ਮੰਡੀਆਂ ’ਚ ਪਏ ਝੋਨੇ ਦੀ ਖਰੀਦ ਤੇ ਚੁਕਾਈ ਤੇਜ਼ ਕਰਨ ਲਈ ਯੋਗ ਮਿੱਲਰਾਂ ਨੂੰ ਜਲਦੀ ਜਾਰੀ ਹੋਣ ਰਿਲੀਜ਼ ਆਰਡਰ : ਅਰਸ਼ ਸੱਚਰ

ਕਿਸਾਨਾਂ ਨੂੰ ਰਾਹਤ ਦੇਣ ਲਈ ਮੁੱਖ ਮੰਤਰੀ ਜੀ ਨੂੰ ਭੇਜੀ ਬੇਨਤੀ, ਡੀ.ਐੱਫ.ਐਸ.ਸੀ. ਤੋਂ ਮੰਡੀਵਾਰ ਰਿਪੋਰਟ ਲੈ ਕੇ ਤੁਰੰਤ ਫ਼ੈਸਲੇ ਦੀ ਅਪੀਲ

ਕੋਟਕਪੂਰਾ, 10 ਨਵੰਬਰ (ਟਿੰਕੂ ਕੁਮਾਰ/ਵਰਲਡ ਪੰਜਾਬੀ ਟਾਈਮਜ਼)

