💥ਉੱਠ ਨੀ ਕੁੜੀਏ💥

ਉੱਠ ਨੀ ਚਿੜੀਏ,ਉੱਠ ਨੀ ਕੁੜੀਏ,
ਤੂੰ ਜੜ ਜੁਲਮ ਦੀ ਪੁੱਟ ਨੀ ਕੁੜੀਏ,
ਚੰਦਰੀ ਦੁਨੀਆ ਨਾਲ ਪੈਣਾ ਲੜਨਾ,
ਨਾ ਗੱਲ ਕਿਸਮਤ ਤੇ ਸੁੱਟ ਨੀ ਕੁੜੀਏ,
ਉੱਠ ਨੀ ਚਿੜੀਏ,ਉੱਠ ਨੀ ਕੁੜੀਏ…….

*ਬਿਨਾਂ ਮੰਗੀਆਂ ਹੱਕ ਨਹੀਂ ਮਿਲਣੇ,
ਤਲੀਆਂ ਉੱਤੇ ਰੱਖ ਨਹੀਂ ਮਿਲਣੇ,
ਤੋੜ ਜੰਜੀਰਾਂ ਪੈਰਾਂ ਦੀਆਂ ਨੂੰ,
ਸੱਧਰਾਂ ਦਿਲ ਵਿੱਚ ਡੱਕ ਨਹੀਂ ਮਿਲਣੇ-2
ਕਲਿਆਂ ਇੱਥੇ ਕੁਝ ਨਹੀਂ ਮਿਲਣਾ,
ਹੋਣਾ ਪੈਣਾ ਇੱਕ-ਜੁੱਟ ਨੀ ਕੁੜੀਏ,
ਉੱਠ ਨੀ ਚਿੜੀਏ,ਉੱਠ ਨੀ ਕੁੜੀਏ…….

*ਤੈਨੂੰ ਨਾਲ ਹੈਵਾਨਾਂ ਲੜਨਾ ਪੈਣਾ,
ਵਿੱਚ ਮੈਦਾਨੇ ਖੜਨਾ ਪੈਣਾ,
ਬਗਾਵਤ ਦਾ ਪਰਚਮ ਲਹਿਰਾਕੇ,
ਜਾਲਮ ਦੀ ਹਿੱਕ ‘ਤੇ ਚੜਨਾ ਪੈਣਾ-2
ਜੋ ਨੋਚ ਕੇ ਤੈਨੂੰ ਖਾਣਾ ਚਾਹੁੰਦੇ,
ਉਹਦੀ ਸੰਘੀ ਘੁੱਟ ਨੀ ਕੁੜੀਏ,
ਉੱਠ ਨੀ ਚਿੜੀਏ,ਉੱਠ ਨੀ ਕੁੜੀਏ…….

*ਅੰਬਰਾਂ ਵਿੱਚ ਜੇ ਉੱਡਣਾ ਏ ਤੂੰ,
ਸੀਨਾ ਪਾੜ ਧਰਤ ਦਾ ਉੱਗਣਾ ਏ ਤੂੰ,
ਹੱਥਾਂ ਨੂੰ ਹਥਿਆਰ ਬਣਾ ਲੈ,
ਜੇ ਕੰਡਿਆ ਨੂੰ ਰਾਹ ਚੋਂ ਚੁਗਣਾ ਏ ਤੂੰ-2
ਕਦ ਤੱਕ ਲਘਾਉਣੀ ਰਾਤ ਹਨੇਰੀ,
ਸੂਰਜ ਦੀਆਂ ਕਿਰਨਾਂ ਵਾਂਗੂੰ
ਫੁੱਟ ਨੀ ਕੁੜੀਏ,
ਉੱਠ ਨੀ ਚਿੜੀਏ,ਉੱਠ ਨੀ ਕੁੜੀਏ…….

*ਕੀ ਹੋਇਆ ਜੇ ਨਾਰੀ ਏਂ ਤੂੰ,
ਕੱਲੀ ਸੋਆਂ ਤੇ ਭਾਰੀ ਏ ਤੂੰ,
ਰਾਣੀ ਝਾਂਸੀ,ਦੁਰਗਾ,ਕਾਲੀ ਵਾਂਗਰ,
ਬਣ ਸਕਦੀ ਚਿੰਗਾਰੀ ਏਂ ਤੂੰ-੨
ਸਿਰ ਤੋਂ ਲਾਹ ਕੇ ਚੁੰਨੀ ਲੱਕ ਨੂੰ ਮਾਰ ਮੰਡਾਸਾ,
ਨਹੀਂ ਤੇ ਹੁੰਦੀ ਰਹਿਣੀ ਤੇਰੀ ਲੁੱਟ ਨੀ ਕੁੜੀਏ…

ਉੱਠ ਨੀ ਚਿੜੀਏ,ਉੱਠ ਨੀ ਕੁੜੀਏ,
ਤੂੰ ਜੜ ਜੁਲਮ ਦੀ ਪੁੱਟ ਨੀ ਕੁੜੀਏ….

💥ਪਰਮਜੀਤ ਲਾਲੀ💥
☎️98962-44038☎️