਰ/ਵਰਲਡ ਪੰਜਾਬੀ ਟਾਈਮਜ਼)
ਦਰਜਨ ਤੋਂ ਜਿਆਦਾ ਕੌਂਸਲਰਾਂ ਵਲੋਂ ਨਗਰ ਕੋਂਸਲ ਕੋਟਕਪੂਰਾ ਦੇ ਪ੍ਰਧਾਨ ਨੂੰ ਨਕਸ਼ਾ ਪਾਸ ਕਰਵਾਉਣ ਲਈ ਹੁੰਦੇ ਭਿ੍ਰਸ਼ਟਾਚਾਰ ਅਤੇ ਇਕ ਅਧਿਕਾਰੀ ’ਤੇ ਰਿਸ਼ਵਤ ਲੈਣ ਦੇ ਦੋਸ਼ਾਂ ਦੀ ਸੌਂਪੀ ਸ਼ਿਕਾਇਤ ਦੀਆਂ ਖਬਰਾਂ ਅਖਬਾਰਾਂ ਦੀਆਂ ਸੁਰਖੀਆਂ ਬਣੀਆਂ ਪਰ ਨਾ ਤਾਂ ਸਬੰਧਤ ਵਿਭਾਗ ਨੇ ਕੋਈ ਕਾਰਵਾਈ ਕੀਤੀ ਤੇ ਨਾ ਹੀ ਵਿਜੀਲੈਂਸ ਵਿਭਾਗ ਵਲੋਂ ਇਸ ਦਾ ਕੋਈ ਨੋਟਿਸ ਲੈਣ ਦੀ ਗੱਲ ਸਾਹਮਣੇ ਆਈ। ਹੁਣ ਜਸਕਰਨ ਸਿੰਘ ਪੁੱਤਰ ਨਿਰਭੈ ਸਿੰਘ ਵਾਸੀ ਜੋੜੀਆਂ ਚੱਕੀਆਂ, ਕੋਟਕਪੂਰਾ ਨੇ ਸਥਾਨਕ ਸਰਕਾਰਾਂ ਵਿਭਾਗ ਦੇ ਡਾਇਰੈਕਟਰ ਨੂੰ ਭੇਜੀ ਸ਼ਿਕਾਇਤ ਵਿੱਚ ਦੋਸ਼ ਲਾਇਆ ਹੈ ਕਿ ਪਿਛਲੇ ਦੋ ਸਾਲਾਂ ਦੇ ਅਰਸੇ ਦਰਮਿਆਨ ਜੋੜੀਆਂ ਚੱਕੀਆਂ ਦੀ ਮੈਂਬਰਾਂ ਵਾਲੀ ਗਲੀ ਅਤੇ ਮੁਹੱਲਾ ਪਟਵਾਰੀਆਂ ਤੋਂ ਡੇਰਾ ਫਰਮਾਹਾਂ ਵਾਲਾ ਤੱਕ ਜੋ ਨਵੇਂ ਮਕਾਨ ਬਣੇ ਹਨ, ਉਹਨਾਂ ਵਿੱਚੋਂ ਬਹੁਤ ਸਾਰੇ ਮਕਾਨ ਅਜਿਹੇ ਹਨ, ਜਿੰਨਾ ਨੇ ਨਕਸ਼ਾ ਪਾਸ ਨਹੀਂ ਕਰਵਾਇਆ। ਸ਼ਿਕਾਇਤ ਕਰਤਾ ਨੇ ਉਕਤ ਨਵ ਨਿਰਮਾਣ ਵਾਲੇ ਮਕਾਨਾ ਦੇ ਮਾਲਕਾਂ ਤੋਂ ਲੈਂਟਰ ਵਾਲੇ ਦਿਨ ਰਿਸ਼ਵਤ ਦੀ ਮੰਗ ਕਰਨ ਵਾਲੇ ਨਗਰ ਕੌਂਸਲ ਦੇ ਜੇ.ਈ. ਸਮੇਤ ਹੋਰ ਕਰਮਚਾਰੀਆਂ ਦਾ ਬਕਾਇਦਾ ਨਾਮ ਲਿਖ ਕੇ ਦੋਸ਼ ਲਾਇਆ ਕਿ ਜੋ ਮਕਾਨ ਮਾਲਕ ਰਿਸ਼ਵਤ ਦੇ ਦਿੰਦਾ ਸੀ, ਉਸਨੂੰ ਨੋਟਿਸ ਨਹੀਂ ਸੀ ਭੇਜਿਆ ਜਾਂਦਾ ਅਤੇ ਜੋ ਰਿਸ਼ਵਤ ਦੇਣ ਤੋਂ ਇਨਕਾਰ ਕਰਦਾ ਸੀ, ਉਸਨੂੰ ਨੋਟਿਸ ਭੇਜ ਕੇ ਬਲੈਕਮੇਲ ਕਰਨ ਦੀ ਕੌਸ਼ਿਸ਼ ਕੀਤੀ ਜਾਂਦੀ ਸੀ। ਉਸ ਨੇ ਸਾਰੇ ਮਾਮਲੇ ਦੀ ਜਾਂਚ ਕਰਾਉਣ ਦੀ ਮੰਗ ਕਰਦਿਆਂ ਦੱਸਿਆ ਕਿ ਜੇਕਰ ਕੋਟਕਪੂਰਾ ਸ਼ਹਿਰ ਦੇ ਨਵੇਂ ਬਣੇ ਮਕਾਨਾ ਦੇ ਨਕਸ਼ਿਆਂ ਬਾਰੇ ਜਾਂਚ ਕਰਵਾਈ ਜਾਵੇ ਤਾਂ ਸਬੰਧਤ ਜੇ.ਈ. ਅਤੇ ਹੋਰ ਕਰਮਚਾਰੀਆਂ ਦੇ ਚਿਹਰੇ ਤੋਂ ਨਕਾਬ ਹੱਟ ਜਾਵੇਗਾ। ਸ਼ਿਕਾਇਤ ਕਰਤਾ ਮੁਤਾਬਿਕ ਇਸ ਨਾਲ ਜਿੱਥੇ ਪੰਜਾਬ ਸਰਕਾਰ ਅਤੇ ਨਗਰ ਕੌਂਸਲ ਦਾ ਵਿਤੀ ਨੁਕਸਾਨ ਕੀਤਾ ਗਿਆ, ਉੱਥੇ ਰਿਸ਼ਵਤ ਖਤਮ ਕਰਨ ਦੇ ਦਾਅਵੇ ਵੀ ਠੁੱਸ ਹੋ ਕੇ ਰਹਿ ਗਏ। ਸੰਪਰਕ ਕਰਨ ’ਤੇ ਨਗਰ ਕੌਂਸਲ ਦੇ ਕਾਰਜ ਸਾਧਕ ਅਫਸਰ ਅਮਰਇੰਦਰ ਸਿੰਘ ਨੇ ਆਖਿਆ ਕਿ ਉਹ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕਰਵਾਉਣਗੇ ਤੇ ਭਿ੍ਰਸ਼ਟਾਚਾਰ ਦੇ ਮਾਮਲੇ ਵਿੱਚ ਕਿਸੇ ਨਾ ਕੋਈ ਰਿਆਇਤ ਕੀਤੀ ਜਾਵੇਗੀ।
