ਸਮਾਂ ਅਤੇ ਸਮੁੰਦਰ ਦੀਆਂ ਲਹਿਰਾਂ ਕਿਸੇ ਦੀ ਉਡੀਕ ਨਹੀਂ ਕਰਦੀਆਂ।ਪਲ ਪਲ ਬੀਤਦਾ ਸਮਾਂ ਆਪਣੇ ਪਿੱਛੇ ਕੌੜੀਆਂ ਮਿੱਠੀਆਂ ਯਾਦਾਂ ਛੱਡ ਜਾਂਦਾ ਹੈ ਜਿਨ੍ਹਾਂ ਨੂੰ ਭੁਲਾਉਣਾ ਮੁਸ਼ਿਕਲ ਹੀ ਨਹੀਂ ਸਗੋਂ ਬਹੁਤ ਔਖਾ ਹੋ ਜਾਂਦਾ ਹੈ।2025 ਵਿੱਚ ਬਾਲੀਵੁੱਡ ਅਤੇ ਪਾਲੀਵੁੱਡ ਦੇ ਅਜਿਹੇ ਬਹੁਤ ਮਸ਼ਹੂਰ ਅਦਾਕਾਰ ਅਤੇ ਗਾਇਕ ਇਸ ਦੁਨੀਆਂ ਨੂੰ ਸਦਾ ਲਈ ਅਲਵਿਦਾ ਕਹਿ ਗਏ ਜਿਨ੍ਹਾਂ ਬਾਰੇ ਯਾਦ ਕਰਕੇ ਇਹ ਯਕੀਂਨ ਕਰਨਾ ਵੀ ਮੁਸ਼ਿਕਲ ਹੋ ਰਿਹਾ ਹੈ ਕਿ ਉਹ ਦੁਨੀਆਂ ਵਿੱਚ ਨਹੀਂ ਰਹੇ।ਇਹ ਅਦਾਕਾਰ ਸ਼ਰੀਰਕ ਰੂਪ ਵਿੱਚ ਤਾਂ ਭਲਾ ਸਾਡੇ ਕੋਲ ਨਾ ਹੋਣ ਪ੍ਰੰਤੂ ਆਪਣੀ ਕਲਾ ਦੇ ਰੂਪ ਵਿੱਚ ਹਮੇਸ਼ਾ ਸਾਡੇ ਵਿਚਕਾਰ ਜਿਉਂਦੇ ਰਹਿਣਗੇ।
(1)- ਅਲਵਿਦਾ ਚਾਚਾ ਚਤਰਾ- ਆਪਣੀ ਕਾਮੇਡੀ ਨਾਲ ਪੰਜਾਬੀਆਂ ਦੇ ਨਾਲ ਨਾਲ ਪੂਰੇ ਸੰਸਾਰ ਵਿੱਚ ਚਾਚਾ ਚਤਰਾ ਦੇ ਨਾਂ ਨਾਲ ਜਾਣੇ ਜਾਂਦੇ ਜਸਵਿੰਦਰ ਭੱਲਾ ਦਾ ਜਨਮ 04 ਮਈ 1960 ਨੂੰ ਦੋਰਾਹਾ ਜ਼ਿਲ੍ਹਾ ਲੁਧਿਆਣਾ ਵਿਖੇ ਹੋਇਆ।1988 ਵਿੱਚ ਆਪਣੇ ਸਾਥੀ ਬਾਲ ਮੁਕੰਦ ਸ਼ਰਮਾ ਨਾਲ ਛਣਕਾਟਾ ਸ਼ੁਰੂ ਕਰਨ ਵਾਲੇ ਜਸਵਿੰਦਰ ਭੱਲਾ ਨੇ ਦੁੱਲਾ ਭੱਟੀ, ਮਾਹੌਲ ਠੀਕ ਹੈ,ਬਦਲਾ ਦਿ ਰਿਵੇਂਜ,ਜੱਟ ਐਂਡ ਜੂਲੀਅਟ,ਜਿੰਨੇ ਜੰਮੇ ਸਾਰੇ ਨਿਕੰਮੇ,ਵੇਖ ਬਰਾਤਾਂ ਚੱਲੀਆਂ, ਵਧਾਈਆਂ ਜੀ ਵਧਾਈਆਂ,ਜਿਹਨੇ ਮੇਰਾ ਦਿਲ ਲੁੱਟਿਆ,ਮਿਸਟਰ ਐਂਡ ਮਿਸਿਜ਼ 420 ਅਤੇ ਮਿਸਟਰ ਐਂਡ ਮਿਸਿਜ਼ 420 ਰਿਟਰਨ ਵਰਗੀਆਂ ਸੁਪਰਹਿੱਟ ਫ਼ਿਲਮਾਂ ਪੌਲੀਵੁੱਡ ਨੂੰ ਦਿੱਤੀਆਂ। ਉਹਨਾਂ ਦੇ ਡਾਇਲਾਗ ਦਰਸ਼ਕਾਂ ਦੇ ਅੱਜ ਵੀ ਮੂੰਹ ਚੜ੍ਹੇ ਹੋਏ ਹਨ ਜਿਵੇਂ ਢਿੱਲੋਂ ਨੇ ਕਾਲਾ ਕੋਟ ਐਂਵੇ ਨੀ ਪਾਇਆ,ਗੰਦੀ ਔਲਾਦ ਨਾ ਮਜ਼ਾ ਨਾ ਸਵਾਦ, ਜੇ ਚੰਡੀਗੜ੍ਹ ਢਹਿ ਜੂ ਪਿੰਡਾਂ ਜੋਗਾ ਤਾਂ ਰਹਿ ਜੂ ਜੇ ਪਿੰਡ ਹੀ ਢਹਿ ਜੂ ਤਾਂ ਪਿੱਛੇ ਕੀ ਰਹਿ ਜੂ, ਜੁੱਤੀ ਤੰਗ ਅਤੇ ਜਵਾਈ ਨੰਗ ਸਾਰੀ ਉਮਰ ਮੱਤ ਮਾਰੀ ਰੱਖਦੇ ਆ , ਇਹਨਾਂ ਡਾਇਲਾਗ ਨੂੰ ਜਦੋਂ ਵੀ ਸੁਣਦੇ ਆ ਤਾਂ ਅੱਜ਼ ਵੀ ਹੱਸ ਹੱਸ ਕੇ ਢਿੱਡੀਂ ਪੀੜਾਂ ਪੈ ਜਾਂਦੀਆਂ ਹਨ।ਆਪਣੀ ਅਦਾਕਾਰੀ ਨਾਲ ਦਰਸ਼ਕਾਂ ਦੇ ਦਿਲਾਂ ਵਿੱਚ ਛਾਪ ਛੱਡਣ ਵਾਲੇ ਚਾਚਾ ਚਤਰਾ 22 ਅਗਸਤ 2025 ਨੂੰ ਮੁਹਾਲੀ ਦੇ ਫੌਰਟਿਸ ਹਸਪਤਾਲ ਵਿੱਚ ਆਪਣੇ ਚਾਹੁਣ ਵਾਲਿਆਂ ਨੂੰ ਸਦਾ ਸਦਾ ਲਈ ਅਲਵਿਦਾ ਕਹਿ ਗਏ।
(2)- ਗਾਇਕ ਅਤੇ ਗੀਤਕਾਰ ਜੁਬਿਨ ਗਰਗ – ਯਾ ਅਲੀ, ਦਿਲ ਤੂੰ ਹੀ ਬਤਾ,ਝੂਮ ਬਰਾਬਰ ਝੂਮ ਅਤੇ ਖ਼ੁਦਾ ਜਾਣੇ ਵਰਗੇ ਗੀਤਾਂ ਨੂੰ ਆਵਾਜ਼ ਦੇਣ ਵਾਲੇ ਜੁਬਿਨ ਗਰਗ ਦਾ 19 ਸਤੰਬਰ ਨੂੰ ਸਿੰਘਾਪੁਰ ਵਿੱਚ ਦੇਹਾਂਤ ਹੋ ਗਏ।ਇੱਕ ਚੰਗੇ ਗਾਇਕ ਦੇ ਨਾਲ ਨਾਲ ਉਹ ਇੱਕ ਚੰਗੇ ਗੀਤਕਾਰ ਵੀ ਸਨ।
