ਇਟਲੀ ਵਿੱਚ ਨਵਦੀਪ ਸਿੰਘ ਜਗਤਪੁਰ ਨਾਂ ਦੇ ਵਿਦਿਆਰਥੀ ਨੇ ਡਾਕਟਰ ਦੀ ਉਪਾਧੀ ਕੀਤੀ ਹਾਸਲ

ਇਟਲੀ ਦੀ ਪਾਰਲੀਮੈਂਟ ਹਾਊਸ ਵਿੱਚ ਵੀ ਮਜ਼ਦੂਰਾਂ ਦੇ ਹੱਕ ਚ ਨਾਅਰਾ ਮਾਰ ਚੁੱਕਾ ਹੈ ਨਵਦੀਪ ਸਿੰਘ

ਮਿਲਾਨ 17 ਦਸੰਬਰ (ਨਵਜੋਤ ਢੀਂਡਸਾ/ਵਰਲਡ ਪੰਜਾਬੀ ਟਾਈਮਜ਼)

ਵਿਦੇਸ਼ਾਂ ਵਿੱਚ ਪੰਜਾਬੀਆਂ ਨੇ ਰੋਜ਼ੀ ਰੋਟੀ ਕਮਾਉਣ ਦੇ ਨਾਲ ਆਪਣੇ ਬੱਚਿਆਂ ਦਾ ਭਵਿੱਖ ਬਨਾਉਣ ਲਈ ਉਨ੍ਹਾਂ ਦੀ ਪੜ੍ਹਾਈ ਵੱਲ ਵੀ ਧਿਆਨ ਦੇਣ ਲਈ ਸੁਹਿਰਦ ਹਨ। ਇਟਲੀ ਵਿੱਚ ਪੰਜਾਬੀ ਵਿਦਿਆਰਥੀ ਆਪਣੇ ਭਵਿੱਖ ਨੂੰ ਉੱਜਵਲ ਅਤੇ ਸੁਨਿਹਰੀ ਬਣਾ ਰਹੇ ਹਨ ਇਸੇ ਤਰਾਂ ਦੀ ਉਦਾਹਰਣ ਪੇਸ਼ ਕੀਤੀ ਹੈ ਨਵਦੀਪ ਸਿੰਘ ਜਗਤਪੁਰ ਨੇ । ਨਵਦੀਪ ਸਿੰਘ ਨੇ ਪਾਰਮਾ ਯੂਨੀਵਰਸਿਟੀ ਵਿੱਚ 110 ਵਿੱਚੋਂ 110 ਅੰਕ ਪ੍ਰਾਪਤ ਕਰਕੇ ਕੰਪਿਊਟਰ ਸਾਇੰਸ ਵਿੱਚ ਡਿਗਰੀ ਪ੍ਰਾਪਤ ਕੀਤੀ ਹੈ ਅਤੇ ਯੂਨੀਵਰਸਟੀ ਵੱਲੋਂ ਉਸ ਨੂੰ ਇਹ ਡਿਗਰੀ ਪ੍ਰਾਪਤ ਕਰਨ ਤੇ ਡਾਕਟਰ ਦੀ ਉਪਾਧੀ ਨਾਲ ਵੀ ਸਨਮਾਨਿਤ ਕੀਤਾ ਗਿਆ ਹੈ।ਪਿਤਾ ਸਰਬਜੀਤ ਸਿੰਘ ਜਗਤਪੁਰ ਅਤੇ ਮਾਤਾ ਕਿਰਨ ਬਾਲਾ ਦਾ ਸਪੁੱਤਰ ਨਵਦੀਪ ਸਿੰਘ ਦਾ ਪਿਛੋਕੜ ਨਵਾਂਸ਼ਹਿਰ ਦੇ ਪਿੰਡ ਜਗਤਪੁਰ ਨਾਲ ਸਬੰਧਿਤ ਹੈ। ਵਰਨਣਯੋਗ ਹੈ ਕਿ ਨਵਦੀਪ ਸਿੰਘ ਜਗਤਪੁਰ 2003 ਵਿੱਚ ਪਰਿਵਾਰ ਸਮੇਤ ਇਟਲੀ ਵਿੱਚ ਆਇਆ ਸੀ ਉਦੋਂ ਉਹ ਸਿਰਫ ਦੋ ਕੁ ਸਾਲ ਦਾ ਸੀ ਇੱਥੇ ਹੀ ਇਟਲੀ ਵਿੱਚ ਹੀ ਉਸਨੇ ਪ੍ਰਾਇਮਰੀ, ਮਿਡਲ ਅਤੇ ਹਾਈ ਸਕੂਲ ਵਿੱਚ ਵਿਦਿਆ ਪ੍ਰਾਪਤ ਕੀਤੀ। ਉੱਚ -ਵਿਦਿਆ ਪ੍ਰਾਪਤ ਕਰਨ ਲਈ ਉਸਨੇ ਪਾਰਮਾ ਯੂਨੀਵਰਸਿਟੀ ਵਿੱਚ ਦਾਖਲਾ ਲਿਆ। ਤਿੰਨ ਸਾਲ ਦੇ ਕੋਰਸ ਉਪਰੰਤ ਉਸਨੇ ਸ਼ਾਨਦਾਰ ਅੰਕ ਪ੍ਰਾਪਤ ਕਰਕੇ ਡਿਗਰੀ ਹਾਸਿਲ ਕੀਤੀ । ਨਵਦੀਪ ਸਿੰਘ ਜਗਤਪੁਰ ਜਿੱਥੇ ਪੜ੍ਹਾਈ ਵਿੱਚ ਵਿਸ਼ੇਸ਼ ਨਾਮਣਾ ਖੱਟ ਰਿਹਾ ਹੈ ਉੱਥੇ ਉਹ ਖੇਡਾਂ ਦੇ ਪੱਖ ਚੋਂ ਇਟਲੀ ਵਿੱਚ ਵੱਖ ਵੱਖ ਸਥਾਨਾਂ ਤੇ ਹੋਏ ਕਰਾਟੇ ਚੈਂਪੀਅਨਸ਼ਿਪਾਂ ਵਿੱਚ ਭਾਗ ਲੈ ਚੁਕਿਆ ਹੈ। ਗੋਲਡ ਮੈਡਲ ਸਮੇਤ ਅਨੇਕਾਂ ਮਾਣ ਸਨਮਾਨਾਂ ਨਾਲ ਵੀ ਸਨਮਾਨਿਤ ਹੋ ਚੁੱਕਾ ਹੈ। ਸਮਾਜ ਦੇ ਹਰ ਪਹਿਲੂ ਤੋਂ ਸੇਵਾ ਹਿੱਤ ਸਮਰਪਿਤ ਬਾਬਾ ਰਾਮ ਚੰਦ ਟਰੱਸਟ ਯੂਰਪ ਵਿੱਚ ਵੀ ਉਹ ਅਹਿਮ ਯੋਗਦਾਨ ਪਾ ਰਿਹਾ ਹੈ । ਨਵਦੀਪ ਸਿੰਘ ਜਗਤਪੁਰ ਇਟਲੀ ਦੀ ਪਾਰਲੀਮੈਂਟ ਵਿੱਚ ਵੀ ਮਜ਼ਦੂਰਾਂ ਦੇ ਹੱਕ ਵਿੱਚ ਆਪਣੀ ਆਵਾਜ਼ ਬੁਲੰਦ ਕਰ ਚੁੱਕਾ ਹੈ ਅਤੇ ਉਹ ਇਟਲੀ ਵਿੱਚ ਇਟਾਲੀਅਨ ਮਾਲਕ ਕਿਸ ਤਰ੍ਹਾਂ ਮਜ਼ਦੂਰਾਂ ਦਾ ਸ਼ੋਸ਼ਣ ਕਰਦੇ ਹਨ ਉਸ ਪ੍ਰਤੀ ਇੱਕ ਕਿਤਾਬ ਵੀ ਲਿਖ ਚੁੱਕਾ ਹੈ ਜੋ ਇਟਲੀ ਦੀ ਪਾਰਲੀਮੈਂਟ ਵਿੱਚ ਵੀ ਰਿਲੀਜ਼ ਕੀਤੀ ਜਾ ਚੁੱਕੀ ਹੈ।ਨਵਦੀਪ ਸਿੰਘ ਜਗਤਪੁਰ ਕ੍ਰਿਕਟ ਅਤੇ ਜਿੰਮ ਦਾ ਵੀ ਸ਼ੌਂਕ ਰੱਖਦਾ ਹੈ। ਸਰੀਰ ਨੂੰ ਤੰਦਰੁਸਤ, ਚੁਸਤ ਅਤੇ ਦਰੁੱਸਤ ਰੱਖਣ ਲਈ ਇਟਾਲੀਅਨ, ਮਰੋਕੋ ਅਤੇ ਵੱਖ ਵੱਖ ਦੇਸ਼ਾਂ ਦੇ ਦੋਸਤਾਂ ਦਾ ਉਸ ਦੇ ਜਿੰਮ ਵਿਚ ਤਾਤਾ ਲੱਗਾ ਰਹਿਦਾ ਹੈ। ਨਵਦੀਪ ਸਿੰਘ ਇਟਾਲੀਅਨ ਫਿਲਮਾਂ ਚ ਵੀ ਅਹਿਮ ਰੋਲ ਨਿਭਾਅ ਚੁੱਕਿਆ ਹੈ। ਨਵਦੀਪ ਸਿੰਘ ਵਾਤਾਵਾਰਣ ਨੂੰ ਸਾਫ ਸੁਥਰਾ ਰੱਖਣ ਲਈ ਵੀ ਵਚਨਬੱਧ ਹੈ।