ਲੁਧਿਆਣਾ 24 ਜੂਨ (ਵਰਲਡ ਪੰਜਾਬੀ ਟਾਈਮਜ਼)
ਪੀ.ਏ.ਯੂ. ਵਿਖੇ ਖੇਤੀ ਇੰਜਨੀਅਰਿੰਗ ਕਾਲਜ ਦੇ ਡਿਜ਼ੀਟਲ ਇਨੋਵੇਸ਼ਨਜ਼ ਫਾਰ ਸਮਾਰਟ ਐਗਰੀਕਲਚਰ ਸਕੂਲ ਵਿੱਚ ਇਕ ਹਫਤੇ ਦਾ ਫੈਕਲਟੀ ਵਿਕਾਸ ਪ੍ਰੋਗਰਾਮ ਸ਼ੁਰੂ ਹੋ ਗਿਆ| ਇਸ ਪ੍ਰੋਗਰਾਮ ਦਾ ਸਿਰਲੇਖ ਏ ਆਈ ਅਤੇ ਏ ਆਈ ਦੇ ਨਾਲ-ਨਾਲ ਅਧਿਆਪਨ ਅਤੇ ਸਿੱਖਿਆ ਵਾਸਤੇ ਵਿਕਸਿਤ ਵਿਧੀਆਂ ਸੰਬੰਧੀ ਨਿਰਧਾਰਤ ਕੀਤਾ ਗਿਆ ਹੈ| ਚੰਡੀਗੜ ਦੇ ਟੈਕਨੀਕਲ ਟੀਚਰਜ਼ ਟ੍ਰੇਨਿੰਗ ਅਤੇ ਰਿਸਰਚ ਬਾਰੇ ਰਾਸ਼ਟਰੀ ਸੰਸਥਾਨ ਦੇ ਸਹਿਯੋਗ ਨਾਲ ਇਸ ਵਿਕਾਸ ਪ੍ਰੋਗਰਾਮ ਦੀ ਰੂਪਰੇਖਾ ਬਣਾਈ ਗਈ ਹੈ|
ਆਰੰਭਕ ਸੈਸ਼ਨ ਦੀ ਸ਼ੋਭਾ ਵਧਾਉਣ ਲਈ ਖੇਤੀ ਇੰਜਨੀਅਰਿੰਗ ਕਾਲਜ ਦੇ ਡੀਨ ਡਾ. ਮਨਜੀਤ ਸਿੰਘ ਮੌਜੂਦ ਸਨ| ਉਹਨਾਂ ਨਾਲ ਵਧੀਕ ਨਿਰਦੇਸ਼ਕ ਖੋਜ (ਇੰਜ.) ਡਾ. ਮਹੇਸ਼ ਕੁਮਾਰ ਅਤੇ ਇਲੈਕਟ੍ਰੀਕਲ ਇੰਜਨੀਅਰਿੰਗ ਅਤੇ ਸੂਚਨਾ ਤਕਨਾਲੋਜੀ ਵਿਭਾਗ ਦੇ ਮੁਖੀ ਡਾ. ਓ ਪੀ ਗੁਪਤਾ ਵੀ ਵਿਸ਼ੇਸ਼ ਤੌਰ ਤੇ ਮੌਜੂਦ ਰਹੇ|
ਡਾ. ਮਨਜੀਤ ਸਿੰਘ ਨੇ ਖੇਤੀ ਦੇ ਮੌਜੂਦਾ ਦ੍ਰਿਸ਼ ਵਿਚ ਏ ਆਈ ਦੇ ਵਧਦੇ ਮਹੱਤਵ ਦੀ ਗੱਲ ਕੀਤੀ| ਉਹਨਾਂ ਕਿਹਾ ਕਿ ਅੱਜ ਦੇ ਦੌਰ ਵਿਚ ਅਧਿਆਪਨ ਲਈ ਵੀ ਏ ਆਈ ਵਿਧੀਆਂ ਨੂੰ ਵਿਚਾਰਨਾ ਅਤੇ ਵਿਹਾਰ ਦਾ ਹਿੱਸਾ ਬਨਾਉਣਾ ਜ਼ਰੂਰੀ ਹੈ| ਉਹਨਾਂ ਨੇ ਜਾਰੀ ਪ੍ਰੋਗਰਾਮ ਦੀ ਸ਼ਲਾਘਾ ਕਰਦਿਆਂ ਇਸ ਤੋਂ ਸਾਰਥਕ ਸਿੱਟਿਆਂ ਦੀ ਆਸ ਪ੍ਰਗਟਾਈ| ਡਾ. ਮਹੇਸ਼ ਕੁਮਾਰ ਨੇ ਅੱਜ ਦੇ ਸਮੇਂ ਵਿਚ ਵਿਕਸਿਤ ਖੇਤੀ ਤਕਨੀਕਾਂ ਵਿਚ ਏ ਆਈ ਨੂੰ ਬੇਹੱਦ ਮਹੱਤਵਪੂਰਨ ਕਰਾਰ ਦਿੱਤਾ|
ਡਾ. ਐੱਮ ਐੱਸ ਸਿੱਧੂ ਨੇ ਸਵਾਗਤ ਦੇ ਸ਼ਬਦ ਕਹਿੰਦਿਆਂ ਇਸ ਫੈਕਲਟੀ ਵਿਕਾਸ ਪ੍ਰੋਗਰਾਮ ਦੀ ਰੂਪਰੇਖਾ ਬਾਰੇ ਗੱਲ ਕੀਤੀ| ਐੱਨ ਆਈ ਟੀ ਟੀ ਟੀ ਆਰ ਚੰਡੀਗੜ ਦੇ ਡਾ. ਮੈਤਰੇਈ ਦੱਤਾ ਨੇ ਇਸ ਕੋਰਸ ਦੇ ਮੰਤਵ ਸੰਬੰਧੀ ਵਿਸਥਾਰ ਨਾਲ ਚਾਨਣਾ ਪਾਇਆ|
ਕੁੱਲ 42 ਅਧਿਆਪਕ ਇਸ ਸਿਖਲਾਈ ਲਈ ਦਰਜ ਹੋਏ ਹਨ| ਜਿਨ੍ਹਾਂ ਵਿਚ ਪੀ.ਏ.ਯੂ. ਦੇ ਅਧਿਆਪਕਾਂ ਤੋਂ ਇਲਾਵਾ ਖੋਜਾਰਥੀ ਅਤੇ ਵੱਖ-ਵੱਖ ਵਰਗਾਂ ਦੇ ਖੋਜੀ ਵੀ ਸ਼ਾਮਿਲ ਹਨ| ਅੰਤ ਵਿਚ ਸਿਵਲ ਇੰਜਨੀਅਰਿੰਗ ਵਿਭਾਗ ਦੇ ਮੁਖੀ ਡਾ. ਵੀ ਪੀ ਸੇਠੀ ਨੇ ਸਭ ਦਾ ਧੰਨਵਾਦ ਕੀਤਾ|
