ਜ਼ਰਾ ਦਿਲ ਦੀ ਗੱਲ ਸੁਣਾ ਤਾਂ ਸਹੀ।

ਕਿਉਂ ਦੂਰ ਹੈਂ ਨੇੜੇ ਆ ਤਾਂ ਸਹੀ।

ਕਿਤੇ ਵਿਛੜੇ ਹੀ ਨਾ ਮਰ ਜਾਈਏ,

ਗਲਵੱਕੜੀ ਪਾ, ਗਲ਼ ਲਾ ਤਾਂ ਸਹੀ।

ਕੀ ਰੱਖਿਐ ਪੀਜ਼ੇ ਬਰਗਰ ਵਿੱਚ,

ਕਦੇ ਰੋਟੀ-ਦਾਲ਼ ਵੀ ਖਾ ਤਾਂ ਸਹੀ।

ਦੂਰੋ-ਦੂਰੀ ਵਿੱਚ ਕੀ ਹੈ ਮਜ਼ਾ,

ਗੁੱਸੇ-ਰੁੱਸੇ ਨੂੰ ਮਨਾ ਤਾਂ ਸਹੀ।

ਮਿਟ ਜਾਣੀ ਉਦਾਸੀ ਪਲ-ਭਰ ਵਿੱਚ,

ਹਰ ਇੱਕ ਨੂੰ ਹੱਸ ਬੁਲਾ ਤਾਂ ਸਹੀ।

ਗੰਧਲਾ-ਧੁੰਦਲਾ ਮਾਹੌਲ ਬੜਾ,

ਕੁਝ ਦੀਵੇ-ਚਿਰਾਗ਼ ਜਗਾ ਤਾਂ ਸਹੀ।

ਚਹੁੰ ਪਾਸੀਂ ਸ਼ੋਰ-ਸ਼ਰਾਬਾ ਹੈ,

ਚੰਦ ਬੋਲ ਪਿਆਰ ਦੇ ਗਾ ਤਾਂ ਸਹੀ।

ਲੋਅ ਅੰਦਰ ਆਉਣ ਨੂੰ ਤਰਸ ਰਹੀ,

ਖਿੜਕੀ-ਪਰਦਾ ਸਰਕਾ ਤਾਂ ਸਹੀ।

~ ਪ੍ਰੋ. ਨਵ ਸੰਗੀਤ ਸਿੰਘ 

# ਅਕਾਲ ਯੂਨੀਵਰਸਿਟੀ, ਤਲਵੰਡੀ ਸਾਬੋ-151302 (ਬਠਿੰਡਾ)  9417692015.