ਮੁੱਖ ਮਹਿਮਾਨ ਨੇ ਰਾਸ਼ਨ ਵੰਡਣ ਵਾਲੀਆਂ ਗੱਡੀਆਂ ਨੂੰ ਹਰੀ ਝੰਡੀ ਦੇ ਕੇ ਕੀਤਾ ਰਵਾਨਾ
ਕੋਟਕਪੂਰਾ, 8 ਸਤੰਬਰ (ਟਿੰਕੂ ਕੁਮਾਰ/ਵਰਲਡ ਪੰਜਾਬੀ ਟਾਈਮਜ਼)
ਨਿਸ਼ਕਾਮ ਸੇਵਾ ਸੰਮਤੀ (ਰਜਿ.) ਕੋਟਕਪੂਰਾ ਵੱਲੋਂ 267ਵਾਂ ਮਾਸਿਕ ਮੁਫ਼ਤ ਰਾਸ਼ਨ ਵੰਡ ਸਮਾਰੋਹ 7 ਸਤੰਬਰ 2025 ਨੂੰ ਅਗਰਵਾਲ ਭਵਨ, ਕੋਟਕਪੂਰਾ ਵਿੱਚ ਸ਼ਰਧਾ, ਸੇਵਾ-ਭਾਵਨਾ ਅਤੇ ਨਿਮਰਤਾ ਨਾਲ ਸਫਲਤਾਪੂਰਵਕ ਸੰਪੰਨ ਹੋਇਆ। ਇਹ ਕੇਵਲ ਇੱਕ ਮੁਫ਼ਤ ਰਾਸ਼ਨ ਵੰਡਣ ਦਾ ਕਾਰਜ ਨਹੀਂ ਸੀ, ਬਲਕਿ ਇਨਸਾਨੀਅਤ ਪ੍ਰਤੀ ਸਮਰਪਿਤ ਨਿਰਲੋਭ ਸੇਵਾ ਦਾ ਪ੍ਰਤੀਕ ਸੀ। ਪਿਛਲੇ ਕਰੀਬ 22 ਸਾਲਾਂ ਤੋਂ ਸੰਮਤੀ ਸਿਰਫ ਆਪਣੇ ਮੈਂਬਰਾਂ ਦੇ ਯੋਗਦਾਨ ਨਾਲ—ਬਿਨਾਂ ਕਿਸੇ ਸਰਕਾਰੀ ਜਾਂ ਬਾਹਰੀ ਸਹਾਇਤਾ ਤੋਂ ਆਮਦਨ-ਰਹਿਤ, ਵਿਧਵਾ ਅਤੇ ਲੋੜਵੰਦ ਔਰਤਾਂ ਨੂੰ ਮੁਫ਼ਤ ਰਾਸ਼ਨ ਸਹਾਇਤਾ ਦੇ ਰਹੀ ਹੈ। ਸਮਾਰੋਹ ਦੀ ਸ਼ੁਰੂਆਤ ਭਗਵਾਨ ਦੇ ਨਾਮ ਸਿਮਰਨ ਨਾਲ ਹੋਈ ਜਿਸ ਨਾਲ ਹਾਜ਼ਰੀਨ ਨੂੰ ਅੰਦਰੂਨੀ ਸ਼ਾਂਤੀ ਅਤੇ ਆਤਮਿਕ ਉਤਸ਼ਾਹ ਦੀ ਅਨੁਭੂਤੀ ਹੋਈ। ਇਸ ਕਾਰਜ ਦੀ ਅਗਵਾਈ ਸੰਸਥਾ ਦੇ ਸਰਪ੍ਰਸਤ ਯਸ਼ਪਾਲ ਅਗਰਵਾਲ ਜੀ ਅਤੇ ਪ੍ਰਧਾਨ ਮਨੋਜ ਦਿਵੇਦੀ ਜੀ ਵੱਲੋਂ ਕੀਤੀ ਗਈ। ਹਰ ਮਹੀਨੇ ਲਗਭਗ 