‘ਨੋਟਾ’ ਨੇ ਪਾਈ ਭਸੂੜੀ, ਪਿੰਡ ਚੱਕ ਕਲਿਆਣ ਵਿੱਚ ਦੋ ਵਾਰਡਾਂ ਦੀ ਦੁਬਾਰਾ ਹੋਵੇਗੀ ਚੋਣ!
ਫਰੀਦਕੋਟ , 24 ਅਕਤੂਬਰ (ਵਰਲਡ ਪੰਜਾਬੀ ਟਾਈਮਜ਼)
ਫਰੀਦਕੋਟ ਜਿਲ੍ਹੇ ਦੇ ਪਿੰਡ ਚੱਕ ਕਲਿਆਣ ਵਿੱਚ ਪੰਚਾਇਤੀ ਚੋਣਾਂ ਦੌਰਾਨ ਇਤਿਹਾਸ ਰਚਿਆ ਗਿਆ ਹੈ। ਇਸ ਪਿੰਡ ਦੇ ਵਾਰਡ ਨੰਬਰ ਤਿੰਨ ਵਿੱਚ ਦੋ ਉਮੀਦਵਾਰ ਮੈਂਬਰ ਪੰਚਾਇਤ ਦੀ ਚੋਣ ਲੜ ਰਹੇ ਸਨ। ਵੋਟਾਂ ਵਾਲੇ ਦਿਨ ਪਿੰਡ ਦੇ ਵੋਟਰਾਂ ਨੇ ਪੰਚੀ ਦੇ ਉਮੀਦਵਾਰ ਅੰਗਰੇਜ ਸਿੰਘ ਅਤੇ ਹਰਤੇਜ ਸਿੰਘ ਨੂੰ ਜਿਤਾਉਣ ਦੀ ਥਾਂ ‘ਨੋਟਾ’ ਨੂੰ ਵੋਟਾਂ ਪਾ ਕੇ ਜਿਤਾ ਦਿੱਤਾ ਹੈ। ਸੂਚਨਾ ਅਨੁਸਾਰ ਪਿੰਡ ਚੱਕ ਕਲਿਆਣ ਦੇ ਵਾਰਡ ਨੰਬਰ ਤਿੰਨ ਵਿੱਚ 158 ਵੋਟਾਂ ਪੋਲ ਹੋਈਆਂ ਸਨ, ਜਿਸ ਵਿੱਚੋਂ ਅੰਗਰੇਜ ਸਿੰਘ ਨੂੰ 43, ਹਰਤੇਜ ਸਿੰਘ ਨੂੰ 54 ਅਤੇ ਨੋਟਾਂ ਨੂੰ 61 ਵੋਟਾਂ ਪਈਆਂ। ਪੋਲਿੰਗ ਅਧਿਕਾਰੀਆਂ ਨੇ ਵੋਟਾਂ ਦੀ ਗਿਣਤੀ ਤੋਂ ਬਾਅਦ ਇਸ ਪਿੰਡ ਦੇ ਵਾਰਡ ਨੰਬਰ ਤਿੰਨ ਵਿੱਚ ‘ਨੋਟਾ’ ਨੂੰ ਜੇਤੂ ਐਲਾਨ ਦਿੱਤਾ ਹੈ। ਜਿਲ੍ਹਾ ਚੋਣ ਅਫਸਰ ਵਨੀਤ ਕੁਮਾਰ ਨੇ ਕਿਹਾ ਕਿ ਪਿੰਡ ਚੱਕ ਕਲਿਆਣ ਦੇ ਵਾਰਡ ਨੰਬਰ ਤਿੰਨ ’ਚ ‘ਨੋਟਾ’ ਜੇਤੂ ਐਲਾਨਿਆ ਗਿਆ ਹੈ, ਇਸ ਲਈ ਚੋਣ ਕਮਿਸ਼ਨ ਨੂੰ ਇਸ ਵਾਰਡ ਦੀ ਦੁਬਾਰਾ ਚੋਣ ਕਰਵਾਉਣ ਲਈ ਲਿਖਿਆ ਗਿਆ ਹੈ। ਵੋਟਾਂ ਦੌਰਾਨ ‘ਨੋਟਾ’ ਨੂੰ ਵੋਟ ਪਾਉਣ ਦਾ ਅਧਿਕਾਰ 15 ਸਾਲ ਪਹਿਲਾਂ ਦਿੱਤਾ ਗਿਆ ਸੀ ਅਤੇ ਹੁਣ ਤੱਕ ਕਿਸੇ ਵੀ ਬੂਥ ਜਾਂ ਵਾਰਡ ਵਿੱਚ ‘ਨੋਟਾ’ ਜੇਤੂ ਨਹੀਂ ਰਿਹਾ ਪਰ ਇਸ ਵਾਰ ਪੰਚਾਇਤੀ ਚੋਣਾਂ ਵਿੱਚ ‘ਨੋਟਾ’ ਨੇ ਬਾਜੀ ਮਾਰ ਲਈ ਹੈ। ਜਿਲ੍ਹਾ ਚੋਣ ਅਫਸਰ ਵਨੀਤ ਕੁਮਾਰ ਨੇ ਕਿਹਾ ਕਿ ਇਹ ਲੋਕਤੰਤਰ ਦੀ ਖੂਬਸੂਰਤੀ ਦਰਸਾਉਂਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਵਾਰਡ ’ਚ ਦੁਬਾਰਾ ਵੋਟਾਂ ਪੁਆਈਆਂ ਜਾਣਗੀਆਂ ਅਤੇ ਇਸ ਸਬੰਧੀ ਪੰਜਾਬ ਦੇ ਮੁੱਖ ਚੋਣ ਕਮਿਸ਼ਨ ਨੂੰ ਲਿਖ ਦਿੱਤਾ ਗਿਆ ਹੈ। ਜਾਣਕਾਰੀ ਅਨੁਸਾਰ ਪਿਛਲੇ ਸਮਿਆਂ ਨਾਲੋਂ ਇਸ ਵਾਰ ਨੋਟਾਂ ਨੂੰ ਹਰ ਬੂਥ ’ਤੇ ਵਧੇਰੇ ਵੋਟਾਂ ਪਈਆਂ ਹਨ।