ਆਮ ਆਦਮੀ ਪਾਰਟੀ ਪੰਜਾਬ ਦੇ ਵਪਾਰ ਵਿੰਗ ਦੇ ਸੂਬਾ ਮੀਤ ਪ੍ਰਧਾਨ ਅਰਸ਼ ਸੱਚਰ ਨੇ ਮੰਡੀਆਂ ਵਿੱਚ ਪਏ ਵਾਧੂ ਝੋਨੇ ਦੀ ਖਰੀਦ ਅਤੇ ਚੁਕਾਈ ਤੇਜ਼ ਕਰਨ ਲਈ ਮਾਣਯੋਗ ਮੁੱਖ ਮੰਤਰੀ ਸ. ਭਗਵੰਤ ਮਾਨ ਜੀ ਨੂੰ ਲਿਖਤੀ ਬੇਨਤੀ ਭੇਜੀ ਹੈ। ਉਨ੍ਹਾਂ ਯੋਗ ਅਤੇ ਇੱਛੁਕ ਰਾਈਸ ਮਿੱਲਰਾਂ ਨੂੰ ਲਾਗੂ ਨਿਯਮਾਂ ਅਨੁਸਾਰ ਰਿਲੀਜ਼ ਆਰਡਰ ਜਾਂ ਵਾਧੂ ਅਲਾਟਮੈਂਟ ਜਲਦੀ ਜਾਰੀ ਕਰਨ ਦੀ ਅਪੀਲ ਕੀਤੀ। ਸੱਚਰ ਨੇ ਦੱਸਿਆ ਕਿ ਉਨ੍ਹਾਂ ਦੇ ਧਿਆਨ ਵਿੱਚ ਆਈ ਜਾਣਕਾਰੀ ਅਨੁਸਾਰ ਮਿੱਲਰਾਂ ਦੀ ਮੌਜੂਦਾ ਅਲਾਟਮੈਂਟ/ਲਿੰਕੇਜ ਦੀ ਹੱਦ ਪੂਰੀ ਹੋ ਚੁੱਕੀ ਹੈ, ਜਦਕਿ ਮੰਡੀਆਂ ਵਿੱਚ ਵਾਧੂ ਝੋਨਾ ਮੌਜੂਦ ਹੈ ਅਤੇ ਕਿਸਾਨ ਖਰੀਦ ਤੇ ਚੁਕਾਈ ਦੀ ਉਡੀਕ ਕਰ ਰਹੇ ਹਨ। ਦੂਜੇ ਪਾਸੇ, ਮਿੱਲਰ ਰਿਲੀਜ਼ ਆਰਡਰਾਂ ਰਾਹੀਂ ਹੋਰ ਝੋਨਾ ਲੈਣ ਲਈ ਤਿਆਰ ਹਨ। “ਜਦੋਂ ਯੋਗ ਮਿੱਲਰ ਵਾਧੂ ਝੋਨਾ ਲੈਣ ਲਈ ਤਿਆਰ ਹਨ, ਤਾਂ ਲੋੜੀਂਦੀਆਂ ਮਨਜ਼ੂਰੀਆਂ ਬਾਰੇ ਜਲਦੀ ਫ਼ੈਸਲਾ ਕਰਕੇ ਕਿਸਾਨਾਂ ਦੀ ਉਡੀਕ ਘਟਾਈ ਜਾ ਸਕਦੀ ਹੈ,” ਸੱਚਰ ਨੇ ਕਿਹਾ। ਉਨ੍ਹਾਂ ਬੇਨਤੀ ਕੀਤੀ ਕਿ ਸਬੰਧਤ ਜ਼ਿਲ੍ਹਾ ਖੁਰਾਕ ਤੇ ਸਪਲਾਈ ਕੰਟਰੋਲਰ ਤੋਂ ਮੰਡੀਵਾਰ ਅੰਕੜੇ ਲੈ ਕੇ ਅਣਵਿਕੇ ਝੋਨੇ ਅਤੇ ਖਰੀਦੇ ਜਾ ਚੁੱਕੇ ਪਰ ਚੁਕਾਈ ਦੀ ਉਡੀਕ ਵਾਲੇ ਝੋਨੇ ਦੀ ਸਥਿਤੀ ਵੱਖਰੇ ਤੌਰ ’ਤੇ ਸਪੱਸ਼ਟ ਕੀਤੀ ਜਾਵੇ। ਮਿੱਲਰਾਂ ਦੀ ਯੋਗਤਾ, ਸਮਰੱਥਾ ਅਤੇ ਲੋੜੀਂਦੀਆਂ ਸ਼ਰਤਾਂ ਦੀ ਜਾਂਚ ਕਰਕੇ ROs ਜਾਰੀ ਕੀਤੇ ਜਾਣ ਅਤੇ ਕਿਸੇ ਨੀਤੀਗਤ ਜਾਂ ਪ੍ਰਸ਼ਾਸਕੀ ਰੁਕਾਵਟ ਦਾ ਪਹਿਲ ਦੇ ਆਧਾਰ ’ਤੇ ਹੱਲ ਕੀਤਾ ਜਾਵੇ। ਸੱਚਰ ਨੇ ਨਿਰਧਾਰਤ ਮਾਪਦੰਡਾਂ ਅਨੁਸਾਰ ਕਿਸਾਨਾਂ ਦੀ ਫ਼ਸਲ ਦੀ ਘੱਟੋ-ਘੱਟ ਸਮਰਥਨ ਮੁੱਲ ’ਤੇ ਨਿਰਵਿਘਨ ਖਰੀਦ, ਸਮੇਂ ਸਿਰ ਚੁਕਾਈ ਅਤੇ ਅਦਾਇਗੀ ਯਕੀਨੀ ਬਣਾਉਣ ਦੀ ਅਪੀਲ ਵੀ ਕੀਤੀ। ਉਨ੍ਹਾਂ ਇਸ ਮਾਮਲੇ ਲਈ ਨੋਡਲ ਅਫ਼ਸਰ ਨਿਯੁਕਤ ਕਰਨ ਅਤੇ 48 ਘੰਟਿਆਂ ਅੰਦਰ ਮੁੱਢਲੀ ਕਾਰਵਾਈ ਰਿਪੋਰਟ ਲੈਣ ਦੀ ਬੇਨਤੀ ਕੀਤੀ। ਉਨ੍ਹਾਂ ਕਿਹਾ ਕਿ ਇਹ ਉਪਰਾਲਾ ਕਿਸਾਨਾਂ, ਆੜ੍ਹਤੀਆਂ ਅਤੇ ਰਾਈਸ ਮਿੱਲਰਾਂ ਦੇ ਸਾਂਝੇ ਹਿੱਤ ਵਿੱਚ ਹੈ। ਪੰਜਾਬ ਸਰਕਾਰ ਦੇ ਸੁਚਾਰੂ ਅਤੇ ਕਿਸਾਨ-ਪੱਖੀ ਖਰੀਦ ਪ੍ਰਬੰਧਾਂ ਨੂੰ ਹੋਰ ਮਜ਼ਬੂਤ ਕਰਨ ਲਈ ਉਹ ਸਬੰਧਤ ਅਧਿਕਾਰੀਆਂ ਨਾਲ ਲਗਾਤਾਰ ਪੈਰਵੀ ਕਰਨਗੇ।