🌼 ਕੁਦਰਤ ਬੜੀ ਮਹਾਨ 🌼

ਜਦ ਹਵਾ,ਪਾਣੀ,ਰੌਸ਼ਨੀ ਸੂਰਜਾਂ,
ਸਭ ਕੁਝ ਇੱਕ ਸਮਾਨ,
ਫਿਰ ਧਰਤੀ ਉੱਤੇ ਕਾਸਤੋਂ,
ਵੰਡੀਆਂ ਪਾ ਕੇ ਬੈਠਾ ਇਨਸਾਨ,

ਸੂਰਜ ਦੇ ਗੋਲੇ ਤੋਂ ਟੁੱਟ ਕੇ,
ਇਹ ਬਣਿਆ ਕੁੱਲ ਜਹਾਨ,
ਲੱਖਾਂ ਸਾਲ ਸੰਘਰਸ਼ ਸੀ ਚਲਿਆ,
ਬੰਦੇ ਤੇ ਕੁਦਰਤ ਦਰਮਿਆਨ,

ਪਹਿਲਾਂ ਪਾਣੀ ਬਣ ਗਿਆ,
ਫਿਰ ਨਦੀਆਂ,ਨਾਲ਼ੇ ਅਤੇ ਚਟਾਨ,
ਜੀਵ-ਜੰਤ ਤੇ ਬਨਸਪਤੀ,
ਸਭ ਕੁਦਰਤ ਦੇ ਵਰਦਾਨ,

ਜਦ ਜੰਗਲ ਦੇ ਵਿੱਚ ਸੀ ਰਹਿਵੰਦਾ,
ਬਣਾਏ ਭਾਲੇ,ਤੀਰ,ਕਮਾਨ,
ਅੱਜ ਸਾਇੰਸ ਤਰੱਕੀ ਕਰ ਗਈ,
ਭਰੇ ਅੰਬਰਾਂ ਵਿੱਚ ਉਡਾਨ,

ਸਭ ਤੋਂ ਪਹਿਲਾਂ ਧਰਤ ਤੇ,
ਜਿਸ ਨੇ ਖੋਲੀ ਜੁਬਾਨ,
ਸਭ ਤੋਂ ਪਹਿਲਾ ਵੰਡਿਆ,
ਉਸ ਨੇ ਅੱਖਰ ਗਿਆਨ,

ਕਰਕੇ ਸਭ ਤੋਂ ਪਹਿਲਾਂ ਲੁੱਟ ਕਿਰਤ ਦੀ,
ਜੋ ਬਣ ਬੈਠਾ ਬੇਈਮਾਨ,
ਉਸਨੇ ਹੀ ਕੀਤਾ ਮਨੁੱਖਤਾ ਦਾ,
ਸਭ ਤੋਂ ਵੱਡਾ ਨੁਕਸਾਨ,

ਜਦ ਬੱਦਲ ਵਰਦੇ ਧਰਤ ਤੇ,
ਤੇ ਆਉਂਦਾ ਜਦੋਂ ਤੂਫਾਨ,
ਕੋਈ ਮਹਿਲ ਨਾ ਝੁੱਗੀਆਂ ਵੇਖਦਾ,
ਹੁੰਦਾ ਇੱਕੋ ਜਿਹਾ ਨੁਕਸਾਨ,

ਬੰਦੇ ਨੇ ਆਪੇ ਘੜ ਲਏ,
ਮਜਹਬ ਅਤੇ ਇਮਾਨ,
ਕਿਧਰੇ ਬਾਈਬਲ ਲਿਖ ਲਈ,
ਕਿਧਰੇ ਗੀਤਾ ਅਤੇ ਕੁਰਾਨ,

ਰੱਬ ਨਾ ਪਾਇਆ ਕਾਜੀਆਂ,
ਪੰਡਿਤ-ਮੁੱਲਾਂ-ਚਤੁਰ ਸੁਜਾਨ,
ਵੱਖਰੀ-ਵੱਖਰੀ ਖੋਲ ਕੇ,
ਬੈਠੇ ਸਭ ਦੁਕਾਨ,

ਕਾਦਰ-ਕੁਦਰਤ,ਖਲਕਤਾਂ,
ਜਾਵਾਂ ਮੈਂ ਕੁਰਬਾਨ,
ਨਾਲ ਕਲਮ ਨਹੀਂ ਲਿਖ ਹੋਵਣਾ,
ਕੁਦਰਤ ਦਾ ਗੁਣਗਾਨ,

ਜਿੰਨਾ ਨਾਮ ਕਮਾਵਣਾ,
ਉਹ ਕਰਦੇ ਕੰਮ ਮਹਾਨ,
ਹੁੰਦੇ ਨੇ ਜੋ ਆਲਸੀ,
ਉਹ ਸੌਂਦੇ ਲੰਮੀਆਂ ਤਾਨ,

ਸਾਰੀ ਉਮਰ ਨਾ ਪੂਰੇ ਹੋਂਵਦੇ,
ਬੰਦੇ ਦੇ ਅਰਮਾਨ,
ਦਾਤਾਂ ਦਿੰਦੀ ਨਾ ਥੱਕਦੀ,
ਇਹ ਕੁਦਰਤ ਬੜੀ ਮਹਾਨ,
ਇਹ ਕੁਦਰਤ ਬੜੀ ਮਹਾਨ…………

🌺 ਪਰਮਜੀਤ ਲਾਲੀ 🌺
☎️ 9896244038☎️