(3)- ਸੱਭਿਆਚਾਰ ਹੀਰਾ ਰਾਜਵੀਰ ਜਵੰਦਾ – ਸੱਭਿਆਚਾਰ ਅਤੇ ਪੰਜਾਬੀ ਬੋਲੀ ਦਾ ਉੱਭਰਦਾ ਗੀਤਕਾਰ ਅਤੇ ਅਦਾਕਾਰ ਰਾਜਵੀਰ ਜਵੰਦਾ ਇੱਕ ਸੜਕ ਹਾਦਸੇ ਦਾ ਸ਼ਿਕਾਰ ਹੋ ਕੇ 08 ਅਕਤੂਬਰ ਨੂੰ ਇਸ ਫ਼ਾਨੀ ਦੁਨੀਆਂ ਨੂੰ ਸਦਾ ਲਈ ਅਲਵਿਦਾ ਕਹਿ ਗਿਆ।ਉਸ ਦੀ ਸਮੁੱਚੀ ਗਾਇਕੀ ਪੰਜਾਬੀ ਸੱਭਿਆਚਾਰ ਨੂੰ ਸਮਰਪਿਤ ਰਹੀ।ਉਹ ਮਹੱਬਤ ਦਾ ਮੁੱਦਈ ਸੀ। ਧੀਆਂ, ਜੰਮੇ ਨਾਲ ਦੇ,ਸਕੂਨ,ਕਮਲਾ,ਕੰਗਣੀ,ਸਰਦਾਰੀ,ਮਿੱਤਰਾ ਨੇ ਦਿਲ ਮੰਗਿਆ, ਮਾਵਾਂ, ਪਟਿਆਲੇ ਵਾਲਾ ਅਤੇ ਜੋਗੀਆ,ਰੀਬੋਰਨ ਹੀਰ ਸਾਰੇ ਹੀ ਦਿਲ ਨੂੰ ਛੂੰਹਦੇ ਹਨ।ਮਿੰਦੋ ਤਹਿਸੀਲਦਾਰਣੀ,ਜਿੰਦ ਜਾਨ ਅਤੇ ਸੂਬੇਦਾਰ ਜੋਗਿੰਦਰ ਸਿੰਘ ਵਰਗੀਆਂ ਫਿਲਮਾਂ ਵਿੱਚ ਕੀਤੀ ਅਦਾਕਾਰੀ ਵੀ ਲਾਜਵਾਬ ਅਤੇ ਹਰ ਇੱਕ ਦੇ ਦਿਲ ਨੂੰ ਸਕੂਨ ਦੇਣ ਵਾਲੀ ਸੀ। ਛੋਟੀ ਉਮਰੇ ਹੀ ਇਸ ਦੁਨੀਆਂ ਤੋਂ ਰੁਖ਼ਸਤ ਹੋਣ ਵਾਲੇ ਰਾਜਵੀਰ ਜਵੰਦਾ ਦੀ ਜ਼ਿੰਦਗੀ ਉਭਰਦੇ ਕਲਾਕਾਰਾਂ ਨੂੰ ਇਹ ਸੰਦੇਸ਼ ਦੇਣ ਵਿੱਚ ਕਾਮਯਾਬ ਰਹੀ ਹੈ ਕਿ ਪ੍ਰਸਿੱਧੀ ਹਾਸਿਲ ਕਰਨ ਲਈ ਲੱਚਰਤਾ ਅਤੇ ਸ਼ੋਰ ਸ਼ਰਾਬੇ ਵਾਲੇ ਸੰਗੀਤ ਦੀ ਜ਼ਰੂਰਤ ਨਹੀਂ ਮਰਿਆਦਾ ਅਤੇ ਸੱਭਿਆਚਾਰ ਦਾ ਪੱਲਾ ਫੜ ਕੇ ਵੀ ਪ੍ਰਸਿੱਧੀ ਹਾਸਿਲ ਕੀਤੀ ਜਾ ਸਕਦੀ ਹੈ।