435 ਲੋੜਵੰਦ ਮਹਿਲਾਵਾਂ ਨੂੰ, ਜੋ ਕੋਟਕਪੂਰਾ ਸ਼ਹਿਰ ਅਤੇ ਨੇੜਲੇ ਪਿੰਡਾਂ ਵਿੱਚ ਵੱਸਦੀਆਂ ਹਨ, ਉਨ੍ਹਾਂ ਦੀ ਰੋਜ਼ਾਨਾ ਲੋੜ ਮੁਤਾਬਕ ਤਿਆਰ ਕੀਤਾ ਗਿਆ ਮੁਫ਼ਤ ਰਾਸ਼ਨ ਉਹਨਾਂ ਦੇ ਘਰ ਤੱਕ ਹਰ ਮਹੀਨੇ ਪਹੁੰਚਾਇਆ ਜਾਂਦਾ ਹੈ। ਸੰਮਤੀ ਦੇ ਜਨਰਲ ਸਕੱਤਰ ਲੈਕਚਰਾਰ ਵਰਿੰਦਰ ਕਟਾਰੀਆ ਜੀ ਨੇ ਸੇਵਾ ਦੇ ਨਿਯਮ, ਕਾਰਜ-ਪ੍ਰਕਿਰਿਆ ਅਤੇ ਪੂਰੀ ਪਾਰਦਰਸ਼ੀਤਾ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਕਿ ਸੰਸਥਾ ਸਿਰਫ ਦਾਨਦਾਤਾ ਮੈਂਬਰਾਂ ਦੇ ਯੋਗਦਾਨ ’ਤੇ ਨਿਰਭਰ ਹੈ। ਇਸ ਮੌਕੇ ਸਿਮਰਨਜੀਤ ਕੌਰ ਸੰਸਥਾ ਦੇ ਪਰਿਵਾਰ ਨਾਲ ਜੋੜੇ, ਜਿਸ ਦਾ ਮੈਂਬਰਾਂ ਨੇ ਤਾੜੀਆਂ ਨਾਲ ਸਵਾਗਤ ਕੀਤਾ। ਯਸ਼ਪਾਲ ਅਗਰਵਾਲ ਜੀ ਨੇ ਆਪਣੇ ਆਧਿਆਤਮਿਕ ਵਿਚਾਰ ਸਾਂਝੇ ਕਰਦਿਆਂ ਕਿਹਾ ਕਿ ਸੇਵਾ ਹੀ ਅਸਲ ਭਗਤੀ ਹੈ। ਜਦੋਂ ਮਨੁੱਖ ਆਪਣੀ ਕਮਾਈ ਵਿੱਚੋਂ ਇੱਕ ਹਿੱਸਾ ਲੋੜਵੰਦਾਂ ਲਈ ਸਮਰਪਿਤ ਕਰਦਾ ਹੈ, ਤਾਂ ਇਹ ਕੇਵਲ ਮਨੁੱਖੀ ਫਰਜ਼ ਨਹੀਂ ਰਹਿੰਦਾ, ਸਗੋਂ ਰੂਹਾਨੀ ਉੱਚਾਈਆਂ ਪ੍ਰਾਪਤ ਕਰਨ ਦਾ ਸਾਧਨ ਬਣ ਜਾਂਦਾ ਹੈ। ਉਨ੍ਹਾਂ ਜ਼ੋਰ ਦਿੱਤਾ ਕਿ ਲੋੜਵੰਦਾਂ ਦੀ ਸੇਵਾ ਦਰਅਸਲ ਰੱਬ ਦੀ ਸੇਵਾ ਹੈ ਅਤੇ ਇਹੀ ਸੱਚੀ ਅਰਦਾਸ ਅਤੇ ਭਗਤੀ ਹੈ, ਜੋ ਮਨੁੱਖ ਨੂੰ ਆਤਮਕ ਸ਼ਾਂਤੀ ਅਤੇ ਪਰਮਾਤਮਾ ਨਾਲ ਇਕ ਰੂਪ ਹੋਣ ਦਾ ਅਨੰਦ ਪ੍ਰਦਾਨ ਕਰਦੀ ਹੈ। ਉਨ੍ਹਾਂ ਨੇ ਸਮਾਜ ਨੂੰ ਪ੍ਰੇਰਿਤ ਕੀਤਾ ਕਿ ਆਪਣੀ ਕਮਾਈ ਵਿਚੋਂ ਇੱਕ ਹਿੱਸਾ ਲੋੜਵੰਦਾਂ ਲਈ ਨਿਯਤ ਕਰਨਾ ਨਾ ਸਿਰਫ ਮਨੁੱਖੀ ਫਰਜ਼ ਹੈ, ਸਗੋਂ ਆਤਮਿਕ ਉੱਚਾਈ ਪ੍ਰਾਪਤ ਕਰਨ ਦਾ ਸਾਧਨ ਵੀ ਹੈ। ਸਮਾਰੋਹ ਵਿੱਚ ਮੁੱਖ ਮਹਿਮਾਨ ਹਰਨਾਮ ਸਿੰਘ ਜੀ (ਰਿਟਾਇਰਡ ਪਟਵਾਰੀ), ਜੋ ਆਪਣੀ ਪੋਤਰੀ ਜਸ਼ਨਪ੍ਰੀਤ ਕੌਰ ਦੇ ਜਨਮਦਿਨ ਦੇ ਸੰਦਰਭ ਵਿੱਚ ਹਾਜ਼ਰ ਹੋਏ, ਨੇ ਸੰਸਥਾ ਦੀ ਨਿਸ਼ਕਾਮ ਸੇਵਾ ਦੀ ਭਰਪੂਰ ਪ੍ਰਸ਼ੰਸਾ ਕੀਤੀ। ਉਨ੍ਹਾਂ ਨੇ ਕਿਹਾ ਕਿ ਇਹੋ ਜਿਹੀਆਂ ਸੰਸਥਾਵਾਂ ਸਮਾਜ ਵਿਚ ਚੰਗਿਆਈ ਦੀ ਜੋਤ ਜਗਾਈ ਰੱਖਦੀਆਂ ਹਨ। ਆਪਣੀ ਸ਼ਰਧਾ ਦੇ ਪ੍ਰਤੀਕ ਵਜੋਂ ਉਨ੍ਹਾਂ ਨੇ 5100 ਰੁਪਏ ਦੀ ਭੇਟ ਸੰਮਤੀ ਨੂੰ ਜਰੂਰਤਮੰਦ ਔਰਤਾਂ ਦੀ ਮੱਦਦ ਲਈ ਅਰਪਣ ਕੀਤੀ। ਇਸ ਮੌਕੇ ਹਰਨਾਮ ਸਿੰਘ ਜੀ ਦੀ 17 ਸਾਲਾ ਪੋਤਰੀ ਨਮਰੀਤ ਕੌਰ ਨੇ ਵੀ ਬਹੁਤ ਹੀ ਪ੍ਰਭਾਵਸ਼ਾਲੀ ਭਾਸ਼ਣ ਕੀਤਾ। ਉਸਨੇ ਆਪਣੇ ਵਿਚਾਰ ਸਾਂਝੇ ਕਰਦਿਆਂ ਕਿਹਾ ਕਿ ਨਿਸ਼ਕਾਮ ਸੇਵਾ ਸੰਮਤੀ ਦੁਆਰਾ ਕੀਤਾ ਜਾ ਰਿਹਾ ਮੁਫ਼ਤ ਰਾਸ਼ਨ ਵੰਡਣ ਦਾ ਕਾਰਜ ਸਿਰਫ ਸਹਾਇਤਾ ਨਹੀਂ, ਸਗੋਂ ਸੱਚੀ ਇਨਸਾਨੀਅਤ ਅਤੇ ਭਗਤੀ ਦਾ ਪ੍ਰਤੀਕ ਹੈ। ਉਸਨੇ ਕਿਹਾ ਕਿ ਇਹ ਕਾਰਜ ਨੌਜਵਾਨ ਪੀੜ੍ਹੀ ਲਈ ਪ੍ਰੇਰਣਾ ਦਾ ਸਰੋਤ ਹੈ ਕਿ ਸਾਨੂੰ ਵੀ ਆਪਣੀ ਜ਼ਿੰਦਗੀ ਵਿੱਚ ਦੂਜਿਆਂ ਦੀ ਮਦਦ ਕਰਨ ਲਈ ਹਮੇਸ਼ਾਂ ਤਿਆਰ ਰਹਿਣਾ ਚਾਹੀਦਾ ਹੈ। ਉਸਦੇ ਸ਼ਬਦਾਂ ਨੇ ਹਾਜ਼ਰ ਸਭ ਲੋਕਾਂ ਦੇ ਦਿਲਾਂ ਨੂੰ ਛੂਹ ਲਿਆ ਅਤੇ ਨੌਜਵਾਨੀ ਦੀ ਰੂਹ ਵਿੱਚ ਸੇਵਾ ਦਾ ਨਵਾਂ ਜਜ਼ਬਾ ਜਗਾਇਆ। ਇਸ ਮੌਕੇ ਵਰਿੰਦਰ ਕਟਾਰੀਆ ਨੇ ਮੁੱਖ ਮਹਿਮਾਨ ਹਰਨਾਮ ਸਿੰਘ ਜੀ ਨੂੰ ਜੋ ਕਿ ਆਪਣੇ ਪਰਿਵਾਰ ਨਾਲ ਹਾਜਰ ਸੀ, ਜਿਨ੍ਹਾਂ ਵਿੱਚ ਉਨ੍ਹਾਂ ਨਾਲ ਸਰਬਜੀਤ ਸਿੰਘ, ਹਰਪ੍ਰੀਤ ਕੌਰ, ਜਸਵਿੰਦਰ ਸਿੰਘ, ਰਵਿੰਦਰਪਾਲ ਕੌਰ, ਧੀ ਰਸ਼ਮੀਤ ਕੌਰ, ਧੀ ਨਮਰੀਤ ਕੌਰ ਅਤੇ ਰਜਤ ਭੱਲਾ (ਬ.ਓ.ਮ.) ਜੀ ਨੂੰ ਰਾਸ਼ਨ ਵੰਡਣ ਦੀ ਪੂਰੀ ਪ੍ਰਕਿਰਿਆ, ਲਾਭਪਾਤਰੀ ਦੀ ਜਾਂਚ ਅਤੇ ਘਰ-ਘਰ ਸਪਲਾਈ ਦੇ ਤਰੀਕੇ ਬਾਰੇ ਜਾਣੂ ਕਰਵਾਇਆ ਗਿਆ। ਇਸ ਭਾਵਨਾਤਮਕ ਸਮਾਗਮ ਦੌਰਾਨ ਮੁਖ ਮਹਿਮਾਨ ਅਤੇ ਹੋਰ ਵਿਅਕਤੀਆਂ ਲਈ ਚਾਹ-ਪਾਣੀ ਦੀ ਵਿਵਸਥਾ ਸੰਜੀਵ ਢੀਂਗਰਾ ਅਤੇ ਸੰਦੀਪ ਸਚਦੇਵਾ ਵੱਲੋਂ ਪੂਰੀ ਇਮਾਨਦਾਰੀ ਅਤੇ ਸਤਿਕਾਰ ਯੋਗ ਭਾਵ ਨਾਲ ਕੀਤੀ ਗਈ। ਪ੍ਰੋਗਰਾਮ ਦੇ ਅੰਤ ਵਿੱਚ ਮੁੱਖ ਮਹਿਮਾਨ ਨੇ ਰਾਸ਼ਨ ਵੰਡਣ ਵਾਲੀਆਂ ਗੱਡੀਆਂ ਨੂੰ ਹਰੀ ਝੰਡੀ ਦੇ ਕੇ ਰਵਾਨਾ ਕੀਤਾ, ਜਿਹੜੀਆਂ 435 ਜਰੂਰਤਮੰਦ ਮਹਿਲਾਵਾਂ ਤੱਕ ਸਹਾਇਤਾ ਪਹੁੰਚਾਉਣ ਲਈ ਨਿਕਲੀਆਂ। ਇਸ ਉਤਸ਼ਾਹਵਰਧਕ ਸਮਾਰੋਹ ਵਿੱਚ ਕਈ ਪ੍ਰਸਿੱਧ ਹਸਤੀਆਂ ਜਿਵੇਂ ਕਿ ਲੈਕਚਰਾਰ ਵਰਿੰਦਰ ਕਟਾਰੀਆ, ਕੈਸ਼ੀਅਰ ਸੋਮਨਾਥ ਗਰਗ, ਟੀ.ਆਰ. ਅਰੋੜਾ, ਮਨਮੋਹਨ ਸਿੰਘ ਚਾਵਲਾ, ਸੁਬਾਸ਼ ਜਰਮਨੀ, ਕ੍ਰਿਸ਼ਨ ਮੁਨੀਮ, ਮਾਸਟਰ ਹਰਬੰਸ ਲਾਲ ਸ਼ਰਮਾ, ਰਾਜਿੰਦਰ ਕੁਮਾਰ, ਸ਼ਾਮ ਲਾਲ ਸਿੰਗਲਾ, ਜਗਰਾਜ ਸਿੰਘ ਜੇ.ਈ., ਅਨਿਲ ਕੁਮਾਰ ਗੋਇਲ, ਇਕਬਾਲ ਸਿੰਘ ਮੱਲਣ, ਗੁਰਚਰਨ ਸਿੰਘ, ਦਰਸ਼ਨ ਗੋਇਲ, ਜਸਵਿੰਦਰ ਸਿੰਘ, ਸਿਮਰਨਜੀਤ ਕੌਰ, ਓਮ ਪ੍ਰਕਾਸ਼ ਗੁਪਤਾ, ਸੁਨੀਤਾ ਰਾਣੀ, ਸੰਜੀਵ ਢੀਂਗਰਾ, ਸੰਦੀਪ ਸਚਦੇਵਾ, ਬੂਟਾ ਸਿੰਘ ਪੁਰਬਾ, ਮੁਕੇਸ਼ ਜਿੰਦਲ ਆਦਿ ਹਾਜ਼ਰ ਰਹੀਆਂ। ਇਹ ਸਾਰੇ ਹੀ ਸੰਸਥਾ ਦੇ ਮਜ਼ਬੂਤ ਸਤੰਭ ਹਨ ਜੋ ਸੇਵਾ ਰਾਹੀਂ ਨਵੀਂ ਇਤਿਹਾਸਿਕ ਮਿਸਾਲ ਕਾਇਮ ਕਰ ਰਹੇ ਹਨ। ਸਮਾਰਹ ਦਾ ਅੰਤ ਸਰਦਾਰ ਹਰਨਾਮ ਸਿੰਘ ਜੀ ਦੇ ਧੰਨਵਾਦੀ ਸ਼ਬਦਾਂ ਨਾਲ ਹੋਇਆ। ਅਗਲਾ 268ਵਾਂ ਮਾਸਿਕ ਰਾਸ਼ਨ ਵੰਡ ਸਮਾਰੋਹ 5 ਅਕਤੂਬਰ 2025 (ਐਤਵਾਰ) ਨੂੰ ਆਯੋਜਿਤ ਕੀਤਾ ਜਾਵੇਗਾ।
