💥 ਰਾਜਨੀਤੀ 💥

ਰਾਜਨੀਤੀ ਹੀ ਤੈਅ ਕਰਦੀ ਹੈ,
ਤੁਹਾਡੇ ਹਿੱਸੇ ਦੀ ਰੋਟੀ ਦਾ ਬਟਵਾਰਾ,
ਰਾਜਨੀਤੀ ਹੀ ਤੈਅ ਕਰਦੀ ਹੈ,
ਜਲ,ਜੰਗਲ ਤੇ ਜਮੀਨ ਦਾ ਬਟਵਾਰਾ,
ਰਾਜਨੀਤੀ ਹੀ ਤੈਅ ਕਰਦੀ ਹੈ,
ਅਮੀਰੀ ਤੇ ਗਰੀਬੀ ਦਾ ਪੈਮਾਨਾ,
ਰਾਜਨੀਤੀ ਹੀ ਤੈਅ ਕਰਦੀ ਹੈ,
ਤੁਹਾਨੂੰ ਮਿਲੇਗਾ ਰੱਜਵਾਂ ਟੁੱਕਰ ਜਾ
ਹੋਵੋਂਗੇ ਭੁੱਖਮਰੀ ਦਾ ਸ਼ਿਕਾਰ,
ਰਾਜਨੀਤੀ ਹੀ ਤੈਅ ਕਰਦੀ ਹੈ,
ਕਿਵੇਂ ਰੱਖਣਾ ਹੈ ਦਬੇ-ਕੁਚਲੇ ਤੇ
ਮਜ਼ਲੂਮ ਲੋਕਾਂ ਨੂੰ ਗੁਲਾਮ ਬਣਾ ਕੇ।

ਕਿਵੇਂ ਅੰਨਦਾਤਾ ਦੇ ਸਿਰ,
ਦੇ ਕੇ ਕਰਜ਼ੇ ਦੀ ਪੰਡ,
ਕਰਨੀ ਹੈ ਉਹਦੀ ਜ਼ਮੀਨ ਦੀ ਕੁਰਕੀ,
ਕਿਵੇਂ ਮਹਿੰਗਾਈ ਦਾ ਲਾ ਕੇ ਤੜਕਾ,
ਮਾਰਨਾ ਹੈ ਤੁਹਾਡੀ ਜੇਬ ਤੇ ਡਾਕਾ,
ਕਿਵੇਂ ਪਾੜੋ ਤੇ ਰਾਜ ਕਰੋ ਦੀ ਨੀਤੀ ਤਹਿਤ,
ਕੀਤਾ ਜਾਵੇਗਾ ਮਨੁੱਖਤਾ ਦਾ ਕਤਲੇਆਮ,
ਕਿਵੇਂ ਪਹੁੰਚਾਇਆ ਜਾਵੇਗਾ,
ਚਿੱਟਾ-ਸਮੈਕ ਤੇ ਹਰ ਪ੍ਰਕਾਰ ਦਾ ਨਸ਼ਾ,
ਤੁਹਾਡੀਆਂ ਆਉਣ ਵਾਲੀਆਂ,
ਨਸਲਾਂ ਦੀਆਂ ਰਗਾਂ ਚ,
ਕਿਵੇਂ ਮੌਤ ਦੇ ਮੂੰਹ ਵਿੱਚ,
ਚਲਿਆ ਜਾਵੇਗਾ ਆਮ ਇਨਸਾਨ,
ਬਿਨਾਂ ਇਲਾਜ ਤੋਂ ਤੜਫਦਾ ਹੋਇਆ।

ਕਿਵੇਂ ਦੇਸ਼ ਦੀ ਕੁਰਸੀ ਤੇ,
ਬਹਿ ਕੇ ਵੇਚਣਾ ਹੈ ਦੇਸ਼,
ਚੰਦ ਪੂੰਜੀਪਤੀ ਲੁਟੇਰਿਆਂ ਨੂੰ,
ਕਿਵੇਂ ਸੰਸਦ ਵਿੱਚ ਘੜਨੇ ਨੇ ਕਾਨੂੰਨ,
ਕਿਰਤੀਆਂ ਦੇ ਗਲ ਅੰਗੂਠਾ ਦੇਣ ਲਈ,
ਤੇ ਕਿਵੇਂ ਕੋਈ ਸਫੈਦਪੋਸ਼ ਮਾਰ ਜਾਵੇਗਾ,
ਅਰਬਾਂ ਖਰਬਾਂ ਦੀ ਠੱਗੀ,
ਰਾਜ ਸੱਤਾ ਨਾਲ ਘਿਉ ਖਿਚੜੀ ਹੋ ਕੇ।

