ਲੁਧਿਆਣਾ, 3 ਸਤੰਬਰ( ਅੰਜੂ ਗਰੋਵਰ/ਵਰਲਡ ਪੰਜਾਬੀ ਟਾਈਮਜ਼)
ਸਿਰਜਣਧਾਰਾ ਸਾਹਿਤਕ ਸੰਸਥਾ ਵੱਲੋਂ ਸੰਸਥਾ ਦੀ ਪ੍ਰਧਾਨ ਡਾ. ਗੁਰਚਰਨ ਕੌਰ ਕੋਚਰ ਦੀ ਪ੍ਰਧਾਨਗੀ ਹੇਠ ਮਹੀਨਾਵਾਰ ਮੀਟਿੰਗ ਪੰਜਾਬੀ ਭਵਨ ਵਿਖੇ ਡਾ.ਪਰਮਿੰਦਰ ਸਿੰਘ ਹਾਲ ਵਿਚ ਹੋਈ ਜਿਸ ਵਿੱਚ ਵਿਸ਼ੇਸ਼ ਮਹਿਮਾਨਾਂ ਵਜੋਂ ਪੰਜਾਬੀ ਸਾਹਿਤ ਅਕਾਡਮੀ ਦੇ ਸਾਬਕਾ ਪ੍ਰਧਾਨ ਪ੍ਰੋਫ਼ੈਸਰ ਰਵਿੰਦਰ ਭੱਠਲ, ਸਾਬਕਾ ਜਨਰਲ ਸਕੱਤਰ ਡਾ. ਗੁਰਇਕਬਾਲ ਸਿੰਘ ਅਤੇ ਜਗਰਾਉਂ ਤੋਂ ਨਾਮਵਰ ਸ਼ਾਇਰ ਭਗਵਾਨ ਢਿੱਲੋਂ ਨੇ ਸ਼ਿਰਕਤ ਕੀਤੀ। ਡਾ.ਕੋਚਰ ਨੇ ਆਈਆਂ ਹੋਈਆਂ ਸਾਰੀਆਂ ਸ਼ਖ਼ਸੀਅਤਾਂ ਨੂੰ ‘ਜੀ ਆਇਆਂ ਨੂੰ’ ਆਖਿਆ। ਮੀਟਿੰਗ ਸ਼ੁਰੂ ਹੋਣ ਤੋਂ ਪਹਿਲਾਂ ਸਦੀਵੀਂ ਅਲਵਿਦਾ ਆਖ ਗਏ ਪ੍ਰਸਿੱਧ ਕਲਾਕਾਰ ਡਾ. ਜਸਵਿੰਦਰ ਭੱਲਾ ਜੀ, ਉਸਤਾਦ ਗ਼ਜ਼ਲਗੋ ਸਿਰੀ ਰਾਮ ਅਰਸ਼ ਅਤੇ ਸਤੀਸ਼ ਗੁਲਾਟੀ ਜੀ ਦੇ ਦਾਮਾਦ ਅੰਮ੍ਰਿਤ ਪਾਲ ਜੀ ਤੇ ਹੋਰ ਹੜ੍ਹਾਂ ਦੀ ਮਾਰ ਹੇਠ ਆ ਕੇ ਜਾਨਾਂ ਗੁਆ ਚੁੱਕੀਆਂ ਰੂਹਾਂ ਲਈ ਦੋ ਮਿੰਟ ਦਾ ਮੌਨ ਰੱਖਿਆ ਗਿਆ। ਉਪਰੰਤ ਵਿਚਾਰ ਅਧੀਨ ਰੱਖਿਆ ਗਿਆ ਵਿਸ਼ਾ “ਪੁਸਤਕਾਂ ਪੜ੍ਹਨ ਦਾ ਮਹੱਤਵ” ਉੱਤੇ ਭਰਪੂਰ ਵਿਚਾਰ ਵਟਾਂਦਰਾ ਹੋਇਆ। ਇਸ ਮੌਕੇ ਸੁਰਿੰਦਰ ਸਿੰਘ ਪਾਇਲ ਦੁਆਰਾ ਪੁੱਛੇ ਗਏ ਸਵਾਲ ਪੰਜਾਬੀ ਸਾਹਿਤ ਦੀ ਸ਼ੁਰੂਆਤ ਕਦੋਂ ਹੋਈ?, ਦਾ ਜਵਾਬ ਡਾ. ਗੁਰਇਕਬਾਲ ਜੀ ਨੇ ਬਾਖ਼ੂਬੀ ਦਿੱਤਾ। ਹੜ੍ਹਾਂ ਕਰਕੇ ਪੈਦਾ ਹੋਏ ਭਿਆਨਕ ਹਾਲਾਤ ਲਈ ਵੀ ਚਿੰਤਾ ਦਾ ਪ੍ਰਗਟਾਵਾ ਕੀਤਾ ਗਿਆ।