(4)- ਮਹਾਭਾਰਤ ਦਾ ਕਰਣ – ਦੂਰਦਰਸ਼ਨ ਦੇ ਪ੍ਰਸਿੱਧ ਸੀਰੀਅਲ ਮਹਾਂਭਾਰਤ ਵਿੱਚ ਕਰਣ ਦੀ ਭੂਮਿਕਾ ਨਿਭਾਉਣ ਵਾਲੇ ਪੰਕਜ਼ ਧੀਰ ਨੇ 15 ਅਕਤੂਬਰ ਨੂੰ ਆਖ਼ਰੀ ਸਾਂਹ ਲਏ। ਉਹਨਾਂ ਨੇ ਚੰਦਰਕਾਂਤਾ ਅਤੇ ਦੇਵੋਂ ਕੇ ਦੇਵ ਮਹਾਦੇਵ ਵਿੱਚ ਮਹੱਤਵਪੂਰਨ ਰੋਲ ਅਦਾ ਕੀਤਾ। ਉਹਨਾਂ ਨੇ ਬਾਦਸ਼ਾਹ, ਸੋਲਜਰ, ਟਾਰਜ਼ਨ ਦਿ ਵੰਡਰ ਕਾਰ ਅਤੇ ਸੜਕ ਵਰਗੀਆਂ ਹਿੱਟ ਫਿਲਮਾਂ ਕੀਤੀਆਂ।
(5)- ਭਾਰਤੀ ਬੌਡੀ ਬਿਲਡਰ ਅਤੇ ਐਕਟਰ ਵਰਿੰਦਰ ਸਿੰਘ ਘੁੰਮਣ -ਕਬੱਡੀ ਵਨਸ ਅਗੇਨ,ਟਾਈਗਰ -3 ਅਤੇ ਮਰਜਾਵਾ ਵਰਗੀਆਂ ਫਿਲਮਾਂ ਵਿੱਚ ਆਪਣੀ ਅਦਾਕਾਰੀ ਨਾਲ ਦਿਲ ਜਿੱਤਣ ਵਾਲੇ ਵਰਿੰਦਰ ਸਿੰਘ ਘੁੰਮਣ ਦਾ 09 ਅਕਤੂਬਰ ਨੂੰ ਸਰਜਰੀ ਦੌਰਾਨ ਦੇਹਾਂਤ ਹੋ ਗਿਆ।
(6)- ਅੰਗਰੇਜੋਂ ਕੇ ਜ਼ਮਾਨੇ ਕਾ ਜੇਲ੍ਹਰ – ਹਮ ਅੰਗਰੇਜੋਂ ਕੇ ਜ਼ਮਾਨੇ ਕੇ ਜੇਲ੍ਹਰ ਹੈ, 1975 ਵਿੱਚ ਰਿਲੀਜ਼ ਹੋਈ ਫ਼ਿਲਮ ਸ਼ੋਲੇ ਦੇ ਇਸ ਦਮਦਾਰ ਕਿਰਦਾਰ ਅਤੇ ਡਾਇਲਾਗ ਨੂੰ ਦਰਸ਼ਕਾਂ ਦੇ ਦਿਲਾਂ ਵਿੱਚ ਅਮਰ ਕਰਨ ਵਾਲੇ ਅਸਰਨੀ 20 ਅਕਤੂਬਰ ਨੂੰ ਸਦਾ ਸਦਾ ਲਈ ਇਸ ਦੁਨੀਆਂ ਤੋਂ ਰੁਖ਼ਸਤ ਹੋ ਗਏ।01 ਜੂਨ 1941 ਨੂੰ ਜੈਪੁਰ ਵਿੱਚ ਜਨਮੇ ਅਸਰਨੀ ਗੋਵਰਧਨ ਫਿਲਮਾਂ ਵਿੱਚ ਅਸਰਨੀ ਦੇ ਨਾਮ ਨਾਲ ਜਾਣੇ ਜਾਣ ਲੱਗੇ। ਉਹਨਾਂ ਨੇ 350 ਤੋਂ ਵੱਧ ਫਿਲਮਾਂ ਵਿੱਚ ਅਦਾਕਾਰੀ ਕੀਤੀ ਜਿਸ ਵਿੱਚ ਸ਼ੋਲੇ,ਸੀਤਾ ਔਰ ਗੀਤਾ, ਚੰਡਾਲ,ਨਮਕ ਹਰਾਮ, ਹਿੰਮਤਵਾਲਾ,ਧਮਾਲ,ਮੁਕੱਦਰ ਕਾ ਬਾਦਸ਼ਾਹ,ਦੁਲਹੇ ਰਾਜਾ,ਮਾਲਾਮਾਲ ਵੀਕਲੀ,ਆਜ ਕਾ ਅਰਜੁਨ ,ਖੱਟਾ ਮੀਠਾ,ਦੇ ਦਨਾ ਦਨ,ਭੂਲ ਭੁਲੱਈਆ ਆਦਿ ਸ਼ਾਮਿਲ ਹਨ।
(7)- ਅਦਾਕਾਰ ਸ਼ਤੀਸ਼ ਸ਼ਾਹ -25 ਜੂਨ 1951 ਨੂੰ ਮੁਬੰਈ ਵਿੱਚ ਜਨਮੇ ਸਤੀਸ਼ ਸ਼ਾਹ ਨੇ ਭੂਤਨਾਥ, ਫ਼ਿਰ ਵੀ ਦਿਲ ਹੈ ਹਿੰਦੁਸਤਾਨੀ,ਅਨਾਰੀ ਨੰ 1,ਓਮ ਸ਼ਾਂਤੀ ਓਮ,ਵੀਰਾਨਾ, ਮੁਝਸੇ ਸ਼ਾਦੀ ਕਰੋਗੀ,ਕਲ ਹੋ ਨਾ ਹੋ,ਪੁਰਾਣੀ ਹਵੇਲੀ,ਜੁੜਵਾ ਅਤੇ ਹਾਤਿਮ ਤਾਈ ਵਰਗੀਆਂ ਸੁਪ੍ਰਸਿੱਧ ਫਿਲਮਾਂ ਸ਼ਾਮਿਲ ਹਨ।ਇਸ ਹਾਸਰਸ ਕਲਾਕਾਰ ਨੇ 25 ਅਕਤੂਬਰ 2025 ਨੂੰ ਮੁਬੰਈ ਵਿੱਚ ਅੰਤਿਮ ਸਾਂਹ ਲਏ।
(8)- ਗਾਇਕਾ ਅਤੇ ਅਦਾਕਾਰਾ ਸੁਲੰਕਸ਼ਨਾ ਪੰਡਿਤ – 12 ਜੁਲਾਈ 1954 ਨੂੰ ਜਨਮੀ ਸੁਲੰਕਸ਼ਨਾ ਪੰਡਿਤ ਇੱਕ ਬਿਹਤਰੀਨ ਅਦਾਕਾਰਾ ਦੇ ਨਾਲ ਨਾਲ ਗਾਇਕਾ ਵੀ ਰਹੀ। ਉਸਨੇ ਵਕਤ ਕੀ ਦੀਵਾਰ,ਹੇਰਾ ਫ਼ੇਰੀ,ਗੋਰਾ, ਸੰਕੋਚ, ਫਾਂਸੀ,ਸਲਾਂਖੇ ਅਤੇ ਖ਼ਾਨਦਾਨ ਵਰਗੀਆਂ ਸੁਪਰ ਹਿੱਟ ਫਿਲਮਾਂ ਰਾਹੀਂ ਦਰਸ਼ਕਾਂ ਦੇ ਦਿਲਾਂ ਵਿੱਚ ਇੱਕ ਖ਼ਾਸ ਜਗ੍ਹਾ ਬਣਾਈ।06 ਨਵੰਬਰ 2025 ਨੂੰ 71 ਸਾਲਾਂ ਦੀ ਉਮਰ ਵਿੱਚ ਇਸ ਖੂਬਸੂਰਤ ਅਤੇ ਦਿਲਕਸ਼ ਅਦਾਕਾਰਾ ਨੇ ਮੁਬੰਈ ਵਿਚ ਆਖ਼ਰੀ ਸਾਂਹ ਲਏ।
