ਬਰਗਾੜੀ, 17 ਜਨਵਰੀ (ਟਿੰਕੂ ਕੁਮਾਰ/ਵਰਲਡ ਪੰਜਾਬੀ ਟਾਈਮਜ਼)

‘ਦ ਆਕਸਫੋਰਡ ਸਕੂਲ ਆਫ਼ ਐਜ਼ੂਕੇਸ਼ਨ, ਭਗਤਾ ਭਾਈਕਾ’ ਧਰੂ ਤਾਰੇ ਵਾਂਗ ਚਮਕਦੀ ਵਿੱਦਿਅਕ ਇੱਕ ਸੰਸਥਾ ਹੈ, ਜੋ ਹਰ ਖੇਤਰ ਵਿੱਚ ਆਏ ਦਿਨ ਪ੍ਰਾਪਤੀਆਂ ਕਰ ਰਹੀ ਹੈ। ਇਸ ਇਲਾਕੇ ਲਈ ਇਹ ਮਾਣ ਵਾਲੀ ਗੱਲ ਹੈ ਕਿ ਇਹ ਸੰਸਥਾ ਨੇ 13 ਜਨਵਰੀ 2024 ਨੂੰ ਦਿੱਲ਼ੀ ਵਿਖੇ ਹੋਏ ਜੀ-20 ਸੰਮੇਲਨ ਅਧੀਨ ਭਾਰਤ ਇੰਸਟੀਟਿਊਸ਼ਨ ਰੈਂਕਡ ਸਕੂਲ ਵਿੱਚ ਪੰਜਾਬ ਦੇ ਸਕੂਲਾਂ ਵਿੱਚੋਂ ਸਪੋਰਟਸ ਸ਼ੇ੍ਰਣੀ ਵਿੱਚ ਪੰਜਵਾਂ ਸਥਾਨ ਹਾਸਲ ਕੀਤਾ। ਜਿਸ ਵਿੱਚ 1080 ਸਕੂਲਾਂ ਦੇ ਬਿਨੈ-ਪੱਤਰ ਦਰਜ ਹੋਏ ਸਨ, ਜਿਨਾਂ ਵਿੱਚੋਂ 280 ਸਕੂਲਾਂ ਦੀ ਚੋਣ ਕੀਤੀ ਗਈ ਅਤੇ ਪਹਿਲੇ ਗੇੜ ਦੇ 130 ਸਕੂਲਾਂ ਵਿੱਚੋਂ ਆਕਸਫੋਰਡ ਸੰਸਥਾ ਨੂੰ ਸਿਟੀ ’ਚੋਂ (ਜ਼ਿਲੇ ਵਿੱਚੋਂ) ਦੂਜਾ ਅਤੇ ਸਟੇਟ ਰੈਂਕ ਵਿੱਚੋਂ ਪੰਜਵਾਂ ਸਥਾਨ ਪ੍ਰਾਪਤ ਹੋਇਆ। ਇਸ ਦੇ ਮੱਖ ਮਹਿਮਾਨ ਸ਼ੇਖਰ ਦੱਤ (ਸਾਬਕਾ ਗਵਰਨਰ ਛੱਤੀਸਗੜ, ਪ੍ਰੋ: ਸੀ.ਬੀ. ਸ਼ਰਮਾ (ਸਾਬਕਾ ਚੇਅਰਮੈਨ ਨਿਓਸ, ਗੌਰਮਿੰਟ ਆਫ਼ ਇੰਡੀਆ) ਵੱਲੋਂ ਸਕੂਲ ਦੇ ਪਿੰ੍ਰਸੀਪਲ ਰੂਪ ਲਾਲ ਬਾਂਸਲ ਨੂੰ ਇੱਕ ਟਰਾਫੀ ਅਤੇ ਸਰਟੀਫਿਕੇਟ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਪਿੰ੍ਰਸੀਪਲ ਰੂਪ ਲਾਲ ਬਾਂਸਲ ਨੇ ਆਪਣੇ ਵਿਚਾਰ ਸਾਂਝੇ ਕਰਦਿਆਂ ਕਿਹਾ ਕਿ ਇਹ ਸਾਡੇ ਸਕੂਲ ਲਈ, ਵਿਦਿਆਰਥੀਆਂ ਲਈ, ਮਾਪਿਆਂ ਲਈ ਅਤੇ ਸਾਰੇ ਇਲਾਕੇ ਲਈ ਬੜੇ ਮਾਣ ਵਾਲੀ ਗੱਲ ਹੈ ਕਿ ਆਕਸਫੋਰਡ ਸਕੂਲ ਵਿੱਦਿਆ ਦੇ ਨਾਲ-ਨਾਲ ਖੇਡਾਂ ਦੇ ਖੇਤਰ ਵਿੱਚ ਵੀ ਉੱਚੀਆਂ ਪ੍ਰਾਪਤੀਆਂ ਕਰ ਰਿਹਾ ਹੈ, ਜਿਸ ਕਾਰਨ ਇਸ ਸੰਸਥਾ ਨੂੰ ਇਹ ਸਨਮਾਨ ਹਾਸਿਲ ਹੋਇਆ ਹੈ। ਸਕੂਲ ਦੀ ਪ੍ਰਬੰਧਕ ਕਮੇਟੀ ਦੇ ਮੈਂਬਰਾਂ ਹਰਦੇਵ ਸਿੰਘ ਬਰਾੜ (ਸਾਬਕਾ ਚੇਅਰਮੈਨ), ਹਰਗੁਰਪ੍ਰੀਤ ਸਿੰਘ ਗਗਨ ਬਰਾੜ (ਚੇਅਰਮੈਨ), ਗੁਰਮੀਤ ਸਿੰਘ ਗਿੱਲ (ਪ੍ਰਧਾਨ), ਪਰਮਪਾਲ ਸਿੰਘ ‘ਸ਼ੈਰੀ ਢਿੱਲੋਂ’ (ਵਾਈਸ ਚੇਅਰਮੈਨ), ਗੁਰਮੀਤ ਸਿੰਘ ਗਿੱਲ ਸਰਪੰਚ (ਵਿੱਤ-ਸਕੱਤਰ) ਨੇ ਵੀ ਪਿੰ੍ਰਸੀਪਲ ਰੂਪ ਲਾਲ ਬਾਂਸਲ ਅਤੇ ਸਮੂਹ ਸਟਾਫ ਨੂੰ ਵਧਾਈ ਦਿੱਤੀ। ਉਹਨਾਂ ਕਿਹਾ ਕਿ ਇੱਕ ਯੋਗ ਅਗਵਾਈ ਵਿੱਚ ਹੀ ਪ੍ਰਾਪਤੀਆਂ ਹੋਣਾ ਯਕੀਨੀ ਹੁੰਦਾ ਹੈ।