ਇਸ ਮੌਕੇ ਕਰਵਾਏ ਗਏ ਕਵੀ ਦਰਬਾਰ ਵਿੱਚ ਕਵੀਆਂ ਵੱਲੋਂ ਵੀ ਕੁਦਰਤ ਨਾਲ ਕੀਤੀ ਗਈ ਬੇਲੋੜੀ ਛੇੜ-ਛਾੜ ਅਤੇ ਕੁਦਰਤ ਦਾ ਕਹਿਰ ਆਦਿ ਨਾਲ ਜੁੜੀਆਂ ਰਚਨਾਵਾਂ ਪੇਸ਼ ਕੀਤੀਆਂ ਗਈਆਂ। ਕਵੀ ਦਰਬਾਰ ਵਿੱਚ ਲਖਵੀਰ ਸਿੰਘ ਲੱਬਾ ਨੇ ਤਰੁਨੰਮ ਵਿੱਚ “ਜ਼ਹਿਰਾਂ ਨੇ ਮੁਰਝਾ ਦਿੱਤੀ ਫੁੱਲਾਂ ਭਰੀ ਕਿਆਰੀ’ ਰਚਨਾ ਰਾਹੀਂ ਖ਼ੂਬਸੂਰਤ ਆਗਾਜ਼ ਕੀਤਾ। ਜਗਪਾਲ ਜੱਗਾ ਜਮਾਲਪੁਰੀ ਨੇ ਆਪਣੇ ਪਿਤਾ ਜੀ ਦੀ ਰਚਨਾ ‘ਭੇਟਾ ਇਸ ਅੰਮ੍ਰਿਤ ਦੀ ਮੈਂ ਤਾਂ ਵਾਰ ਦਿਆਂ ਪਰਿਵਾਰ’ ਕਹਿ ਕੇ ਕਵੀ ਦਰਬਾਰ ਨੂੰ ਅੱਗੇ ਵਧਾਇਆ। ਨੇਤਰ ਸਿੰਘ ਮੁੱਤੋ ਨੇ ਆਪਣੀ ਰਚਨਾ ‘ਕੁਦਰਤ ਦੇ ਨਾਲ ਇੱਕ-ਮਿਕ ਹੋ ਜਾ’ ਸੁਣਾ ਕੇ ਆਪਣੀ ਭਰਪੂਰ ਹਾਜ਼ਰੀ ਲਵਾਈ। ਸੁਰਜੀਤ ਸਿੰਘ ਜੀਤ ਨੇ ਵਾਤਾਵਰਨ ਦੀ ਸੰਭਾਲ ਬਾਰੇ ਖ਼ੂਬਸੂਰਤ ਰਚਨਾ ਨਾਲ ਖ਼ੂਬ ਰੰਗ ਬੰਨ੍ਹਿਆ। ਗੁਰਵਿੰਦਰ ਸਿੰਘ ਕੰਵਰ ਨੇ ਜੋਸ਼ ਭਰਪੂਰ ਰਚਨਾ ‘ਮੇਰੇ ਲਈ ਬਣੀ ਜੋ ਸਲੀਬ ਤੋੜ ਕੇ ਨ ਜਾਵੀਂ ,ਮੈਨੂੰ ਮੇਰੀ ਰੂਹ ਤੋਂ ਵਿਛੋੜ ਕੇ ਨ ਜਾਵੀਂ ਸੁਣਾ ਕੇ ਵਾਹ ਵਾਹ ਖੱਟੀ। ਰਵਿੰਦਰ ਭੱਠਲ ਜੀ ਨੇ ਅਜੋਕੇ ਹਾਲਾਤ ਕਿਉਂ ਬਣੇ ਹਨ, ਨੂੰ ਬਹੁਤ ਹੀ ਖ਼ੂਬਸੂਰਤ ਕਵਿਤਾ ਰਾਹੀਂ ਪੇਸ਼ ਕੀਤਾ। ਡਾ਼ ਗੁਰਇਕਬਾਲ ਨੇ ਜੰਗ ਅਤੇ ਵਾਤਾਵਰਨ ਨਾਲ ਜੁੜੀਆਂ ਛੋਟੀਆਂ ਛੋਟੀਆਂ ਦੋ ਰਚਨਾਵਾਂ ਸੁਣਾ ਕੇ ਨਿਵੇਕਲਾ ਮਾਹੌਲ ਸਿਰਜਿਆ। ਪ੍ਰਿੰ. ਇੰਦਰਜੀਤਪਾਲ ਕੌਰ ਨੇ ਆਪਣੀ ਲਿਖਣ ਪ੍ਰਕਿਰਿਆ ਬਾਰੇ ਚਾਨਣਾ ਪਾਇਆ।ਮੰਚ ਨੂੰ ਬਾਖ਼ੂਬੀ ਸੰਚਾਲਨ ਕਰਦਿਆਂ ਇੰਦਰਜੀਤ ਲੋਟੇ ਨੇ ਡਾ.ਜਸਵਿੰਦਰ ਭੱਲਾ ਦੀ ਯਾਦ ਨਾਲ ਜੁੜੀ ਇੱਕ ਰਚਨਾ ਪੇਸ਼ ਕੀਤੀ। ਡਾ.ਗੁਰਚਰਨ ਕੌਰ ਕੋਚਰ ਨੇ ਆਪਣੀ ਰਚਨਾ ‘ਸਾਉਣ ਮਹੀਨਾ ਸੁੱਕਾ,ਭਾਦੋਂ ਹੜ੍ਹ ਆਵਣ, ਧਰਤੀ ਨਾਲ ਨਾ ਰੁੱਤਾਂ ਦਾ ਸੁਰ ਤਾਲ ਰਿਹਾ’ ਸੁਣਾਉਣ ਤੋਂ ਬਾਅਦ ਪ੍ਰੋਗਰਾਮ ਵਿੱਚ ਸ਼ਾਮਿਲ ਹੋਏ ਸਾਰੇ ਮਹਿਮਾਨਾਂ ਅਤੇ ਕਵੀ ਸਾਹਿਬਾਨਾਂ ਦਾ ਧੰਨਵਾਦ ਕੀਤਾ।
