ਦੇਹਰਾਦੂਨ 15 ਅਕਤੂਬਰ (ਵਰਲਡ ਪੰਜਾਬੀ ਟਾਈਮਜ਼)
ਇਸ ਵਿੱਚ ਪਹਿਲੇ ਸੈਸ਼ਨ ਵਿੱਚ ਭਾਈ ਵੀਰ ਸਿੰਘ ਜੀ ਦੀ ਸ਼ਖਸ਼ੀਅਤ ਤੇ ਸਾਹਿਤ ਸਿਰਜਣਾ ਬਾਰੇ ਵਿਚਾਰ ਭਰਪੂਰ ਗੋਸ਼ਟੀ ਕੀਤੀ ਗਈ ਜਿਸ ਵਿੱਚ ਪ੍ਰੋ. ਅਮਰਜੀਤ ਸਿੰਘ ਅਤੇ ਪ੍ਰੋ. ਕਮਲਬੀਰ ਸਿੰਘ ਨੇ ਭਾਈ ਵੀਰ ਸਿੰਘ ਜੀ ‘ਤੇ ਖੋਜ ਭਰਪੂਰ ਵਿਚਾਰ ਸਾਂਝੇ ਕੀਤੇ। ਸ. ਨਰਿੰਦਰ ਜੀਤ ਸਿੰਘ ਬਿੰਦਰਾ, ਚੇਅਰਮੈਨ ਸ੍ਰੀ ਹੇਮਕੁੰਟ ਸਾਹਿਬ ਟਰੱਸਟ ਵਿਸ਼ੇਸ਼ ਮਹਿਮਾਨ ਵਜੋਂ ਹਾਜ਼ਰ ਰਹੇ ਅਤੇ ਡਾ. ਜਗਦੀਪ ਸਿੰਘ ਵਾਈਸ ਚਾਂਸਲਰ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਮੁੱਖ ਮਹਿਮਾਨ ਸਨ।
ਇਸ ਮੌਕੇ ਕਰਵਾਏ ਗਏ ਕਵੀ ਦਰਬਾਰ ਵਿੱਚ ਪੰਜਾਬ ਹਰਿਆਣਾ ਅਤੇ ਉੱਤਰਾਖੰਡ ਦੇ ਨਾਮਵਰ ਪੰਜਾਬੀ ਸ਼ਾਇਰਾਂ ਨੇ ਚੰਗਾ ਰੰਗ ਬੰਨ੍ਹਿਆ । ਇਸ ਕਵੀ ਦਰਬਾਰ ਵਿੱਚ ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਪ੍ਰਧਾਨ ਅਤੇ ਸਾਹਿਤ ਅਕਾਦਮੀ ਪੁਰਸਕਾਰ ਜੇਤੂ ਸ਼ਾਇਰ ਦਰਸ਼ਨ ਬੁੱਟਰ ਸਹਿਤ ਬਲਵਿੰਦਰ ਸੰਧੂ , ਡਾਕਟਰ ਸੁਦਰਸ਼ਨ ਗਾਸੋ ਗੁਰਚਰਨ ਸਿੰਘ ‘ਜੋਗੀ’, ਡਾਕਟਰ ਗੁਰਪ੍ਰੀਤ ਕੌਰ ਅੰਬਾਲਾ, ਡਾ. ਸੰਤੋਖ ਸੁਖੀ, ਮਨਜੀਤ ਪੁਰੀ ਡਾ. ਸੰਦੀਪ ਸ਼ਰਮਾ , ਡਾ. ਅਜੀਤਪਾਲ ਜਟਾਣਾ ਮੋਗਾ, ਪ੍ਰੋ. ਰਾਜੇਸ਼ ਮੋਹਨ ਫਰੀਦਕੋਟ,ਤਰਸੇਮ ਬਰਨਾਲ਼ਾ , ਹਰਪ੍ਰੀਤ ਸਿੰਘ ਲਿਖਾਰੀ, ਕੁਮਾਰ ਜਗਦੇਵ, ਗੁਰਪ੍ਰੀਤ ਮਾਨਸਾ, ਅੱਖਰ ਮੈਗਜ਼ੀਨ ਦੇ ਸੰਪਾਦਕ ਅਵਤਾਰ ਜੀਤ ਅਟਵਾਲ , ਰਾਜੇਸ਼ ਅਨੰਦ ਦੇਹਰਾਦੂਨ, ਦੀਪਕ ਅਰੋੜਾ ਦੇਹਰਾਦੂਨ, ਅੰਬਰ ਖਰਬੰਦਾ ਦੇਹਰਾਦੂਨ , ਪ੍ਰੇਮ ਸਾਹਿਲ ਦੇਹਰਾਦੂਨ ਅਤੇ ਭਾਸ਼ਾ ਵਿਭਾਗ ਪੰਜਾਬ ਦੇ ਡਾਇਰੈਕਟਰ ਸਰਦਾਰ ਜਸਵੰਤ ਸਿੰਘ ਜ਼ਫ਼ਰ ਨੇ ਚਿੰਤਨ ਭਰਪੂਰ ਕਵਿਤਾਵਾਂ ਪੇਸ਼ ਕਰ ਕੇ ਚੰਗਾ ਪ੍ਰਭਾਵ ਸਿਰਜਿਆ।
ਦੇਹਰਾਦੂਨ ਨਿਵਾਸੀ ਪ੍ਰਿੰਸੀਪਲ ਉਦੈ ਠਾਕੁਰ ਦੁਆਰਾ ਡਾ ਸੁਦਰਸ਼ਨ ਗਾਸੋ ਦੀਆਂ ਕਵਿਤਾਵਾਂ ਦੇ ਨੇਪਾਲੀ ਭਾਸ਼ਾ ਵਿੱਚ ਅਨੁਵਾਦਿਤ ਕਾਵਿ ਸੰਗ੍ਰਹਿ ‘ ਖੁਸ਼ੀ ਕੋ ਇੰਦਰੈਨੀ’ ਭਾਸ਼ਾ ਵਿਭਾਗ ਦੇ ਡਾਇਰੈਕਟਰ ਸਰਦਾਰ ਜਸਵੰਤ ਸਿੰਘ ਜ਼ਫ਼ਰ ਨੇ ਲੋਕ ਅਰਪਣ ਕੀਤਾ।
ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਵਾਈਸ ਚਾਂਸਲਰ ਡਾਕਟਰ ਜਗਦੀਪ ਸਿੰਘ ਨੇ ਆਪਣੇ ਪ੍ਰਧਾਨਗੀ ਭਾਸ਼ਣ ਵਿੱਚ ਕਿਹਾ ਕਿ ਯੂਨੀਵਰਸਿਟੀ ਭਾਈ ਵੀਰ ਸਿੰਘ ਦੀ ਯਾਦ ਵਿੱਚ ਆਪਣੇ ਕੈਂਪਸ ਵਿਖੇ ਇੱਕ ਮਿਊਜ਼ੀਅਮ ਬਣਾਉਣ ਦੀ ਯੋਜਨਾ ਬਣਾ ਰਹੀ ਹੈ।
ਦੂਸਰੇ ਦਿਨ ਸਰਦਾਰ ਭਗਵਾਨ ਸਿੰਘ ਯੂਨੀਵਰਸਿਟੀ ਦੇਹਰਾਦੂਨ ਵਿਖੇ ਪੰਜਾਬੀ ਦੇ ਹਰਮਨ ਪਿਆਰੇ ਗਾਇਕਾਂ ਯਾਕੂਬ ਗਿੱਲ ਅਤੇ ਰੰਗਲੇ ਸਰਦਾਰ ਗਰੁੱਪ ਨੇ ਪੰਜਾਬੀ ਸੱਭਿਆਚਾਰ ਦੀ ਸ਼ਾਨਦਾਰ ਪੇਸ਼ਕਾਰੀ ਕਰਕੇ ਸਾਰਿਆਂ ਦਾ ਦਿਲ ਜਿੱਤ ਲਿਆ। ਮੰਚ ਸੰਚਾਲਨ ਡਾਕਟਰ ਸੁਖਦਰਸ਼ਨ ਚਹਿਲ ਅਤੇ ਡਾਕਟਰ ਮਨਜਿੰਦਰ ਸਿੰਘ ਨੇ ਬਾਖੂਬੀ ਨਿਭਾਇਆ।
ਤੀਸਰੇ ਦਿਨ ਕੁਦਰਤ ਪ੍ਰੇਮੀ ਕਵੀਆਂ ਨੇ ਮਸੂਰੀ ਦੀਆਂ ਵਾਦੀਆਂ ਦੀ ਖੂਬਸੂਰਤੀ ਨਿਹਾਰਨ ਵੱਲ ਰੁੱਖ ਕੀਤਾ। ਹਰਿਆਣਾ ਕੇਂਦਰੀ ਪੰਜਾਬੀ ਲੇਖਕ ਸਭਾ ਦੇ ਪ੍ਰਧਾਨ ਅਤੇ ਪ੍ਰਸਿੱਧ ਕਵੀ ਡਾ. ਸੁਦਰਸ਼ਨ ਗਾਸੋ, ਸ਼ਾਇਰ ਗੁਰਚਰਨ ਸਿੰਘ ‘ਜੋਗੀ’, ਤਰਸੇਮ ਬਰਨਾਲਾ, ਡਾ. ਮਨਜਿੰਦਰ ਸਿੰਘ ਅਤੇ ਹੋਰਾਂ ਨੇ ਮਸੂਰੀ ਪੁਸਤਕਾਂ ਦੀ ਉਸ ਦੁਕਾਨ ਉੱਤੇ ਪਹੁੰਚ ਕੇ ਸਾਹਿਤਕ ਪੁਸਤਕਾਂ ਖਰੀਦੀਆਂ, ਜਿੱਥੇ ਅੰਗਰੇਜ਼ੀ ਦੇ ਪ੍ਰਸਿੱਧ ਸਾਹਿਤਕਾਰ ਰਸਕਿਨ ਬੌਂਡ ਆਪਣੇ ਪਾਠਕਾਂ ਨਾਲ ਸ਼ਾਮ ਨੂੰ ਮੁਲਾਕਾਤ ਕਰਦੇ ਸਨ।
ਸਾਹਿਤਿਕ ਗੋਸ਼ਟੀ ਦੇ ਪ੍ਰਚਾਰ ਪ੍ਰਸਾਰ ਤੇ ਰਾਸ਼ਟਰੀ ਏਕਤਾ ਦੇ ਨਜ਼ਰੀਏ ਤੋਂ ਇਹ ਸਾਹਿਤਕ ਯਾਤਰਾ ਅਤੇ ਪ੍ਰੋਗਰਾਮ ਇਤਿਹਾਸਕ ਹੋ ਨਿਬੜਿਆ। ਇਸ ਮੌਕੇ ਹਾਜ਼ਰ ਸਾਹਿਤਕਾਰਾਂ ਨੇ ਸ਼ਾਇਰ ਦਰਸ਼ਨ ਬੁੱਟਰ ਦੀ ਅਗਵਾਈ ਵਿੱਚ ਭਾਸ਼ਾ ਵਿਭਾਗ ਦੇ ਹੱਕ ਵਿੱਚ ਮਤਾ ਪਾਸ ਕੀਤਾ ਤੇ ਪੰਜਾਬ ਸਰਕਾਰ ਨੂੰ ਅਪੀਲ ਕੀਤੀ ਕਿ ਅਫ਼ਸਰਸ਼ਾਹੀ ਵੱਲੋਂ ਭਾਸ਼ਾ ਦੇ ਰਾਹ ਵਿੱਚ ਡਾਹੇ ਜਾ ਰਹੇ ਅੜਿੱਕਿਆਂ ਨੂੰ ਤੁਰੰਤ ਦੂਰ ਕੀਤਾ ਜਾਵੇ।
