ਰਣਬੀਰ ਸਿੰਘ ਪ੍ਰਿੰਸ ਜੀ ਦੀ ਤੋਪਿਆਂ ਵਾਲੀ ਕਮੀਜ਼ ਕਿਤਾਬ ਸਿਰਫ਼ ਇੱਕ ਕਿਤਾਬ ਹੀ ਨਹੀਂ ਹੈ, ਇਸ ਵਿੱਚ ਉਹਨਾਂ ਨੇ ਆਪਣੇ ਦਿਲ ਦੇ ਅਹਿਸਾਸ ਪੇਸ਼ ਕੀਤੇ ਹਨ। ਤੋਪਿਆਂ ਵਾਲੀ ਕਮੀਜ਼ ਦੇ ਇੱਕ-ਇੱਕ ਤੋਪੇ ਨੂੰ ਜ਼ਿੰਦਗੀ ਦੀ ਤਾਕਤ ਬਣਾਇਆ ਹੈ। ਹਾਲਾਤਾਂ ਦਾ ਡੱਟ ਕੇ ਮੁਕਾਬਲਾ ਕੀਤਾ ਅਤੇ ਹਾਲਾਤਾਂ ਦੀ ਭੱਠੀ ਵਿੱਚ ਢਲ ਕੇ ਸੋਨਾ ਬਣ ਕੇ ਨਿਖਰੇ ਹਨ। ਇਸ ਕਿਤਾਬ ਵਿੱਚ ਮਾਂ ਦੀਆਂ ਦਿੱਤੀਆਂ ਸਿੱਖਿਆਵਾਂ ਨੂੰ ਬਾਖ਼ੂਬੀ ਚਿਤਰਿਆ ਹੈ ਅਤੇ ਉਹਨਾਂ ਉੱਪਰ ਖ਼ਰੇ ਵੀ ਉਤਰੇ ਹਨ। ਜ਼ਿੰਦਗੀ ਦੇ ਉਤਰਾਵਾਂ ਚੜਾਵਾਂ ਨੂੰ ਸਹਿੰਦੇ ਹਿੰਮਤ ਅਤੇ ਮਿਹਨਤ ਤੋਂ ਕੰਮ ਲੈਂਦੇ ਹੋਏ ਜ਼ਿੰਦਗੀ ਦੀਆਂ ਔਖਿਆਈਆਂ ਨੂੰ ਝੱਲਦਿਆਂ ਕਾਮਯਾਬੀ ਹਾਸਲ ਕੀਤੀ ਹੈ।
ਇਹ ਬਹੁਤ ਹੀ ਵਧੀਆ ਕਹਾਣੀ ਸੰਗ੍ਰਹਿ ਹੈ। ਪਹਿਲੀ ਹੀ ਕਹਾਣੀ ਚੰਗੇ ਕਰਮਾਂ ਵੱਲ ਲਿਜਾਂਦੀ ਹੈ। ਕਲੀਆਂ ਵਾਲੀ ਫ਼ਰਾਕ ਵਿੱਚ ਅੱਜ ਵੀ ਕੁੜੀਆਂ ਨਾਲ਼ ਹੁੰਦੇ ਵਿਤਕਰੇ ਦਾ ਵਰਣਨ ਕੀਤਾ ਹੈ। ਨੌਕਰੀ ਦੇ ਸ਼ੁਰੂਆਤੀ ਦੌਰ ਵਿੱਚ ਆਪਣੇ ਹੀ ਸਾਥੀਆਂ ਵੱਲੋਂ ਗੱਲਾਂ ਨੂੰ ਸਹਿਣਾ ਅਤੇ ਫਿਰ ਮਿਹਨਤ ਦੇ ਨਾਲ਼ ਜਵਾਬ ਦੇਣਾ ਪ੍ਰਿੰਸ ਜੀ ਨੂੰ ਬਾਖ਼ੂਬੀ ਆਉਂਦਾ ਹੈ। ਜੜ੍ਹਾਂ ਕਹਾਣੀਆਂ ਵਿੱਚ ਆਪਣੀਆਂ ਜੜ੍ਹਾਂ ਦੀ ਪਰੋੜਤਾ ਕੀਤੀ ਹੈ। ਚਾਬੀਆਂ ਵਾਲ਼ੀ ਫ਼ਰਾਕ ਤਾਂ ਕਮਾਲ ਦੀ ਕਹਾਣੀ ਹੈ। ਕੁੜੀਆਂ ਨੂੰ ਅੱਗੇ ਪੜ੍ਹਾਉਣ ਲਈ ਅਤੇ ਉਹਨਾਂ ਦਾ ਸਾਥ ਦੇਣ ਲਈ ਹਿੰਮਤ ਦਿੰਦੀ ਖੂਬਸੂਰਤ ਕਹਾਣੀ ਹੈ।
ਜ਼ਿੰਦਗੀ ਦੇ ਸਾਰੇ ਪਹਿਲੂਆਂ ਨੂੰ ਛੂੰਹਦੇ ਹੋਏ ਨਿਰੰਤਰ ਕੋਸ਼ਸ਼ਾਂ ਕਰਦਿਆਂ ਕਦੇ.. ਉੱਚਾ ਬੋਲ ਨਾ ਬੋਲਣ ਲਈ ਵੀ ਕਹਿੰਦੇ ਹਨ। ਮੋਹ ਦੀਆਂ ਤੰਦਾਂ ਅਤੇ ਸਾਂਝ ਕਹਾਣੀਆਂ ਵਿੱਚ ਰੂਹਾਂ ਦੇ ਰਿਸ਼ਤਿਆਂ ਦੀ ਪ੍ਰੋੜਤਾ ਕਰਦੇ ਹਨ। ਤੋਪਿਆਂ ਵਾਲ਼ੀ ਕਮੀਜ਼ ਦੇ ਬਦਲੇ ‘ਚ ਮਿਲੀਆਂ ਕਮੀਜ਼ਾਂ ਦਾ ਪ੍ਰਿੰਸ ਅੱਜ ਵੀ ਮੁੱਲ ਮੋੜ ਰਿਹਾ। ਕਿਸਾਨ ਸ਼ੇਰ ਅਤੇ ਲੰਗੜੀ ਗਾਂ ,ਕਾਂ ਘੁੱਗੀ ਦਾ ਵਿਸ਼ਵਾਸ, ਰੁੱਖ ਗਾਲ੍ਹੜ ਤੇ ਤੋਤਾ ਵਰਗੀਆਂ ਕਹਾਣੀਆਂ ਸਾਨੂੰ ਸਾਡੇ ਪੁਰਾਤਨ ਵਿਰਸੇ ਨਾਲ਼ ਜੋੜਦੀਆਂ ਹਨ। ਦੋਸਤੀ ਦੀ ਮਹਿਕ ਵੰਡਦੀ ਜ਼ਿੰਦਗੀ ਅੱਜ ਵੀ ਕਿਤਾਬਾਂ ਦੇ ਚਾਰ ਹਿੱਸੇ ਕਰਕੇ ਵੀ ਇੱਕ ਹੈ। ਭੁੱਖ ਕਹਾਣੀ ਰੂਹਾਂ ਦੇ ਭੁੱਖਿਆਂ ਦੀ ਗੱਲ ਕਰਦੀ ਹੈ। ਸੁੰਨੇ ਗੁੱਟ ਦੀ ਰੱਖੜੀ ਭੈਣ ਭਰਾ ਦੇ ਪਿਆਰ ਦਾ ਸੁਨੇਹਾ ਦਿੰਦੀ ਅਤੇ ਕਦੇ ਵੀ ਭੈਣ-ਭਰਾ ਨੂੰ ਇੱਕ ਦੂਜੇ ਤੋਂ ਦੂਰ ਨਾ ਕਰਨ ਦਾ ਸੁਨੇਹਾ ਵੀ ਦਿੰਦੀ ਹੈ।
ਮਿਹਨਤ ਦਾ ਮੁੱਲ ਸੱਚਮੁੱਚ ਪੈਦਾ ਹੈ ਅਤੇ ਰਣਬੀਰ ਪ੍ਰਿੰਸ ਜੀ ਦੀ ਮਿਹਨਤ ਦਾ ਮੁੱਲ ਵੀ ਪਿਆ ਹੈ। ਜ਼ਿੰਦਗੀ ਵਿੱਚ ਕਿਸੇ ਦੀ ਕੀਤੀ ਥੋੜ੍ਹੀ ਜਿਨੀ ਸੇਵਾ ਦਾ ਫ਼ਲ ਵੀ ਕਈ ਵਾਰ ਬਹੁਤ ਜ਼ਿਆਦਾ ਹੋ ਕੇ ਮਿਲਦਾ ਹੈ।
ਡੇਢ ਅੱਖਾਂ ਅਤੇ ਪਾਟੀ ਪੈਂਟ ਕਹਾਣੀ ਸ਼ਬਦਾਂ ਨੂੰ ਸੰਭਾਲ ਕੇ ਬੋਲਣ ਲਈ ਪ੍ਰੇਰਤ ਕਰਦੀ ਹੈ। ਦਰਦ ਦੇ ਅਹਿਸਾਸ ਨੂੰ ਸਹਿਜੇ ਹੀ ਸਮਝਿਆ ਜਾ ਸਕਦਾ ਹੈ। ਚੰਗੇ ਸ਼ਬਦ ਇਨਸਾਨ ਦੀ ਜ਼ਿੰਦਗੀ ਨੂੰ ਬਦਲ ਦਿੰਦੇ ਹਨ ਅਤੇ ਮਾੜੇ ਸ਼ਬਦ ਚੰਗੀ ਜ਼ਿੰਦਗੀ ਨੂੰ ਵੀ ਤਬਾਹ ਕਰ ਦਿੰਦੇ ਹਨ। ਰਾਜ਼ੀਨਾਮਾ ਕਹਾਣੀ ਦੱਸਦੀ ਹੈ ਕਿ ਅੱਜ ਵੀ ਸਮਾਜ ਵਿੱਚ ਅਜਿਹੇ ਲੋਕ ਹਨ ਜੋ ਬੇਕਸੂਰਿਆਂ ਨੂੰ ਸਜ਼ਾਵਾਂ ਦਿੰਦੇ ਹਨ। ਪਰ ਜਦੋਂ ਆਪਣੇ ਨਾਲ਼ ਉਹੀ ਹਾਲਾਤ ਪੈਦਾ ਹੁੰਦੇ ਹਨ, ਤਾਂ ਫਿਰ ਦੁੱਖ ਦਾ ਅਹਿਸਾਸ ਹੁੰਦਾ ਹੈ।
ਬੇਗਾਨੀ ਝਾਕ ਕਹਾਣੀ ਵਿੱਚ ਪੜ੍ਹਾਈ ਦੀ ਮਹਾਨਤਾ ਨੂੰ ਦੱਸਿਆ ਹੈ। ਬੇਗਾਨੇ ਬੋਹੜ ਦੀ ਛਾਂ ਕਹਾਣੀ ਜਿੰਦਾਂ ਦਿਲੀ ਦੀ ਮਿਸਾਲ ਹੈ। ਖਰਚੇ ‘ਤੇ ਪਰਚੇ ਕਹਾਣੀ ਅੱਜ ਦੇ ਸਮਾਜ ਦੇ ਨੌਜਵਾਨਾਂ ਦੀ ਹੂੜ ਮੱਤ ਦਰਸਾਉਂਦੀ ਹੈ। ਸੂਰਤ ਸੀਰਤ ਕਹਾਣੀ ਦੱਸਦੀ ਹੈ ਕਿ ਸੀਰਤ ਵਧੀਆ ਹੋਣੀ ਚਾਹੀਦੀ ਹੈ। ਅਖ਼ੀਰਲੀ ਕਹਾਣੀ ਮੌਕੇ ‘ਤੇ ਚੌਕਾ ਬੇਹੱਦ ਖ਼ੂਬਸੂਰਤ ਅਤੇ ਪਿਆਰੀ ਜਿਹੀ ਕਹਾਣੀ ਹੈ। ਬੱਚਿਆਂ ਦੇ ਭੋਲੇਪਨ ਨੂੰ ਵੇਖ ਕੇ ਸਾਰੇ ਖੁਸ਼ ਹੁੰਦੇ ਹਨ।
ਤਕਰੀਬਨ ਹਰ ਕਹਾਣੀ ਵਿੱਚ ਲੋਕ ਮੁਹਾਵਰਿਆਂ ਜਾਂ ਅਖਾਣਾਂ ਦੀ ਵਰਤੋਂ ਕੀਤੀ ਗਈ ਹੈ, ਜਿਸ ਨਾਲ਼ ਉਹਨਾਂ ਨੂੰ ਵੀ ਜ਼ਿੰਦਾ ਰੱਖਿਆ ਗਿਆ ਹੈ। ਪਹਿਲੀ ਤੋਂ ਲੈ ਕੇ ਅਖ਼ੀਰਲੀ ਕਹਾਣੀ ਤੱਕ ਰੌਚਕਤਾ ਬਣੀ ਰਹਿੰਦੀ ਹੈ। ਛੋਟੀਆਂ ਕਹਾਣੀਆਂ ਵਿੱਚ ਬਹੁਤ ਵੱਡੇ ਸੁਨੇਹੇ ਦਿੱਤੇ ਹਨ। ਪਰਮਾਤਮਾ ਤੁਹਾਨੂੰ ਦਿਨ ਦੁੱਗਣੀ, ਰਾਤ ਚੌਗਣੀ ਤਰੱਕੀ ਬਖਸ਼ੇ। ਆਉਣ ਵਾਲੇ ਸਮੇਂ ਵਿੱਚ ਵੀ ਤੁਸੀਂ ਸਾਹਿਤ ਦੀ ਝੋਲੀ ਵਿੱਚ ਆਪਣੀਆਂ ਖ਼ੂਬਸੂਰਤ ਕਹਾਣੀਆਂ ਕਵਿਤਾਵਾਂ ਪਾਉਂਦੇ ਰਹੋ। ਬਾਕੀ ਪਾਠਕਾਂ ਨੂੰ ਵੀ ਗੁਜਾਰਿਸ਼ ਕਰਦੇ ਹਾਂ ਕਿ “ਤੋਪਿਆਂ ਵਾਲੀ ਕਮੀਜ਼ “ਕਹਾਣੀ ਸੰਗ੍ਰਹਿ ਨੂੰ ਜਰੂਰ ਪੜ੍ਹਨਾ। ਰਣਬੀਰ ਸਿੰਘ ਪ੍ਰਿੰਸ ਵੀਰ ਜੀ ਨੂੰ ਬਹੁਤ ਸਾਰੀਆਂ ਦੁਆਵਾਂ, ਪਿਆਰ ਅਤੇ ਸਤਿਕਾਰ।
ਪਰਵੀਨ ਕੌਰ ਸਿੱਧੂ
8146536200
1 comment
1 Comment
ਪਰਵੀਨ ਕੌਰ ਸਿੱਧੂ
March 30, 2024, 9:26 pmਬਹੁਤ ਵਧੀਆ ਕਿਤਾਬ ਹੈ ਜੀ।
REPLY