ਸਰਕਾਰੀ ਖਜਾਨੇ ਨੂੰ ਨੁਕਸਾਨ ਪਹੁੰਚਣ ਦਾ ਖਦਸ਼ਾ : ਸਮਾਜਸੇਵੀ ਅਰਸ਼ ਸੱਚਰ
ਕੋਟਕਪੂਰਾ, 15 ਜਨਵਰੀ (ਟਿੰਕੂ ਕੁਮਾਰ/ਵਰਲਡ ਪੰਜਾਬੀ ਟਾਈਮਜ਼)
ਫਰੀਦਕੋਟ ਨਗਰ ਕੌਂਸਲ ਵਿੱਚ ਚੱਲ ਰਹੀਆਂ ਗੰਭੀਰ ਵਿੱਤੀ ਘੋਟਾਲਾ, ਆਮਦਨ ਨੂੰ ਜਾਣਬੁੱਝ ਕੇ ਦਬਾਉਣ ਅਤੇ ਸਰਕਾਰੀ ਸੰਪਤੀ ਦੇ ਸੰਭਾਵਿਤ ਦੁਰਪਯੋਗ ਨੂੰ ਲੈ ਕੇ ਅਰਸ਼ ਸੱਚਰ ਸਮਾਜ ਸੇਵੀ ਅਤੇ ਆਮ ਆਦਮੀ ਪਾਰਟੀ ਦੇ ਸੀਨੀਅਰ ਆਗੂ ਫਰੀਦਕੋਟ ਵੱਲੋਂ ਮੁੱਖ ਮੰਤਰੀ ਪੰਜਾਬ ਨੂੰ ਇਕ ਵਿਸਥਾਰਪੂਰਕ ਜਨਹਿਤ ਸ਼ਿਕਾਇਤ ਭੇਜੀ ਗਈ ਹੈ। ਅਰਸ਼ ਸੱਚਰ ਨੇ ਦੋਸ਼ ਲਾਇਆ ਹੈ ਕਿ ਨਗਰ ਕੌਂਸਲ ਦੇ ਕੁਝ ਅਧਿਕਾਰੀ ਕਥਿੱਤ ਤੌਰ ’ਤੇ ਕੁਝ ਬਾਹਰੀ ਅਤੇ ਰਾਜਨੀਤਿਕ ਤੱਤਾਂ ਨਾਲ ਮਿਲ ਕੇ ਨਗਰ ਕੌਂਸਲ ਦੀ ਆਮਦਨ ਪ੍ਰਣਾਲੀ ਨੂੰ ਜਾਣਬੁੱਝ ਕੇ ਕਮਜ਼ੋਰ ਕਰ ਰਹੇ ਹਨ, ਜਿਸ ਕਾਰਨ ਨਗਰ ਕੌਂਸਲ ਨੂੰ ਕਥਿੱਤ ਤੌਰ ’ਤੇ ‘ਵਿੱਤੀ ਤੰਗੀ’ ਵਿੱਚ ਦਿਖਾਇਆ ਜਾ ਰਿਹਾ ਹੈ ਅਤੇ ਸਰਕਾਰੀ ਖ਼ਜ਼ਾਨੇ ਨੂੰ ਲਗਾਤਾਰ ਨੁਕਸਾਨ ਪਹੁੰਚ ਰਿਹਾ ਹੈ। ਮੁੱਖ ਦੋਸ਼ ਅਤੇ ਗੰਭੀਰ ਮੁੱਦੇ ਅਰਸ਼ ਸੱਚਰ ਨੇ ਦੱਸਿਆ ਕਿ ਨਗਰ ਕੌਂਸਲ ਦੀਆਂ ਦੁਕਾਨਾਂ ਤੋਂ ਕਈ ਮਹੀਨਿਆਂ ਤੋਂ ਕਿਰਾਇਆ ਢੰਗ ਨਾਲ ਇਕੱਠਾ ਨਹੀਂ ਕੀਤਾ ਜਾ ਰਿਹਾ। ਡਿਫਾਲਟਰਾਂ ਖ਼ਿਲਾਫ਼ ਨਾ ਜੁਰਮਾਨੇ, ਨਾ ਕਾਨੂੰਨੀ ਕਾਰਵਾਈ, ਜੋ ਸਿੱਧੀ ਵਿੱਤੀ ਲਾਪ੍ਰਵਾਹੀ ਜਾਂ ਸਾਂਝੀ ਮਿਲੀਭੁਗਤ ਵੱਲ ਇਸ਼ਾਰਾ ਕਰਦਾ ਹੈ, ਜਨਤਾ ਵਿੱਚ ਗੰਭੀਰ ਚਿੰਤਾ ਹੈ ਕਿ ਨਗਰ ਕੌਂਸਲ ਦੀਆਂ ਦੁਕਾਨਾਂ ਨੂੰ ਵੇਚਣ ਜਾਂ ਨਿਪਟਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ, ਜੋ ਸਰਕਾਰੀ ਸੰਪਤੀ ਦੀ ਲੁੱਟ ਹੈ, ਕੂੜਾ ਇਕੱਠਾ ਕਰਨ ਦੀ ਫੀਸ ਦੀ ਵਸੂਲੀ ਅਤੇ ਜਮਾਂ ਪ੍ਰਣਾਲੀ ’ਚ ਕੋਈ ਪਾਰਦਰਸ਼ਤਾ ਨਹੀਂ, ਘਰ ਟੈਕਸ ਅਤੇ ਹੋਰ ਨਗਰ ਟੈਕਸਾਂ ਦੀ ਵਸੂਲੀ ਵਿੱਚ ਭਾਰੀ ਅਣਦੇਖੀ ਹੋ ਰਹੀ ਹੈ, ਨਵੇਂ ਘਰ ਦਰਜ ਨਹੀਂ ਹੋ ਰਹੇ, ਪੁਰਾਣੇ ਬਕਾਏਦਾਰਾਂ ਖ਼ਿਲਾਫ਼ ਕੋਈ ਵੱਡੀ ਮੁਹਿੰਮ ਨਹੀਂ। ਉਨ੍ਹਾਂ ਕਿਹਾ ਕਿ ਜਦੋਂ ਦੁਕਾਨ ਕਿਰਾਇਆ, ਘਰ ਟੈਕਸ ਅਤੇ ਯੂਜ਼ਰ ਚਾਰਜ, ਤਿੰਨੇ ਇਕੱਠੇ ਫੇਲ ਹੋ ਜਾਣ, ਤਾਂ ਇਹ ਸਿਰਫ਼ ਲਾਪ੍ਰਵਾਹੀ ਨਹੀਂ, ਬਲਕਿ ਸੰਯੋਜਿਤ ਵਿੱਤੀ ਤਬਾਹੀ ਦਾ ਮਾਮਲਾ ਬਣਦਾ ਹੈ। ਅਰਸ਼ ਸੱਚਰ ਨੇ ਉੱਚ ਪੱਧਰੀ ਜਾਂਚ ਦੀ ਮੰਗ ਕਰਦਿਆਂ ਆਖਿਆ ਕਿ 48 ਘੰਟਿਆਂ ਅੰਦਰ ਉੱਚ ਪੱਧਰੀ ਟੀਮ ਦੁਆਰਾ ਤੁਰਤ ਸਮਾਬੱਧ ਜਾਂਚ ਸ਼ੁਰੂ ਕੀਤੀ ਜਾਵੇ, ਪਿਛਲੇ ਘੱਟੋ-ਘੱਟ 3 ਮਹੀਨਿਆਂ ਦੀ ਖ਼ਾਸ ਵਿੱਤੀ ਆਡਿਟ ਕਰਵਾਈ ਜਾਵੇ, ਨਗਰ ਸੰਪਤੀਆਂ ਨਾਲ ਸਬੰਧਤ ਸਾਰੇ ਰਿਕਾਰਡ ਤੁਰਤ ਕਬਜ਼ੇ ਵਿੱਚ ਲਏ ਜਾਣ, ਦੋਸ਼ੀ ਅਧਿਕਾਰੀਆਂ, ਏਜੰਸੀਆਂ ਜਾਂ ਵਿਅਕਤੀਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਹੋਵੇ, ਨਗਰ ਕੌਂਸਲ ਲਈ ਪੂਰੀ ਤਰ੍ਹਾਂ ਆਨਲਾਈਨ, ਸਰਕਾਰੀ ਨਿਗਰਾਨੀ ਹੇਠ ਪਾਰਦਰਸ਼ੀ ਰੈਵਿਨਿਊ ਸਿਸਟਮ ਲਾਗੂ ਕੀਤਾ ਜਾਵੇ। ਅਰਸ਼ ਸੱਚਰ ਨੇ ਕਿਹਾ ਕਿ ਇਹ ਸਿਰਫ਼ ਪੈਸਿਆਂ ਦਾ ਮਸਲਾ ਨਹੀਂ, ਇਹ ਫਰੀਦਕੋਟ ਦੀ ਸਰਕਾਰੀ ਸੰਪਤੀ, ਸੰਸਥਾਵਾਂ ਦੀ ਸਾਖ ਅਤੇ ਲੋਕਾਂ ਦੇ ਭਰੋਸੇ ਦਾ ਮਸਲਾ ਹੈ। ਜੇਕਰ ਸਮੇਂ ਸਿਰ ਕਾਰਵਾਈ ਨਾ ਹੋਈ ਤਾਂ ਸਬੂਤ ਮਿਟਾਏ ਜਾ ਸਕਦੇ ਹਨ। ਮੈਂ ਇਹ ਮਾਮਲਾ ਪੂਰੀ ਤਰ੍ਹਾਂ ਜਨਹਿਤ ਵਿੱਚ ਉਠਾਇਆ ਹੈ।
