ਕਿਹਾ! ਬਹੁਤੇ ਸਰਕਾਰੀ ਸੀਨੀਅਰ ਸੈਕੰਡਰੀ ਅਤੇ ਹਾਈ ਸਕੂਲ ਮੁਖੀਆਂ ਤੋਂ ਸੱਖਣੇ

ਕੋਟਕਪੂਰਾ, 11 ਮਾਰਚ (ਟਿੰਕੂ ਕੁਮਾਰ/ਵਰਲਡ ਪੰਜਾਬੀ ਟਾਈਮਜ਼)

ਪੰਜਾਬ ’ਚ ਪਿਛਲੇ ਲਗਭਗ ਦੋ ਸਾਲਾਂ ਤੋਂ ਆਮ ਆਦਮੀ ਪਾਰਟੀ ਦੇ ਸੁਪਰੀਮੋ ਅਰਵਿੰਦ ਕੇਜਰੀਵਾਲ, ਪਾਰਟੀ ਦੇ ਸੂਬਾਈ ਪ੍ਰਧਾਨ ਅਤੇ ਮੁੱਖ ਮੰਤਰੀ ਪੰਜਾਬ ਭਗਵੰਤ ਸਿੰਘ ਮਾਨ, ਵਿਸ਼ੇਸ਼ ਤੌਰ ’ਤੇ ਪੰਜਾਬ ਦੇ ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਅਤੇ ਪੰਜਾਬ ਦੇ ਕਈ ਹੋਰ ਮੰਤਰੀ ਹਰ ਰੋਜ ਪੰਜਾਬ ’ਚ ਸਿੱਖਿਆ ਦੇ ਪੱਧਰ ਨੂੰ ਉੱਚਾ ਚੁੱਕਣ ਅਤੇ ਪੰਜਾਬ ’ਚ ਸਿੱਖਿਆ ਕ੍ਰਾਂਤੀ ਲਿਆਉਣ ਦਾ ਬੜੇ ਜੋਰ ਸ਼ੋਰ ਨਾਲ ਪ੍ਰਚਾਰ ਕਰ ਰਹੇ ਹਨ, ਜਦਕਿ ਤਸਵੀਰ ਦਾ ਇੱਕ ਪਹਿਲੂ ਇਹ ਵੀ ਹੈ ਕਿ ਸਿੱਖਿਆ ਵਿਭਾਗ ਪੰਜਾਬ ਦੇ ਈ-ਪੰਜਾਬ ਪੋਰਟਲ ਅਨੁਸਾਰ ਪੰਜਾਬ ਦੇ ਬਹੁਤ ਸਾਰੇ ਜਿਲਿਆਂ ਦੇ ਸਰਕਾਰੀ ਸੈਕੰਡਰੀ ਸਕੂਲ ਪੱਕੇ ਪਿ੍ਰੰਸੀਪਲਾਂ ਤੋਂ ਸਰਕਾਰੀ ਹਾਈ ਸਕੂਲ ਪੱਕੇ ਮੁੱਖ ਅਧਿਆਪਕਾਂ ਤੋਂ ਅਤੇ ਬਲਾਕ ਪ੍ਰਾਇਮਰੀ ਸਿੱਖਿਆ ਦਫਤਰ ਪੱਕੇ ਬੀ.ਪੀ.ਈ.ਓ. ਤੋਂ ਬਿਨਾਂ ਡੰਗ ਸਾਰ ਰਹੇ ਹਨ। ਉਕਤ ਸ਼ਬਦਾਂ ਦਾ ਪ੍ਰਗਟਾਵਾ ਕਰਦਿਆਂ ਗੌਰਮਿੰਟ ਸਕੂਲ ਟੀਚਰਜ ਯੂਨੀਅਨ ਪੰਜਾਬ ਦੇ ਸੂਬਾਈ ਸਲਾਹਕਾਰ ਪ੍ਰੇਮ ਚਾਵਲਾ ਨੇ ਦੱਸਿਆ ਕਿ ਫਰੀਦਕੋਟ ਜਿਲੇ ਦੇ 11 ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲਾਂ ਵਿੱਚ ਪੱਕੇ ਪਿ੍ਰੰਸੀਪਲ ਨਹੀਂ ਹਨ, ਜਿਨਾਂ ’ਚ ਪ੍ਰਮੁੱਖ ਤੌਰ ’ਤੇ ਪਿੰਡ ਚੰਦ ਭਾਨ, ਰੋੜੀਕਪੂਰਾ, ਰਾਮੇਆਣਾ, ਮੱਤਾ, ਝੱਖੜਵਾਲਾ ਬਰਗਾੜੀ,  ਚੰਦਬਾਜਾ, ਕੋਟਸੁਖੀਆ, ਅਰਾਈਆਂਵਾਲਾ ਕਲਾਂ ਆਦਿ ਸ਼ਾਮਲ ਹਨ। ਇਸੇ ਤਰਾਂ 5 ਸਰਕਾਰੀ ਹਾਈ ਸਕੂਲਾਂ ’ਚ ਪੱਕੇ ਮੁੱਖ ਅਧਿਆਪਕ ਨਹੀਂ ਹਨ, ਜਿੰਨਾਂ ’ਚ ਡੱਲੇਵਾਲਾ, ਬਿਸ਼ਨੰਦੀ, ਚੈਨਾ, ਰੋਮਾਣਾ ਅਜੀਤ ਸਿੰਘ ਅਤੇ ਬਹਿਬਲ ਖੁਰਦ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਤਰਨਤਾਰਨ ਜਿਲੇ ਦੇ ਕੁੱਲ 77 ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲਾਂ ’ਚੋਂ ਪਿ੍ਰੰਸੀਪਲਾਂ ਦੀਆਂ ਸਿਰਫ 35 ਆਸਾਮੀਆਂ ਭਰੀਆਂ ਹਨ ਤੇ 42 ਆਸਾਮੀਆਂ ਖਾਲੀ ਹਨ। ਖਾਲੀ ਆਸਾਮੀਆਂ ਦੀ ਪ੍ਰਤੀਸ਼ਤਤਾ ਲਗਭਗ 55 ਫੀਸਦੀ ਹੈ। ਤਰਨਤਾਰਨ ਦੇ ਸਰਕਾਰੀ ਹਾਈ ਸਕੂਲਾਂ ਦੀ ਕੁੱਲ ਗਿਣਤੀ 97 ਹੈ, ਇਹਨਾਂ ’ਚੋਂ ਮੁੱਖ ਅਧਿਆਪਕਾਂ ਦੀਆਂ ਸਿਰਫ 20 ਅਸਾਮੀਆਂ ਭਰੀਆਂ ਹੋਈਆਂ ਹਨ ਤੇ 77 ਆਸਾਮੀਆਂ ਖਾਲੀ ਹਨ। ਖਾਲੀ ਪਈਆਂ ਅਸਾਮੀਆਂ ਦੀ ਪ੍ਰਤੀਸਤਤਾ ਲਗਭਗ 79 ਫੀਸਦੀ ਬਣਦੀ ਹੈ। ਤਰਨਤਾਰਨ ਜਿਲੇ ਦੇ 3 ਵਿਦਿਅਕ ਬਲਾਕਾਂ ’ਚ ਪੱਕੇ ਬਲਾਕ ਪ੍ਰਾਇਮਰੀ ਸਿੱਖਿਆ ਅਫਸਰ ਨਹੀਂ ਹਨ। ਮੋਗਾ ਜਿਲੇ ਵਿੱਚ ਕੁਲ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ 84 ਹਨ, ਜਿਨਾਂ ’ਚ ਪਿ੍ਰੰਸੀਪਲਾਂ ਦੀਆਂ 31 ਅਸਾਮੀਆਂ ਭਰੀਆਂ ਤੇ 53 ਆਸਾਮੀਆਂ ਖਾਲੀ ਪਈਆਂ ਹਨ। ਅੰਮ੍ਰਿਤਸਰ ਜਿਲੇ ਦੇ 18 ਸੀਨੀਅਰ ਸੈਕੰਡਰੀ ਸਕੂਲ ਅਤੇ 46 ਸਰਕਾਰੀ ਹਾਈ ਸਕੂਲ ਮੁਖੀਆਂ ਤੋਂ ਸਖਣੇ ਹਨ। ਸ਼੍ਰੀ ਮੁਕਤਸਰ ਸਾਹਿਬ ਦੇ 23 ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲਾਂ ’ਚ ਪੱਕੇ ਪਿ੍ਰੰਸੀਪਲ ਨਹੀਂ ਹਨ। ਇਸ ਤਰਾਂ ਫਾਜਿਲਕਾ ਜਿਲੇ ਦੇ 15 ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਪਿ੍ਰੰਸੀਪਲ ਤੋਂ ਸੱਖਣੇ ਹਨ। ਮੋਗਾ ਜਿਲੇ ਦੇ ਬਾਘਾਪੁਰਾਣਾ ਬਲਾਕ ਦੇ ਇੱਕ ਸਰਕਾਰੀ ਸੀਨੀਅਰ ਸਕੂਲ ’ਚ ਪ੍ਰਿੰਸੀਪਲ ਦੀ ਅਸਾਮੀ ਭਰੀ ਹੋਈ ਹੈ ਤੇ ਬਾਕੀ 14 ਆਸਾਮੀਆਂ ਖਾਲੀ ਪਈਆਂ ਹਨ। ਸਿਰਫ 1 ਸਕੂਲ ਬਾਘਾਪੁਰਾਣਾ ਲੜਕੇ (ਸਕੂਲ ਆਫ ਐਮੀਨੈਂਸ) ਦੀ ਆਸਾਮੀ ਭਰੀ ਹੋਈ ਹੈ। ਗੌਰਮਿੰਟ ਸਕੂਲ ਟੀਚਰਜ ਯੂਨੀਅਨ ਪੰਜਾਬ ਦੇ ਸੂਬਾ ਸਲਾਹਕਾਰ ਪ੍ਰੇਮ ਚਾਵਲਾ ਨੇ ਸਮੂਹ ਵਿਦਿਆਰਥੀਆਂ ਦੇ ਹਿੱਤ ’ਚ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਅਤੇ ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਤੋਂ ਮੰਗ ਕੀਤੀ ਹੈ ਕਿ ਪੰਜਾਬ ਦੇ ਸਾਰੇ ਸਕੂਲਾਂ ’ਚ ਪ੍ਰਿੰਸੀਪਲਾਂ ਮੁੱਖ ਅਧਿਆਪਕਾਂ ਅਤੇ ਅਧਿਆਪਕਾ ਦੀਆਂ ਖਾਲੀ ਪਈਆਂ ਹਜਾਰਾਂ ਆਸਾਮੀਆਂ ਤੁਰਤ ਵੱਖ-ਵੱਖ ਵਰਗਾਂ ਦੀਆਂ ਬਕਾਇਆ ਪਈਆਂ ਤਰੱਕੀਆਂ ਕਰਕੇ ਅਤੇ ਸਿੱਧੀ ਭਰਤੀ ਦੇ ਕੋਟੇ ਅਨੁਸਾਰ ਤੁਰਤ ਭਰੀਆਂ ਜਾਣ ਤਾਂ ਹੀ ਪੰਜਾਬ ਦੇ ਸਰਕਾਰੀ ਸਕੂਲ ਬਿਹਤਰ ਨਤੀਜੇ ਵਿਖਾ ਸਕਦੇ ਹਨ।