💥 ਸਵੈਗ 💥

*ਅਸੀਂ ਬੰਦੇ ਆਂ ਟਿਕਾਊ ਤੇ ਜਮੀਰ ਕਾਮਰੇਡ ਨੀ,
ਸਾਡੇ ਨਾਲ ਐਵੇਂ ਰਾਜਨੀਤੀਆਂ ਨਾ ਖੇਡ ਨੀ,
ਫਰੋਲ ਲਈ ਭਾਵੇਂ ਇਤਿਹਾਸ ਵਾਲੇ ਵਰਕੇ,
ਨਾਲੇ ਜਾਣ ਦੀ ਹਕੂਮਤੇ,ਤੂੰ ਸਾਡਾ ਏਂ ਸਵੈਗ ਨੀ-੨
ਸਾਡੇ ਬਾਰੇ ਦਿਲ ਵਿੱਚ ਰੱਖੀ ਨਾ ਭੁਲੇਖੇ,
ਸਦਾ ਜੰਗ ਦੇ ਮੈਦਾਨ ਵਿੱਚ ਖੜਦੇ ਰਹਾਂਗੇ,
ਜਦ-ਜਦ ਦਿੱਲੀਏ ਤੂੰ ਜ਼ੁਲਮ ਕਮਾਉਣਾ,
ਹਿੱਕਾਂ ਡਾਹ ਕੇ ਤੇਰੇ ਨਾਲ ਲੜਦੇ ਰਹਾਂਗੇ,
ਜਦ ਜਦ ਦਿੱਲੀਏ ਤੂੰ ……….

*ਹਨੇਰਿਆਂ ਦੇ ਨਾਲ ਸਾਡੀ ਮੁੱਢ ਤੋਂ ਲੜਾਈ,
ਅਸੀਂ ਚਾਨਣਾਂ ਨੂੰ ਰਹੇ ਸਦਾ ਟੋਲਦੇ,
ਅੱਖਾਂ ਵਿੱਚ ਅੱਖਾਂ ਪਾ ਕੇ ਗੱਲ ਕਰਦੇ ਹਾਂ,
ਉੰਝ ਘੱਟ ਹੀ ਜੁਬਾਨੋ ਅਸੀਂ ਬੋਲਦੇ-੨
ਨੇਰਿਆਂ ਨੇ ਜੋਰ ਲਾਇਆ,ਛਿਪ ਜਾਈਏ ਅਸੀਂ,
ਪਰ ਸੂਰਜਾਂ ਦੇ ਵਾਂਗ ਅਸੀਂ ਚੜਦੇ ਰਹਾਂਗੇ,
ਜਦ-ਜਦ ਦਿੱਲੀਏ ਤੂੰ ਜ਼ੁਲਮ ਕਮਾਉਣਾ…….

*ਜਿੰਨਾ ਚਿਰ ਕਿਰਤੀ ਦੀ ਲੁੱਟ ਹੁੰਦੀ ਰਹਿਣੀ,
ਖੂਨ ਉਨਾ ਚਿਰ ਰਹੂ ਸਾਡਾ ਖੌਲਦਾ,
ਕੋਈ ਭਗਤ-ਸਰਾਭਾ,ਕੋਈ ਗਦਰੀ ਬਾਬਾ,
ਰਹੂ ਜਿੰਦਾਬਾਦ ਉਨਾ ਚਿਰ ਬੋਲਦਾ-੨
ਮਦਨ ਲਾਲ ਢੀਂਗੜੇ,ਉਦਮ ਸਿੰਘ ਵਾਂਗੂੰ,
ਇਤਿਹਾਸ ਵਿੱਚ ਕੋਕੇ,ਅਸੀਂ ਜੜਦੇ ਰਹਾਂਗੇ,
ਜਦ-ਜਦ ਦਿੱਲੀਏ ਤੂੰ,ਜੁਲਮ ਕਮਾਉਣਾ……..

*ਸਾਡੀ ਹੱਕ-ਸੱਚ ਦੀ ਲੜਾਈ,ਸਾਰੀ ਜਾਣ ਦੀ ਖੁਦਾਈ,
ਕਦੇ ਜਾਲਮਾਂ ਦੇ ਕੋਲੋਂ, ਅਸੀਂ ਡਰੇ ਨਹੀਂ,
ਸਾਡਾ ਜਾਗਦਾ ਜ਼ਮੀਰ,ਸਾਡੀ ਵੱਖਰੀ ਤਾਸੀਰ,
ਤਾਂਹੀਓ ਮਰ ਕੇ ਵੀ,ਹਾਲੇ ਤੱਕ ਮਰੇ ਨਹੀਂ-੨
ਜਿੱਥੇ ਲੱਗਦੀ ਏ ਫੀਸ ਅਤੇ ਦੇਣਾ ਪੈਂਦਾ ਸੀਸ,
ਅਸੀਂ ਇਸ਼ਕ ਨਮਾਜ਼ਾਂ, ਉੱਥੇ ਪੜਦੇ ਰਹਾਂਗੇ,
ਜਦ-ਜਦ ਦਿੱਲੀਏ ਤੂੰ ਜੁਲਮ ਕਮਾਉਣ………

*ਜ਼ੁਲਮ ਨਹੀਂਓ ਰਹਿਣ ਦੇਣਾ ਧਰਤੀ ਦੇ ਉੱਤੇ,
ਪੂਰੇ ਕਰਨੇ ਸ਼ਹੀਦਾਂ ਵਾਲੇ ਖਾਬ ਨੇ,
ਸੂਹੀ ਸਜਰੀ ਸਵੇਰ ਕੁੱਲ ਦੁਨੀਆ ਤੇ ਆਊ ਜਦੋਂ,
ਫਿਰ ਪੈਰਾਂ ਵਿੱਚ ਡਿੱਗਣੇ ਨਵਾਬ ਨੇ-੨
ਚੇਤਨਾ ਦਾ ਤੇਲ ਪਾ ਕੇ,ਏਕੇ ਦੀ ਮਸ਼ਾਲ ਨਾਲ,
ਧੌਣ ਉੱਤੇ ਗੋਡਾ, ਤੇਰੇ ਧਰਦੇ ਰਹਾਂਗੇ,
ਜਦ-ਜਦ ਦਿੱਲੀਏ ਤੂੰ ਜੁਲਮ ਕਮਾਉਣਾ,
ਹਿੱਕਾਂ ਡਾਹ ਕੇ ਤੇਰੇ ਨਾਲ ਲੜਦੇ ਰਹਾਂਗੇ,
ਜਦ-ਜਦ ਦਿੱਲੀਏ ਤੂੰ………

💥 ਗੀਤ ਰਚਨਾ 💥
🌺 ਪਰਮਜੀਤ ਲਾਲੀ 🌺
☎️9896244038☎️