ਜੋ ਖੜ੍ਹੇ ਨੇ

ਜੋ ਖੜ੍ਹੇ ਨੇ ਮੇਰੀਆਂ ਰਾਹਵਾਂ ਦੇ ਵਿੱਚ ਚੱਟਾਨ ਬਣ ਕੇ,
ਮਿੱਟੀ ਵਿੱਚ ਉਹਨਾਂ ਨੂੰ ਦੇਵਾਂਗਾ ਮਿਲਾ
ਤੂਫਾਨ ਬਣ ਕੇ।
ਨਾਲ ਖੁਸ਼ਬੋਆਂ ਦੇ ਉਹ ਥਾਂ ਭਰ ਗਿਆ, ਜਿੱਥੇ ਗਿਆ ਮੈਂ,
ਨਾ ਗਿਆ ਮੈਂ ਜਿੱਥੇ, ਉਹ ਥਾਂ ਰਹਿ ਗਿਆ ਸ਼ਮਸ਼ਾਨ ਬਣ ਕੇ।
ਸਾਮ੍ਹਣੇ ਮੇਰੇ ਨਹੀਂ ਚਲਣੀ ਉਨ੍ਹਾਂ ਦੀ ਇਕ ਵੀ ਯਾਰੋ,
ਜਿਹੜੇ ਮੈਨੂੰ ਦੱਸਦੇ ਨੇ ਸਭ ਤੋਂ ਬੜੇ ਸ਼ੈਤਾਨ ਬਣ ਕੇ।
ਬਹੁਤ ਚਿਰ ਲੋਕਾਂ ਦੀਆਂ ਨਜ਼ਰਾਂ ਤੋਂ ਬਚ ਸਕਦਾ ਨਹੀਂ ਉਹ,
ਠੱਗ ਕੇ ਜਿਹੜਾ ਉਨ੍ਹਾਂ ਨੂੰ ਬੈਠਾ ਏ ਧਨਵਾਨ ਬਣ ਕੇ।
ਹੱਕ ਆਪਣੇ ਦੀ ਕਰੋ ਵਰਤੋਂ ਸਮਝ ਦੇ ਨਾਲ ਯਾਰੋ,
ਦੇਸ਼ ਖਾਊ,ਚੋਰ ਜੇ ਕਰ ਬਹਿ ਗਿਆ ਪਰਧਾਨ ਬਣ ਕੇ।
ਦੇਸ਼ ਦੇ ਵਿੱਚੋਂ ਉਦੋਂ ਹੀ ਵੰਡ ਕਾਣੀ ਖਤਮ ਹੋਣੀ, ਜਦ ਹਰਿਕ ਕਮਜ਼ੋਰ ਵੀ ਖੜ੍ਹ ਜਾਏਗਾ ਬਲਵਾਨ ਬਣ ਕੇ।
ਆਪਾ ਲੱਭੇਗਾ ਤਾਂ ਹੀ ਤੈਨੂੰ ਮੇਰੇ ਸ਼ਿਅਰਾਂ ਦੇ ਵਿੱਚੋਂ, ਸ਼ਿਅਰ ਜੇ ਕਰ ਤੂੰ ਪੜ੍ਹੇਂਗਾ ਮੇਰੇ, ‘ਮਹਿੰਦਰ ਮਾਨ’ ਬਣ ਕੇ।

ਮਹਿੰਦਰ ਸਿੰਘ ਮਾਨ
ਸਾਮ੍ਹਣੇ ਅੰਗਦ ਸਿੰਘ ਐੱਮ ਐੱਲ ਏ ਹਾਊਸ
ਕੈਨਾਲ ਰੋਡ
ਨਵਾਂ ਸ਼ਹਿਰ-144514
ਫੋਨ 9915803554