ਕਿਹਾ! ਟੈ੍ਰਫਿਕ ਪੁਲਿਸ ਨੂੰ ਗਲਤੀ ਕਰਨ ਵਾਲਿਆਂ ਖਿਲਾਫ਼ ਕਾਰਵਾਈ ਦੇ ਦਿੱਤੇ ਅਧਿਕਾਰ

ਕੋਟਕਪੂਰਾ, 25 ਜਨਵਰੀ (ਟਿੰਕੂ ਕੁਮਾਰ/ਵਰਲਡ ਪੰਜਾਬੀ ਟਾਈਮਜ਼)

ਸ਼ਹਿਰ ਵਿੱਚ ਪਲ ਪਲ ਲੱਗਦੇ ਟੈ੍ਰਫਿਕ ਜਾਮ ਦੀ ਸਮੱਸਿਆ ਹੱਲ ਕਰਨ ਲਈ ਅਰਥਾਤ ਆਵਾਜਾਈ ਨੂੰ ਸੁਚਾਰੂ ਢੰਗ ਨਾਲ ਚਲਾਉਣ ਸਬੰਧੀ ਸਪੀਕਰ ਕੁਲਤਾਰ ਸਿੰਘ ਸੰਧਵਾਂ ਦੇ ਪੀਆਰਓ ਮਨਪ੍ਰੀਤ ਸਿੰਘ ਮਨੀ ਧਾਲੀਵਾਲ ਨੇ ਚੈਂਬਰ ਆਫ ਕਾਮਰਸ ਐਂਡ ਇੰਡਸਟਰੀਜ ਦੇ ਪ੍ਰਧਾਨ ਓਮਕਾਰ ਗੋਇਲ ਸਮੇਤ ਇਲਾਕੇ ਦੇ ਕੌਂਸਲਰਾਂ ਅਤੇ ਟੈ੍ਰਫਿਕ ਪੁਲਿਸ ਦੀ ਮੀਟਿੰਗ ਦੌਰਾਨ ਰੂਟ ਪਲਾਨ ਬਾਰੇ ਵਿਚਾਰ ਵਟਾਂਦਰਾ ਕਰਦਿਆਂ ਮੰਨਿਆ ਕਿ ਟੈ੍ਰਫਿਕ ਜਾਮ ਦੀ ਸਮੱਸਿਆ ਨੂੰ ਹੱਲ ਕਰਨ ਲਈ ਵਾਹਨ ਚਾਲਕਾਂ, ਰਾਹਗੀਰਾਂ, ਦੁਕਾਨਦਾਰਾਂ ਅਤੇ ਆਮ ਲੋਕਾਂ ਨੂੰ ਵੀ ਬਰਾਬਰ ਸਹਿਯੋਗ ਦੇਣਾ ਪਵੇਗਾ। ਉਹਨਾਂ ਦੱਸਿਆ ਕਿ ਸ਼ਹਿਰ ਵਿੱਚ ਅੱਧੀ ਦਰਜਨ ਤੋਂ ਜਿਆਦਾ ਵਾਹਨ ਪਾਰਕਿੰਗਾਂ ਹੋਣ ਦੇ ਬਾਵਜੂਦ ਵੀ ਕੁਝ ਵਾਹਨ ਚਾਲਕ ਆਪਣੇ ਵਾਹਨਾ ਨੂੰ ਬਜਾਰ ਵਿੱਚ ਗਲਤ ਢੰਗ ਨਾਲ ਖੜਾ ਦਿੰਦੇ ਹਨ, ਜਿਸ ਕਰਕੇ ਟੈ੍ਰਫਿਕ ਜਾਮ ਵਾਲੀ ਸਥਿੱਤੀ ਬਣ ਜਾਂਦੀ ਹੈ। ਉਹਨਾਂ ਇਕ ਪਾਸੜ (ਵੰਨਵੇ) ਆਵਾਜਾਈ ਕਰਨ ਬਾਰੇ ਦੱਸਿਆ ਕਿ ਬੱਤੀਆਂ ਵਾਲਾ ਚੌਂਕ ਤੋਂ ਬਜਾਰ ਵੱਲ ਜਾਣ ਵਾਲੇ ਸਾਰੇ ਵਾਹਨ ਮਹਿਤਾ ਚੌਂਕ, ਰੇਲਵੇ ਬਜਾਰ ਅਤੇ ਢੋਡਾ ਚੌਂਕ ਰਾਹੀਂ ਹੁੰਦੇ ਹੋਏ ਪੁਰਾਣੀ ਦਾਣਾ ਮੰਡੀ ਵਿਖੇ ਖੜਾਏ ਜਾ ਸਕਣਗੇ, ਜਦਕਿ ਵਾਪਸੀ ਮੌਕੇ ਉਹੀ ਵਾਹਨ ਫੋਜੀ ਰੋਡ, ਰੇਲਵੇ ਪੁਲ ਦੇ ਹੇਠਾਂ ਹੁੰਦੇ ਹੋਏ ਵਾਪਸ ਬੱਤੀਆਂ ਵਾਲਾ ਚੌਂਕ ਵਿੱਚ ਪੁੱਜਣਗੇ। ਇਸ ਸਬੰਧੀ ਹਰਜੀਤ ਸਿੰਘ ਜਿਲਾ ਪੁਲਿਸ ਮੁਖੀ ਫਰੀਦਕੋਟ ਵਲੋਂ ਟੈ੍ਰਫਿਕ ਪੁਲਿਸ ਨੂੰ ਪੂਰਨ ਅਧਿਕਾਰ ਦਿੱਤੇ ਗਏ ਹਨ ਕਿ ਜੇਕਰ ਕੋਈ ਵਾਹਨ ਚਾਲਕ ਟੈ੍ਰਫਿਕ ਨਿਯਮਾ ਦੀ ਉਲੰਘਣਾ ਕਰੇਗਾ, ਅਰਥਾਤ ਆਪਣੇ ਵਾਹਨ ਗਲਤ ਢੰਗ ਨਾਲ ਖੜੇ ਕਰਨ ਦੀ ਕੌਸ਼ਿਸ਼ ਕਰੇਗਾ ਤਾਂ ਉਸ ਖਿਲਾਫ ਚਲਾਨ ਕੱਟਣ ਜਾਂ ਵਾਹਨ ਥਾਣੇ ਵਿੱਚ ਬੰਦ ਕਰਨ ਦੇ ਟੈ੍ਰਫਿਕ ਪੁਲਿਸ ਕੋਲ ਮੁਕੰਮਲ ਅਧਿਕਾਰ ਹੋਣਗੇ। ਨਗਰ ਕੌਂਸਲ ਦੀ ਮੀਤ ਪ੍ਰਧਾਨ ਮੈਡਮ ਸੁਰਿੰਦਰਪਾਲ ਕੌਰ ਬਰਾੜ ਦੇ ਬੇਟੇ ਰੋਮਾ ਬਰਾੜ ਨੇ ਆਖਿਆ ਕਿ ਇਸ ਸਬੰਧੀ ਸ਼ਹਿਰ ਵਿੱਚ ਬਕਾਇਦਾ ਮੁਨਿਆਦੀ ਵੀ ਕਰਵਾਈ ਜਾਵੇਗੀ। ਓਮਕਾਰ ਗੋਇਲ ਨੇ ਸਾਰੀਆਂ ਟਰੇਡ ਯੂਨੀਅਨਾ ਨਾਲ ਜੁੜੇ ਦੁਕਾਨਦਾਰਾਂ ਅਤੇ ਵਪਾਰੀਆਂ ਵਲੋਂ ਹਰ ਤਰਾਂ ਦਾ ਸਹਿਯੋਗ ਦੇਣ ਦਾ ਵਿਸ਼ਵਾਸ਼ ਦਿਵਾਉਂਦਿਆਂ ਆਖਿਆ ਕਿ ਸਾਰੇ ਦੁਕਾਨਦਾਰ ਆਪਣਾ ਸਮਾਨ ਦੁਕਾਨਾ ਦੇ ਬਾਹਰ ਨਹੀਂ ਰੱਖਣਗੇ ਅਤੇ ਆਵਾਜਾਈ ਵਿੱਚ ਕਿਸੇ ਪ੍ਰਕਾਰ ਦਾ ਅੜਿੱਕਾ ਪਾਉਣ ਦਾ ਸਬੱਬ ਨਹੀਂ ਬਣਨਗੇ। ਗੁੱਡ ਮੌਰਨਿੰਗ ਵੈਲਫੇਅਰ ਕਲੱਬ ਦੇ ਚੇਅਰਮੈਨ ਪੱਪੂ ਲਹੌਰੀਆ ਨੇ ਆਖਿਆ ਕਿ ਉਸ ਵੱਲੋਂ ਪਹਿਲਾਂ ਵੀ 22 ਹਜਾਰ ਰੁਪਿਆ ਆਪਣੀ ਜੇਬ ਵਿੱਚੋਂ ਖਰਚ ਕਰਕੇ ਪੀਲੀ ਪੱਟੀ (ਯੈਲੋ ਲਾਈਨ) ਖਿਚਵਾਈ ਗਈ ਸੀ ਪਰ ਜੇਕਰ ਉਸਦੀ ਪਾਲਣਾ ਕੀਤੀ ਜਾਂਦੀ ਤਾਂ ਇਹ ਸਮੱਸਿਆ ਕਦੇ ਵੀ ਨਾ ਆਉਂਦੀ। ਟੈ੍ਰਫਿਕ ਇੰਚਾਰਜ ਏਐੱਸਆਈ ਜਗਰੂਪ ਸਿੰਘ ਨੇ ਆਖਿਆ ਕਿ ਕੁਝ ਕੁ ਵਾਹਨ ਚਾਲਕਾਂ ਦੀ ਅਣਗਹਿਲੀ ਅਤੇ ਲਾਪ੍ਰਵਾਹੀ ਦਾ ਖਮਿਆਜਾ ਅਕਸਰ ਹੋਰਨਾ ਨੂੰ ਭੁਗਤਣਾ ਪੈਂਦਾ ਹੈ, ਕਿਉਂਕਿ ਟੈ੍ਰਫਿਕ ਜਾਮ ਦੀ ਸਮੱਸਿਆ ਦੌਰਾਨ ਸਕੂਲ ਵੈਨਾ, ਐਂਬੂਲੈਂਸ ਗੱਡੀਆਂ ਅਤੇ ਫਾਇਰਬਿਗ੍ਰੇਡ ਦੀ ਗੱਡੀ ਫਸ ਜਾਣ ਨਾਲ ਕੋਈ ਵੀ ਅਣਸੁਖਾਵੀਂ ਘਟਨਾ ਵਾਪਰਨ ਦਾ ਖਦਸ਼ਾ ਬਣਿਆ ਰਹਿੰਦਾ ਹੈ। ਇਸ ਮੌਕੇ ਉਪਰੋਕਤ ਤੋਂ ਇਲਾਵਾ ਗੁਰਮੀਤ ਸਿੰਘ ਆਰੇਵਾਲਾ ਚੇਅਰਮੈਨ ਮਾਰਕਿਟ ਕਮੇਟੀ ਕੋਟਕਪੂਰਾ, ਨਗਰ ਕੌਂਸਲ ਦੇ ਜੇ.ਈ. ਸੁਖਦੀਪ ਸਿੰਘ ਸਮੇਤ ਗੈਰੀ ਵੜਿੰਗ, ਬਿੱਟਾ ਨਰੂਲਾ, ਸੁਖਦੇਵ ਢੋਡਾ, ਅਸ਼ਵਨੀ ਕੁਮਾਰ ਅਤੇ ਏਐੱਸਆਈ ਰਜਿੰਦਰਪਾਲ ਸ਼ਰਮਾ ਆਦਿ ਵੀ ਹਾਜਰ ਸਨ।