(9)- ਗੀਤਕਾਰ ਨਿੰਮਾ ਲੌਹਾਰਕਾ – 24 ਮਾਰਚ 1977 ਨੂੰ ਪਿਤਾ ਦਰਸ਼ਨ ਸਿੰਘ ਅਤੇ ਮਾਤਾ ਦਲਵੀਰ ਕੌਰ ਦੇ ਘਰ ਅਮ੍ਰਤਿਸਰ ਦੀ ਅਜਨਾਲਾ ਤਹਿਸੀਲ ਦੇ ਲੌਹਾਰਕਾ ਪਿੰਡ ਵਿੱਚ ਜਨਮੇ ਨਿਰਮਨ ਸਿੰਘ ਨੂੰ ਨਿੰਮਾ ਲੌਹਾਰਕਾ ਦੇ ਨਾਂ ਨਾਲ ਜਾਣਿਆ ਜਾਂਦਾ ਹੈ। ਨਿੰਮਾ ਲੌਹਾਰਕਾ ਨੇ 500 ਤੋਂ ਜ਼ਿਆਦਾ ਗੀਤ ਲਿਖੇ ਜ਼ੋ 150 ਤੋਂ ਵੱਧ ਗੀਤਕਾਰਾਂ ਨੂੰ ਦਿੱਤੇ। ਉਹਨਾਂ ਦੇ ਹਿੱਟ ਗਾਇਕਾਂ ਵਿੱਚ ਦਿਲ ਦਿੱਤਾ ਨਈ ਸੀ ਠੋਕਰਾਂ ਖਵਾਉਣ ਵਾਸਤੇ,ਇੰਝ ਬਦਲੇ ਸੱਜਣ ਰਾਤੋਂ ਰਾਤ, ਕਚਹਿਰੀਆਂ ਚ ਮੇਲੇ ਲੱਗਦੇ,ਕੀ ਸਮਝਾਈਏ ਸੱਜਣਾ ਇਹਨਾਂ ਨੈਣ ਕਮਲਿਆਂ ਨੂੰ,ਤੂੰ ਤਾਂ ਸਾਹਾਂ ਤੋਂ ਵੀ ਪਿਆਰਾ,ਨਨਕਾਣੇ ਵੱਲ ਜਾਂਦੇ ਰਾਹੀਉ ਅਤੇ ਮੇਰਾ ਕੀ ਆ ਹਾਲ ਮੇਰੀ ਮਾਂ ਨੂੰ ਨਾ ਦੱਸਿਓ ਸ਼ਾਮਿਲ ਹਨ। ਗਾਇਕਾਂ ਨੂੰ ਬੁਲੰਦੀ ਤੇ ਪਹੁਚਾਉਣ ਵਾਲੇ ਗੀਤਕਾਰ ਨੂੰ ਅੰਤਿਮ ਸਮੇਂ ਇਹ ਸ਼ਿਕਵਾ ਰਿਹਾ ਕਿ ਸਮੇਂ ਦੇ ਬਦਲਣ ਨਾਲ ਕੋਈ ਉਸ ਦੇ ਗੀਤਾਂ ਦੀ ਕ਼ਦਰ ਨਹੀਂ ਕਰ ਰਿਹਾ। ਆਰਥਿਕ ਮੰਦਹਾਲੀ ਦਾ ਜੂਝਦਾ ਨਿੰਮਾ ਲੌਹਾਰਕਾ 15 ਨਵੰਬਰ (48) ਨੂੰ ਸਦਾ ਲਈ ਆਪਣੇ ਚਾਹੁਣ ਵਾਲਿਆਂ ਨੂੰ ਅਲਵਿਦਾ ਕਹਿ ਕੇ ਇਸ ਦੁਨੀਆਂ ਤੋਂ ਰੁਖ਼ਸਤ ਹੋ ਗਿਆ।
