ਫਰੀਦਕੋਟ, 28 ਸਤੰਬਰ (ਧਰਮ ਪ੍ਰਵਾਨਾਂ /ਵਰਲਡ ਪੰਜਾਬੀ ਟਾਈਮਜ਼)
ਆਮ ਆਦਮੀ ਪਾਰਟੀ ਫਰੀਦਕੋਟ ਦੇ ਸੀਨੀਅਰ ਲੀਡਰ ਅਤੇ ਸੋਸ਼ਲ ਵਰਕਰ ਅਰਸ਼ ਸੱਚਰ ਨੇ ਅੱਜ ਆਪਣੀ ਟੀਮ ਨਾਲ ਮਿਲ ਕੇ ਫਿਰੋਜ਼ਪੁਰ ਜ਼ਿਲ੍ਹੇ ਦੇ ਪਾਣੀ ਦੇ ਕਹਿਰ ਨਾਲ ਪ੍ਰਭਾਵਿਤ ਪਿੰਡਾਂ ਦਾ ਦੌਰਾ ਕੀਤਾ। ਫਿਰੋਜ਼ਪੁਰ ਬਾਰਡਰ ਇਲਾਕੇ ਨੇੜਲੇ ਕਈ ਪਿੰਡਾਂ ਵਿੱਚ ਜਾ ਕੇ ਉਨ੍ਹਾਂ ਨੇ ਪੀੜਤ ਪਰਿਵਾਰਾਂ ਨਾਲ ਹਾਲ-ਚਾਲ ਪੁੱਛਿਆ ਅਤੇ ਲੋਕਾਂ ਦੀਆਂ ਮੁਸ਼ਕਲਾਂ ਨੂੰ ਸੁਣਿਆ। ਇਸ ਦੌਰਾਨ ਸਿਹਤ ਸੰਬੰਧੀ ਜ਼ਰੂਰੀ ਮੈਡੀਕਲ ਕਿਟਾਂ ਵੰਡੀਆਂ ਗਈਆਂ।
ਇਨ੍ਹਾਂ ਮੈਡੀਕਲ ਕਿਟਾਂ ਵਿੱਚ ਲੋਕਾਂ ਦੀ ਰੋਜ਼ਮਰਾ ਦੀ ਲੋੜ ਅਨੁਸਾਰ ਐਸਿਡਿਟੀ ਕੈਪਸੂਲ, ਪੈਰਾਸੀਟਾਮੋਲ, ਨਿਮਸੁਲਾਈਡ, ਇਮਿਊਨਿਟੀ ਬੂਸਟਰ, ਕੈਲਸ਼ੀਅਮ, ਮਲਟੀਵਿਟਾਮਿਨ, ਪਲੇਟਲੈੱਟ ਬੂਸਟਰ, ਜੋੜ ਦਰਦ ਦੀ ਦਵਾ ਅਤੇ ਸੈਨਿਟਰੀ ਪੈਡ ਸ਼ਾਮਲ ਸਨ।
ਅਰਸ਼ ਸੱਚਰ ਨੇ ਕਿਹਾ ਕਿ ਲੋਕਾਂ ਦੀ ਸੇਵਾ ਕਰਨਾ ਅਤੇ ਮੁਸੀਬਤ ਦੇ ਸਮੇਂ ਉਨ੍ਹਾਂ ਦਾ ਸਾਥ ਦੇਣਾ ਹੀ ਸਾਡੀ ਅਸਲੀ ਜ਼ਿੰਮੇਵਾਰੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਪਾਣੀ ਦੇ ਕਹਿਰ ਨਾਲ ਪ੍ਰਭਾਵਿਤ ਪਰਿਵਾਰਾਂ ਨੂੰ ਸਹਾਇਤਾ ਪਹੁੰਚਾਉਣਾ ਸਿਰਫ਼ ਫਰਜ ਹੀ ਨਹੀਂ, ਸਗੋਂ ਇੱਕ ਸਮਾਜਿਕ ਜ਼ਿੰਮੇਵਾਰੀ ਹੈ। ਅਰਸ਼ ਸੱਚਰ ਨੇ ਯਕੀਨ ਦਿਵਾਇਆ ਕਿ ਆਉਣ ਵਾਲੇ ਦਿਨਾਂ ਵਿੱਚ ਹੋਰ ਪਿੰਡਾਂ ਵਿੱਚ ਵੀ ਇਹ ਸੇਵਾ ਜਾਰੀ ਰੱਖੀ ਜਾਵੇਗੀ ਤਾਂ ਜੋ ਕਿਸੇ ਵੀ ਪਰਿਵਾਰ ਨੂੰ ਬਿਨਾਂ ਮਦਦ ਤੋਂ ਵਾਂਝਾ ਨਾ ਰਹਿਣਾ ਪਵੇ।
ਇਸ ਮੁਹਿੰਮ ਵਿੱਚ ਟੀਮ ਮੈਂਬਰ ਤੇਜਬੀਰ ਮਾਨ, ਡਾ. ਵਿਸ਼ਾਲ, ਪ੍ਰੀਤ, ਪੁਸ਼ਮੀਤ ਬਰਾੜ, ਗੁਰਪ੍ਰੀਤ ਸਾਦਿਕ, ਰਾਕੇਸ਼ ਕੁਮਾਰ, ਹਰਵਿੰਦਰ ਸਾਈ ਅਤੇ ਕਪਿਲ ਅੱਗਰਵਾਲ ਨੇ ਭਾਗ ਲਿਆ।
