ਬਾਸਰਕੇ ਪ੍ਰੋਡਕਸ਼ਨ ਹੇਠ ਨਿਰਮਾਤਾ ਨਛੱਤਰ ਸਿੰਘ ਸੰਧੂ ਵਲੋਂ ਲਿਖੀ ਨਿਵੇਕਲੇ ਵਿਸ਼ੇ ਦੀ ਇਹ ਫਿਲਮ ‘ਬੈਕ ਅਪ’ ਪਰਿਵਾਰਕ ਰਿਸ਼ਤਿਆ ਦੇ ਇਲਾਵਾ ਪੰਜਾਬ ਦੀ ਧਰਤੀ ‘ਤੇ ਵਗਦੇ ਛੇਵੇਂ ਦਰਿਆ ‘ਚ ਰੁੜਦੀ ਜਾ ਰਹੀ ਜਵਾਨੀ ਨੂੰ ਬਚਾਉਣ ਦਾ ਹੋਕਾ ਵੀ ਦਿੰਦੀ ਹੈ। ਲੇਖਕ ਨਛੱਤਰ ਸਿੰਘ ਸੰਧੂ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਇਹ ਫ਼ਿਲਮ ਅਜੋਕੇ ਸਮਾਜ ‘ਤੇ ਤੰਜ ਕਸਦੀ ਇਹ ਵੀ ਦਰਸਾਉਂਦੀ ਹੈ ਕਿ ਜਮੀਨਾਂ ਜਾਇਦਾਦਾਂ ਖ਼ਾਤਰ ਆਪਣੇ ਸਕੇ ਸਬੰਧੀਆਂ ਵਿੱਚ ਭਾਵੇਂ ਕਿੰਨਾ ਵੀ ਗਿਲਾ-ਸ਼ਿਕਵਾ, ਮਨ ਮੁਟਾਵ ਹੋ ਜਾਵੇ ਅਖੀਰ ਮੁਸੀਬਤ ਪੈਣ ‘ਤੇ ਆਪਣੇ ਹੀ ਨਾਲ ਖੜਦੇ ਹਨ। ਜਦਕਿ ਬਾਕੀ ਦੇ ਮੂੰਹ ਮੁਲਾਜੇਦਾਰ ਅਜਿਹੇ ਨਾਜ਼ਕ ਸਮੇਂ ‘ਚ ਸਿਰਫ ਤਮਾਸ਼ਾ ਦੇਖਣ ਵਾਲੇ ਹੀ ਜਾਂ ਪਿੱਠ ਵਿਖਾਉਣ ਵਾਲੇ ਹੁੰਦੇ ਹਨ।ਇਸ ਫਿਲਮ ਦੀ ਕਹਾਣੀ ਜਿੱਥੇ ਸਮਾਜਿਕ ਅਤੇ ਪਰਿਵਾਰਿਕ ਰਿਸ਼ਤਿਆਂ ਵਿੱਚ ਬੱਝੀ ਹੋਈ ਹੈ, ਉਥੇ ਨੌਜਵਾਨਾਂ ਨੂੰ ਪੰਜਾਬ ਦੀਆਂ ਵਿਰਾਸਤੀ ਖੇਡਾਂ ਨਾਲ ਜੋੜ ਕੇ ਨਸ਼ਿਆਂ ਤੋਂ ਦੂਰ ਰਹਿਣ ਦਾ ਸੁਨੇਹਾ ਵੀ ਦਿੰਦੀ ਹੈ। ਦੋ ਜਵਾਨ ਦਿਲਾਂ ਦੇ ਪਿਆਰ-ਮੁਹੱਬਤਾਂ ਦੀ ਚਾਸ਼ਨੀ ‘ਚ ਭਿੱਜੀ ਫ਼ਿਲਮ ਵਿਚਲਾ ਰੁਮਾਂਟਿਕ ਟਰੈਕ ਵੀ ਦਰਸ਼ਕਾਂ ਨੂੰ ਪ੍ਰਭਾਵਿਤ ਕਰੇਗਾ। ਇਸ ਫਿਲਮ ਵਿੱਚ ਨਵੇਂ ਚਿਹਰਿਆਂ ਦੇ ਨਾਲ ਨਾਲ ਪੰਜਾਬੀ ਦੇ ਅਨੇਕਾਂ ਦਿੱਗਜ ਕਲਾਕਾਰਾਂ ਨੂੰ ਵੀ ਪਰਦੇ ‘ਤੇ ਲਿਆਂਦਾ ਹੈ। ਨੌਜਵਾਨ ਨਿਰਦੇਸ਼ਕ ਜਸਵੰਤ ਮਿੰਟੂ ਨੇ ਹਰ ਇਕ ਦ੍ਰਿਸ਼ ਨੂੰ ਬੜੀ ਸੰਜੀਦਗੀ ਨਾਲ ਪਰਦੇ ‘ਤੇ ਉਤਾਰਿਆ ਹੈ।ਫਿਲਮ ਦਾ ਮੁੱਖ ਹੀਰੋ ਬਿੰਨੀ ਜੋੜਾ ਹੈ, ਫਿਲਮ ਦੀ ਹੀਰੋਇਨ ਸੁਖਮਣੀ ਕੌਰ ਹੈ ਬਾਕੀ ਦੇ ਕਲਾਕਾਰਾਂ ਵਿੱਚ ਪੰਜਾਬੀ ਸਿਨੇਮੇ ਦੇ ਕਈ ਨਾਮੀ ਅਦਾਕਾਰ ਸਵਿੰਦਰ ਮਾਹਲ, ਸੁਖਦੇਵ ਬਰਨਾਲਾ, ਐੱਨ ਐੱਸ ਸੰਧੂ,ਅਮਨ ਬੱਲ,
ਸੁਰਿੰਦਰ ਬਾਠ,ਅਮਨ ਸ਼ੇਰ ਸਿੰਘ,ਸੁਖਵਿੰਦਰ ਵਿਰਕ,ਵਿਕਾਸ ਨਵ,ਅਭਿਸ਼ੇਕ ਭਾਰਦਵਾਜ ,ਪ੍ਰਿਤਪਾਲ ਪਾਲੀ, ਡੋਲੀ ਸੰਦਲ, ਮੰਨਤ ਕੌਰ ਅਤੇ ਵਿਕਾਸ ਮਲਹੋਤਰਾ ਆਦਿ ਕਲਾਕਾਰਾਂ ਨੇ ਅਹਿਮ ਭੂਮਿਕਾਵਾਂ ਨਿਭਾਈਆਂ ਹਨ।ਫਿਲਮ ਦਾ ਸੰਗੀਤ ਅਜੌਕੇ ਮਾਹੌਲ ਵਿੱਚ ਚੰਗਾ ਮਨੋਰੰਜਨ ਕਰਨ ਵਾਲਾ ਹੈ ਜੋ ਗੁਰਮੀਤ ਸਿੰਘ ਜੱਸੀ ਐਕਸ ਅਤੇ ਗਗਨ ਵਡਾਲੀ ਨੇ ਦਿੱਤਾ ਹੈ। ਫਿਲਮ ਦੇ ਗੀਤ ਨਛੱਤਰ ਗਿੱਲ, ਗਗਨ ਵਡਾਲੀ, ਸਰਘੀ ਮਾਨ ਅਤੇ ਅਕਾਲ ਗਾਇਕਾਂ ਨੇ ਪਲੇ ਬੈਕ ਵਿੱਚ ਗਾਏ ਹਨ। 21 ਫਰਵਰੀ 2025 ਨੂੰ ਰਿਲੀਜ਼ ਹੋ ਰਹੀ ਆਮ ਫਿਲਮਾਂ ਤੋਂ ਬਹੁਤ ਹਟਵੇਂ ਵਿਸ਼ੇ ਦੀ ਇਹ ਫਿਲਮ ‘ਬੈਕ ਅੱਪ’ ਪੰਜਾਬੀ ਸਿਨਮੇ ਲਈ ਮੀਲ ਪੱਥਰ ਸਾਬਤ ਹੋਵੇਗੀ।
ਮੰਗਤ ਗਰਗ
ਫ਼ਿਲਮ ਪੱਤਰਕਾਰ
ਮੋਬਾਈਲ ਨੰਬਰ -98223-98202