(10)- ਗਾਇਕ ਹਰਮਨ ਸਿੱਧੂ – ਪੇਪਰ ਯਾ ਪਿਆਰ(2007) ਲਾਡਲਾ (2009),ਕਿਊਟ ਜੱਟੀ(2023)ਮੁਲਤਾਨ ਵਰਸਜ ਰਸ਼ੀਆ (2023),ਤੇਰਾ ਮੇਰਾ ਕੀ ਮੁਕਾਬਲਾ, ਬੇਬੇ ਬਾਪੂ,PB 31 ਸੇਮ ਸੇਮ,(2023),ਚੰਨ(2024),ਮੇਲਾ,ਮੋਬਾਇਲ ਅਤੇ ਪੈ ਗਿਆ ਪਿਆਰ ਵਰਗੇ ਹਿੱਟ ਗਾਣਿਆਂ ਅਤੇ ਐਲਬਮਾਂ ਨੂੰ ਆਪਣੀ ਬੁਲੰਦ ਆਵਾਜ਼ ਦੇਣ ਵਾਲੇ ਹਰਮਨ ਸਿੱਧੂ ਦਾ 22 ਨਵੰਬਰ ਨੂੰ ਇੱਕ ਸੜਕ ਹਾਦਸੇ ਵਿੱਚ ਬੇਵਕਤੀ ਇਸ ਫ਼ਾਨੀ ਦੁਨੀਆਂ ਨੂੰ ਅਲਵਿਦਾ ਕਹਿ ਜਾਣਾ ਉਸ ਦੇ ਚਾਹੁਣ ਵਾਲਿਆਂ ਲਈ ਸਹਿਣ ਨਹੀਂ ਹੋ ਰਿਹਾ।ਮਾਨਸਾ ਦੇ ਖਿਆਲਾਂ ਕਲਾਂ ਵਿੱਚ ਜਨਮੇ ਹਰਮਨ ਸਿੱਧੂ ਨੇ ਆਪਣੀ ਗਾਇਕੀ ਰਾਹੀਂ ਕੁੱਝ ਹੀ ਸਮੇਂ ਵਿੱਚ ਆਪਣੀ ਕਾਬਲੀਅਤ ਨਾਲ ਸਮੇਂ ਦੇ ਚੋਟੀ ਦੇ ਗਾਇਕਾਂ ਵਿੱਚ ਆਪਣਾ ਨਾਮ ਦਰਜ਼ ਕਰਵਾਇਆ।ਉਸ ਨੇ ਹਜ਼ਾਰਾਂ ਲਾਈਵ ਸ਼ੋਅਜ਼ ਕੀਤੇ।ਉਸ ਨੇ ਮਿਸ ਪੂਜਾ ਅਤੇ ਗੁਰਲੇਜ਼ ਅਖ਼ਤਰ ਨਾਲ ਵੀ ਗੀਤ ਗਾਏ ਜਿਸ ਨੂੰ ਦਰਸ਼ਕਾਂ ਵੱਲੋਂ ਭਰਪੂਰ ਪਿਆਰ ਦਿੱਤਾ ਗਿਆ।ਬਚਪਨ ਤੋਂ ਹੀ ਸੰਗੀਤ ਦਾ ਸ਼ੌਕ ਰੱਖਣ ਵਾਲੇ ਹਰਮਨ ਲਈ ਸੰਗੀਤ ਹੀ ਅੱਗੇ ਜਾ ਕੇ ਕਰੀਅਰ ਅਤੇ ਰੂਹ ਦੀ ਖ਼ੁਰਾਕ ਬਣ ਗਿਆ। ਥੋੜੇ ਹੀ ਸਮੇਂ ਵਿੱਚ ਆਪਣੀ ਗਾਇਕੀ ਨਾਲ ਸਰੋਤਿਆਂ ਦੇ ਦਿਲਾਂ ਵਿੱਚ ਜਗ੍ਹਾ ਬਣਾਉਣ ਵਾਲੇ ਹਰਮਨ ਸਿੱਧੂ ਦਾ ਛੋਟੀ ਹੀ ਉਮਰ (37 ਸਾਲ) ਵਿੱਚ ਇਸ ਦੁਨੀਆਂ ਤੋਂ ਰੁਖ਼ਸਤ ਹੋ ਜਾਣਾ ਬਹੁਤ ਮੰਦਭਾਗਾ ਅਤੇ ਦਰਦਨਾਕ ਹੈ।
