💥 ਕੀ ਹੋਇਆ 💥

*ਕੀ ਹੋਇਆ ਜੰਮੇ ਹਾਂ,ਅਸੀਂ ਘਰ ਗਰੀਬਾਂ ਦੇ,
ਅਸੀਂ ਖੋਲ ਤਾਂ ਸਕਦੇ ਹਾਂ,ਬੂਹੇ ਬੰਦ ਨਸੀਬਾਂ ਦੇ,
ਕੀ ਹੋਇਆ ਜੰਮੇ ਹਾਂ…………..

*ਜਦ ਹਵਾ,ਪਾਣੀ,ਸੂਰਜ ਤੇ ਅੰਬਰ ਸੱਭ ਸਾਂਝੇ ਨੇ,
ਫਿਰ ਧਰਤੀ ਤੇ ਲੱਖਾਂ ਲੋਕੀਂ,ਕਿਉਂ,ਰੋਟੀ ਤੋਂ ਵਾਂਝੇ ਨੇ -੨
ਕੁਦਰਤ ਤਾਂ ਘੜਦੀ ਏ,ਇੱਕੋ ਜਿਹੇ ਪੁਤਲੇ ਹਬੀਬਾਂ ਦੇ,
ਕੀ ਹੋਇਆ ਜੰਮੇ ਹਾਂ………

*ਅਸੀਂ ਲਿਖਣਾ-ਪੜ੍ਨਾ ਚਾਹੁੰਦੇ ਹਾਂ,ਕੁਝ ਬਣਨਾ ਚਾਹੁੰਦੇ ਹਾਂ,
ਉੱਚੇ ਅਹੁਦੇ ਤੇ ਰੁਤਬਿਆਂ ਨੂੰ,ਹਾਸਲ ਕਰਨਾ ਚਾਹੁੰਦੇ ਹਾਂ-੨
ਖੌਰੇ ਕਦੋਂ ਪੈਣੇ ਨੇ ਮੁੱਲ ਸਾਡੀਆਂ ਰੀਝਾਂ ਦੇ,

*ਸਾਡੀ ਗਰੀਬੀ ਦੂਰ ਹੋਵੇ,ਇਹ ਹਾਕਮ ਚਾਹੁੰਦਾ ਨਹੀਂ,
ਤਾਂ ਹੀ ਜਮੀਨਾ ਵੰਡਣ ਲਈ,ਹੱਦ ਬੰਦੀ ਬਣਾਉਂਦਾ ਨਹੀਂ -੨
ਰਹੇ ਜਾਲ ਚ ਫਸਦੇ ਸਦਾ,ਅਸੀਂ ਆਪਣੇ ਰਕੀਬਾਂ ਦੇ,
ਕੀ ਹੋਇਆ ਜੰਮੇ ਹਾਂ……..

*ਸਾਡੇ ਹਿੱਸੇ ਦੀ ਧਰਤੀ ਤੇ,ਕਬਜ਼ੇ ਨੇ ਧੰਨਵਾਨਾਂ ਦੇ,
ਉਹ ਆਨੰਦ ਮਾਣਦੇ ਨੇ, ਮਹਿੰਗੇ ਪਕਵਾਨਾਂ ਦੇ-੨
ਸਦਾ ਘਾਟੇ ਰਹਿੰਦੇ ਨੇ, ਸਾਡੇ ਘਰ ਚੀਜ਼ਾਂ ਦੇ,
ਕੀ ਹੋਇਆ……..

*ਸਦੀਆਂ ਤੋਂ ਮਾਰਦੇ ਰਹੇ,ਸਾਡੀ ਕਿਰਤ ਤੇ ਡਾਕੇ ਹੋਂ,
ਜੇ ਹੱਕ ਆਪਣਾ ਮੰਗ ਲਈਏ,ਹੁੰਦੇ ਕਿਉਂ ਲੋਹੇ ਲਾਖੇ ਹੋਂ-੨
ਸਾਨੂੰ ਡਰ ਦਿਖਾਵੋ ਤੁਸੀਂ,ਬੰਬ,ਬੰਦੂਕ,ਸਲੀਬਾਂ ਦੇ,
ਕੀ ਹੋਇਆ ਜੰਮੇ ਹਾਂ……..

*ਅਸੀਂ ਰਲ ਕੇ ਕਿਰਤੀਆਂ ਨੇ,ਜਦ ਹੱਲਾ ਬੋਲ ਦਿੱਤਾ,
ਥੋਡੇ ਤਖਤਾਂ ਤੇ ਤਾਜਾਂ ਨੂੰ,ਮਿੱਟੀ ਵਿੱਚ ਰੋਲ ਦਿੱਤਾ -੨
ਫਿਰ ਬਾਗੀ ਕਹਿ ਕੇ ਭੰਡੋਗੇ,ਜੇ ਚੇਤੇ ਭੁੱਲ ਗਏ ਤਮੀਜਾਂ ਦੇ,
ਕੀ ਹੋਇਆ ਜੰਮੇ ਹਾਂ,ਅਸੀਂ ਘਰ ਗਰੀਬਾਂ ਦੇ,
ਅਸੀਂ ਖੋਲ ਤਾਂ ਸਕਦੇ ਹਾਂ,ਬੂਹੇ ਬੰਦ ਨਸੀਬਾਂ ਦੇ……..

ਹਬੀਬ (ਆਪਣਾ ਪਿਆਰਾ)
ਰਕੀਬ (ਦੁਸ਼ਮਨ)

🌹 ਪਰਮਜੀਤ ਲਾਲੀ 🌹
☎️98962-44038☎️