ਰੀਮਾ ਦੇ ਪਤੀ ਮਨਜੋਤ ਨੇ ਸਰਕਾਰੀ ਨੌਕਰੀ ਤੋਂ ਰਿਟਾਇਰ ਹੋਣ ਪਿੱਛੋਂ ਪੈਨਸ਼ਨਰੀ ਲਾਭਾਂ ਦੇ ਅੱਧੇ ਪੈਸਿਆਂ ਨਾਲ ਮਾਹਿਲ ਪੁਰ ਵਿੱਚ ਇਕ ਪੰਦਰਾਂ ਮਰਲੇ ਦਾ ਪਲਾਟ ਖਰੀਦ ਲਿਆ ਸੀ। ਹੁਣ ਉਹ ਇਸ ਵਿੱਚ ਕੋਠੀ ਬਣਵਾਉਣਾ ਚਾਹੁੰਦਾ ਸੀ। ਰੀਮਾ ਦੇ ਮਾਸੜ ਨੇ ਲੌਕ ਡਾਊਨ ਲੱਗਣ ਤੋਂ ਪਹਿਲਾਂ ਆਪਣੀ ਕੋਠੀ ਠੇਕੇ ਤੇ ਬਣਵਾਈ ਸੀ। ਹੁਣ ਸਰਕਾਰ ਨੇ ਲੌਕ ਡਾਊਨ ਵਿੱਚ ਕਾਫੀ ਢਿੱਲ ਦੇ ਦਿੱਤੀ ਸੀ। ਇਸ ਕਰਕੇ ਪਲਾਟ ਵਿੱਚ ਕੋਠੀ ਬਣਵਾਈ ਜਾ ਸਕਦੀ ਸੀ। ਠੇਕੇ ਤੇ ਕੋਠੀ ਬਣਵਾਉਣ ਦੇ ਰਾਜ ਮਿਸਤਰੀਆਂ ਦੇ ਵੱਖਰੇ,
ਵੱਖਰੇ ਰੇਟ ਹਨ। ਕੋਈ 155 ਰੁਪਏ ਸਕੇਅਰ ਫੁੱਟ ਮੰਗਦਾ ਹੈ, ਕੋਈ 165 ਰੁਪਏ ਸਕੇਅਰ ਫੁੱਟ ਮੰਗਦਾ ਹੈ। ਰੀਮਾ ਦੇ ਮਾਸੜ ਨੇ ਪਹਿਲਾਂ ਫੌਜ ਵਿੱਚ ਨੌਕਰੀ ਕੀਤੀ ਸੀ। ਫੌਜ ਵਿੱਚੋਂ ਰਿਟਾਇਰ ਹੋਣ ਪਿੱਛੋਂ ਉਸ ਨੇ ਪੰਜਾਬ ਨੈਸ਼ਨਲ ਬੈਂਕ ਵਿੱਚ ਨੌਕਰੀ ਕੀਤੀ ਸੀ। ਉਹ ਬਹੁਤ ਚੁਸਤ ਤੇ ਚੰਗਾ ਗੱਲਕਾਰ ਸੀ। ਉਹ ਮਾੜੇ-ਧੀੜੇ ਬੰਦੇ ਨੂੰ ਤਾਂ ਆਪਣੇ ਮੂਹਰੇ ਗੱਲ ਹੀ ਨਹੀਂ ਕਰਨ ਦਿੰਦਾ ਸੀ। ਰੀਮਾ ਨੇ ਆਪਣੇ ਮਾਸੜ ਨੂੰ ਫੋਨ ਕਰਕੇ ਆਖਿਆ,” ਮਾਸੜ ਜੀ, ਤੁਸੀਂ ਕੋਠੀ ਕਿਸ ਰੇਟ ਤੇ ਬਣਵਾਈ ਸੀ। ਅਸੀਂ ਜਿਹੜਾ ਮਾਹਿਲ ਪੁਰ ਪਲਾਟ ਲਿਆ ਸੀ, ਉਸ ਵਿੱਚ ਕੋਠੀ ਬਣਵਾਣਾ ਚਾਹੁੰਦੇ ਆਂ।”
” ਪੁੱਤ ਅਸੀਂ 153 ਰੁਪਏ ਸਕੇਅਰ ਫੁੱਟ ਦੇ ਹਿਸਾਬ ਨਾਲ ਕੋਠੀ ਬਣਵਾਈ ਸੀ। ਰਾਜ ਮਿਸਤਰੀ ਸਾਡੇ ਪਿੰਡ ਦਾ ਹੀ ਸੀ। ਮੇਰੀ ਸਲਾਹ ਆ, ਤੁਸੀਂ ਕੋਠੀ ਅਜੇ ਨਾ ਬਣਵਾਇਓ। ਜੇ ਕੋਠੀ ਦਾ ਕੰਮ ਸ਼ੁਰੂ ਹੋ ਗਿਆ, ਮਨਜੋਤ ਨੂੰ ਇੱਟਾਂ, ਸੀਮਿੰਟ, ਸਰੀਆ ਤੇ ਹੋਰ ਛੋਟਾ, ਮੋਟਾ ਸਾਮਾਨ ਲੈਣ ਲਈ ਬਾਜ਼ਾਰ ਜਾਣਾ ਪੈਣਾ ਆਂ। ਕੋਰੋਨਾ ਦੀ ਬੀਮਾਰੀ ਅਜੇ ਹੋਰ ਵੱਧਣੀ ਆਂ। ਤੂੰ ਮਨਜੋਤ ਦਾ ਪੂਰਾ ਖਿਆਲ ਰੱਖੀਂ। ਉਸ ਨੂੰ ਘਰੋਂ ਬਾਹਰ ਨਾ ਜਾਣ ਦਈਂ। ਉਹ ਤਾਂ ਸੋਨੇ ਦੇ ਆਂਡੇ ਦੇਣ ਵਾਲੀ ਮੁਰਗੀ ਆ। ਜੇ ਉਸ ਨੂੰ ਕੁਝ ਹੋ ਗਿਆ, ਤੇਰੇ ਘਰ ‘ਚ ਭੰਗ ਭੁੱਜਣ ਲੱਗ ਪੈਣੀ ਆਂ। ਨਾਲੇ ਤੈਨੂੰ ਪਤਾ ਹੀ ਆ, ਆਦਮੀ ਬਗੈਰ ਜ਼ਨਾਨੀ ਦਾ ਕੱਲਾ ਰਹਿਣਾ ਬਹੁਤ ਔਖਾ ਹੁੰਦਾ ਆ।”
” ਮਾਸੜ ਜੀ, ਮੈਂ ਤੁਹਾਨੂੰ ਪੂਰਾ ਯਕੀਨ ਦੁਆਂਦੀ ਆਂ ਕਿ ਮੈਂ ਮਨਜੋਤ ਦਾ ਪੂਰਾ ਖਿਆਲ ਰੱਖਾਂਗੀ। ਨੇਕ ਸਲਾਹ ਦੇਣ ਲਈ ਤੁਹਾਡਾ ਬਹੁਤ, ਬਹੁਤ ਧੰਨਵਾਦ।” ਰੀਮਾ ਨੇ ਆਖਿਆ।
ਮਹਿੰਦਰ ਸਿੰਘ ਮਾਨ
ਸਾਮ੍ਹਣੇ ਅੰਗਦ ਸਿੰਘ ਐੱਮ ਐੱਲ ਏ ਹਾਊਸ
ਕੈਨਾਲ ਰੋਡ
ਨਵਾਂ ਸ਼ਹਿਰ-144514
ਫੋਨ -9915803554