(11)- ਹੀ ਮੈਨ ਧਰਮਿੰਦਰ – 1935 ਵਿੱਚ ਜਨਮੇ ਧਰਮਿੰਦਰ ਉਰਫ਼ ਹੀ ਮੈਨ ਦੇ ਨਾਂ ਨਾਲ ਜਾਣੇ ਜਾਂਦੇ ਜੱਟ ਯਮਲਾ ਪਗਲਾ ਦੀਵਾਨਾ 89 ਸਾਲ ਦੀ ਉਮਰ ਵਿੱਚ ਆਖ਼ਰੀ ਸਾਂਹ ਲਏ।ਸੋਅਲੇ ਵਰਗੀਆਂ ਹਿੱਟ ਫਿਲਮਾਂ ਦੇਣ ਵਾਲੇ ਧਰਮਿੰਦਰ ਨੇ 300 ਤੋਂ ਵੱਧ ਫਿਲਮਾਂ ਵਿੱਚ ਕੰਮ ਕੀਤਾ ਜਿਸ ਵਿੱਚ ਚੁਪਕੇ ਚੁਪਕੇ, ਅਨੁਪਮਾ,,ਸੱਤਿਆਕਾਮ, ਸੀਤਾ ਔਰ ਗੀਤਾ, ਯਾਦੋਂ ਕੀ ਬਾਰਾਤ, ਪ੍ਰਤਿਗਿਆ,ਧਰਮ ਵੀਰ,ਕੁੰਦਨ,ਪੁਲਿਸ ਵਾਲਾ ਗੁੰਡਾ, ਅਪਨੇ,ਯਮਲਾ ਪਗਲਾ ਦੀਵਾਨਾ, ਲੋਹਾ ਅਤੇ ਤਹਿਲਕਾ ਵਰਗੀਆਂ ਸੁਪਰਹਿੱਟ ਫ਼ਿਲਮਾਂ ਸ਼ਾਮਿਲ ਹਨ।24 ਨਵੰਬਰ ਨੂੰ ਧਰਮਿੰਦਰ ਭਾਜੀ ਦੇ ਜਾਣ ਨਾਲ ਫ਼ਿਲਮੀ ਸਫ਼ਰ ਦੇ ਇੱਕ ਯੁੱਗ ਦਾ ਅੰਤ ਹੋ ਗਿਆ।
(12)- ਮਨੀ ਕੁਲਾਰ – ਅਕਾਲ, ਤਖਤਗੜ੍ਹ, ਉੜਤਾ ਪੰਜਾਬ,ਉੱਚਾ ਪਿੰਡ ਅਤੇ ਖ਼ਤਰੇ ਦਾ ਘੁੱਗੂ ਵਰਗੀਆਂ ਫਿਲਮਾਂ ਵਿੱਚ ਬਿਹਤਰੀਨ ਅਦਾਕਾਰੀ ਨਿਭਾਉਣ ਵਾਲਾ ਮਨੀ ਕੁਲਾਰ 03 ਦਸੰਬਰ ਨੂੰ ਅਚਾਨਕ ਇਸ ਦੁਨੀਆਂ ਤੋਂ ਰੁਖ਼ਸਤ ਹੋ ਗਿਆ,ਉਹ ਆਪਣੀ ਆਉਣ ਵਾਲੀ ਵੈੱਬ ਸੀਰੀਜ਼ ਤੂਤਾਂ ਵਾਲਾ ਖੂਹ ਦੀ ਸ਼ੂਟਿੰਗ ਕਰ ਰਿਹਾ ਸੀ।
ਰਜਵਿੰਦਰ ਪਾਲ ਸ਼ਰਮਾ
ਪਿੰਡ ਕਾਲਝਰਾਣੀ
ਡਾਕਖਾਨਾ ਚੱਕ ਅਤਰ ਸਿੰਘ ਵਾਲਾ
ਤਹਿ ਅਤੇ ਜ਼ਿਲ੍ਹਾ ਬਠਿੰਡਾ
7087367969