ਇਸ ਲਈ ਭਾਵੇਂ ਤੁਸੀਂ ਰਾਜਨੀਤੀ ਵਿੱਚ,
ਦਖਲਅੰਦਾਜੀ ਨਹੀਂ ਕਰਦੇ,
ਪਰ ਰਾਜਨੀਤੀ ਤੁਹਾਡੀ ਜ਼ਿੰਦਗੀ ਚ,
ਦਖਲਅੰਦਾਜੀ ਜਰੂਰ ਕਰਦੀ ਹੈ,
ਰਾਜਨੀਤੀ ਬੁਰੀ ਚੀਜ਼ ਨਹੀਂ ਹੈ ਦੋਸਤ!
ਬਲਕਿ ਰਾਜਨੀਤੀ ਵਿੱਚ ਬੁਰੇ ਲੋਕਾਂ ਦੀ,
ਗਿਣਤੀ ਵਧਣ ਕਰਕੇ,
ਰਾਜਨੀਤੀ ਬੁਰੇ ਲੋਕਾਂ ਦੇ,
ਵੱਸ ਪੈ ਗਈ ਹੈ।
ਜੇਕਰ ਰਾਜਨੀਤੀ ਬੁਰੀ ਚੀਜ਼ ਹੁੰਦੀ ਤਾਂ,
ਸਰਮਾਏਦਾਰ ਲੋਕ ਇਹਨੂੰ ਕਦੇ,
ਹੱਥ ਵੀ ਨਾ ਲਾਉਂਦੇ।

ਜੇਕਰ ਫੇਰ ਵੀ ਤੁਸੀਂ ਕਹਿੰਦੇ ਹੋ,
ਕਿ ਤੁਹਾਡਾ ਰਾਜਨੀਤੀ ਨਾਲ,
ਕੋਈ ਲੈਣਾ ਦੇਣਾ ਨਹੀਂ,
ਤਾਂ ਮਾਫ ਕਰਨਾ ਤੁਸੀਂ ਆਪਣੇ,
ਹਿੱਸੇ ਦੀ ਲੜਾਈ ਤੋਂ ਮੁਨਕਰ ਹੋ,
ਜਾ ਤਾਂ ਹਾਲੇ ਤੁਹਾਡਾ ਬੌਧਿਕ ਪੱਖ ਕਮਜ਼ੋਰ ਹੈ,
ਜਾਂ ਫਿਰ ਤੁਹਾਨੂੰ,
ਕੋਈ ਮੂਰਖ ਬਣਾ ਰਿਹਾ ਹੈ,
ਆਪਣੀਆਂ ਰਾਜਨੀਤਿਕ ਰੋਟੀਆਂ ਸੇਕਣ ਲਈ,
ਤੇ ਤੁਸੀਂ ਉਹਦੇ ਇਸ਼ਾਰਿਆਂ ਤੇ ਨੱਚਣ ਵਾਲੀ,
ਕੱਠ ਪੁੱਤਲੀ ਤੋਂ ਜਿਆਦਾ ਕੁਝ ਵੀ ਨਹੀਂ,

ਜਰਾ ਸੋਚੋ!
ਜਦ ਹਵਾ-ਪਾਣੀ ਸੂਰਜ ਦੀ ਰੌਸ਼ਨੀ,
ਇੱਕ ਸਮਾਨ ਹੈ ਤਾਂ,
ਧਰਤੀ ਕਿਉਂ ਨਹੀਂ?
ਆਓ ਅਵਤਾਰਾਂ ਦੀ ਉਡੀਕ ਛੱਡ ਕੇ,
ਆਪਣੇ ਸ਼ਹੀਦਾਂ ਦੇ ਵਿਚਾਰਾਂ ਤੋ ਸੇਧ ਲੈ ਕੇ,
ਇੱਕਜੁੱਟ ਹੋ ਕੇ ਬਰਾਬਰਤਾ ਦਾ,
ਸਮਾਜ ਸਿਰਜਣ ਵਾਲੀ,
ਨਵੀਂ ਰਾਜਨੀਤੀ ਦਾ ਆਗਾਜ਼ ਕਰੀਏ.
✍️✍️✍️✍️✍️✍️✍️

💥 ਪਰਮਜੀਤ ਲਾਲੀ 💥
☎️98962-44038☎️