ਲਾਪ੍ਰਵਾਹੀ ਨਹੀਂ ਹੋਵੇਗੀ ਬਰਦਾਸ਼ਤ, ਜ਼ਿੰਮੇਵਾਰਾਂ ’ਤੇ ਹੋਵੇਗੀ ਸਖ਼ਤ ਕਾਰਵਾਈ : ਅਰਸ਼ ਸੱਚਰ
ਕੀਤਾ ਗਿਆ ਪੈਚਵਰਕ ਕੁਝ ਦਿਨਾਂ ’ਚ ਹੋ ਸਕਦਾ ਹੈ ਫੇਲ੍ਹ : ਅਰਸ਼ ਸੱਚਰ
ਫਰੀਦਕੋਟ, 1 ਅਕਤੂਬਰ (ਵਰਲਡ ਪੰਜਾਬੀ ਟਾਈਮਜ਼)
ਸਥਾਨਕ ਸਾਦਿਕ ਚੌਕ ਤੋਂ ਬਾਬਾ ਫ਼ਰੀਦ ਯੂਨੀਵਰਸਿਟੀ ਨੂੰ ਜਾਣ ਵਾਲੀ ਮੁੱਖ ਸੜਕ ਮੁੜ–ਮੁੜ ਟੁੱਟਣ ਕਰਕੇ ਲੋਕਾਂ ਲਈ ਗੰਭੀਰ ਖ਼ਤਰਾ ਬਣੀ ਹੋਈ ਹੈ। ਇਹ ਸੜਕ ਹਜ਼ਾਰਾਂ ਮਰੀਜ਼ਾਂ, ਵਿਦਿਆਰਥੀਆਂ ਅਤੇ ਆਮ ਲੋਕਾਂ ਲਈ ਮੁੱਖ ਆਵਾਜਾਈ ਦਾ ਸਾਧਨ ਹੈ ਪਰ ਜਗਾ–ਜਗਾ ਵੱਡੇ ਖੱਡੇ ਅਤੇ ਅਚਾਨਕ ਡਿੱਗਦੇ ਹਿੱਸੇ ਕਾਰਨ ਕਿਸੇ ਵੀ ਵੇਲੇ ਵੱਡਾ ਹਾਦਸਾ ਹੋ ਸਕਦਾ ਹੈ। ਸਮਾਜਸੇਵੀ ਅਤੇ ਆਮ ਆਦਮੀ ਪਾਰਟੀ ਦੇ ਸੀਨੀਅਰ ਲੀਡਰ ਅਰਸ਼ ਸੱਚਰ ਨੇ ਇਸ ਗੰਭੀਰ ਮਾਮਲੇ ਨੂੰ ਮੁੱਖ ਮੰਤਰੀ ਪੰਜਾਬ ਦੇ ਧਿਆਨ ਵਿੱਚ ਲਿਆਂਦਾ ਅਤੇ ਜ਼ਿੰਮੇਵਾਰ ਵਿਭਾਗਾਂ ਦੀ ਲਾਪ੍ਰਵਾਹੀ ਵੱਲ ਇਸ਼ਾਰਾ ਕੀਤਾ। ਉਨ੍ਹਾਂ ਕਿਹਾ ਕਿ ਹੁਣ ਤੱਕ ਸਿਰਫ਼ ਥੋੜ੍ਹਾ–ਬਹੁਤ ਮਿੱਟੀ ਪਾ ਕੇ ਅਸਥਾਈ ਪੈਚਵਰਕ ਕੀਤਾ ਗਿਆ ਹੈ, ਜੋ ਕੁਝ ਦਿਨਾਂ ਵਿੱਚ ਹੀ ਫੇਲ ਹੋ ਜਾਂਦਾ ਹੈ। ਇਹ ‘ਕੌਸਮੇਟਿਕ ਮੁਰੰਮਤ’ ਲੋਕਾਂ ਦੀ ਜਾਨ ਨਾਲ ਖੇਡਣ ਦੇ ਬਰਾਬਰ ਹੈ। ਇਸ ਗੰਭੀਰ ਸਥਿਤੀ ਨੂੰ ਵੇਖਦਿਆਂ ਮੁੱਖ ਮੰਤਰੀ ਦਫ਼ਤਰ ਨੇ ਤੁਰਤ ਕਾਰਵਾਈ ਕਰਦਿਆਂ ਆਈ ਏ ਐਸ ਅਧਿਕਾਰੀ ਰਵੀ ਭਗਤ ਨੂੰ ਉਕਤ ਮਾਮਲੇ ਦੀ ਜਾਂਚ ਸੌਂਪੀ ਹੈ। ਅਰਸ਼ ਸੱਚਰ ਨੇ ਮੰਗ ਕੀਤੀ ਕਿ ਸੜਕ ਬੈਠਣ ਦੇ ਕਾਰਨਾਂ ਦੀ ਵਿਸਥਾਰਪੂਰਵਕ ਟੈਕਨੀਕਲ ਜਾਂਚ ਹੋਵੇ, ਜ਼ਿੰਮੇਵਾਰ ਅਧਿਕਾਰੀਆਂ ਅਤੇ ਠੇਕੇਦਾਰਾਂ ਵਿਰੁੱਧ ਸਖ਼ਤ ਕਾਰਵਾਈ ਕਰਨ, ਤੁਰਤ ਸਥਾਈ ਮੁਰੰਮਤ/ਪੁਨਰਨਿਰਮਾਣ ਕੀਤਾ ਜਾਵੇ ਤਾਂ ਜੋ ਅਗਾਮੀ ਸਮੇਂ ਵਿੱਚ ਇਹ ਹਾਲਤ ਨਾ ਦੁਹਰਾਈ ਜਾਵੇ, ਮੁਰੰਮਤ ਪੂਰੀ ਹੋਣ ਤੱਕ ਹਾਦਸਿਆਂ ਤੋਂ ਬਚਾਅ ਲਈ ਰਾਤ ਸਮੇਂ ਬੈਰੀਅਰ, ਲਾਈਟਾਂ ਅਤੇ ਚੇਤਾਵਨੀ ਬੋਰਡ ਲਾਏ ਜਾਣ।
