ਪੰਜਾਬ ਦੇਸ਼ ਦਾ ਸਭ ਤੋਂ ਵੱਧ ਕਰਜ਼ਾਈ ਸੂਬਾ 

ਹਰੇਕ ਪੰਜਾਬ ਵਾਸੀ ਔਸਤ ਸਵਾ ਲੱਖ ਰੁਪਏ ਦਾ ਕਰਜ਼ਾਈ 

ਕੇਜ਼ਰੀਵਾਲ ਦੀਆਂ ਪਾਲਿਸਿਆਂ ਕੇਵਲ ਹਵਾਈ ਮਹਿਲ ਸਾਬਿਤ ਹੋਈਆਂ 

         ਬਠਿੰਡਾ,28 ਨਵੰਬਰ (ਗੁਰਪ੍ਰੀਤ ਚਹਿਲ/ਵਰਲਡ ਪੰਜਾਬੀ ਟਾਈਮਜ਼)

ਕਿਸੇ ਸਮੇਂ ਪੂਰੇ ਪੰਜਾਬ ਦਾ ਅੰਨਦਾਤਾ ਅਤੇ ਸੋਨੇ ਦੀ ਚਿੜੀ ਅਖਵਾਉਣ ਵਾਲਾ ਪੰਜਾਬ ਅੱਜ ਦੇਸ ਦੇ ਸਭਤੋਂ ਵੱਧ ਕਰਜ਼ਾਈ ਸੂਬੇ ਦੇ ਤੌਰ ਤੇ ਜਾਣਿਆ ਜਾਂਦਾ ਹੈ। ਦੱਸ ਦੇਈਏ ਕਿ ਅੱਜ ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ ਅੱਜ ਹਰੇਕ ਪੰਜਾਬ ਵਾਸੀ ਔਸਤ 1,23,274 ਰੁਪਏ ਦਾ ਕਰਜ਼ਾਈ ਹੈ। ਇਸਨੂੰ ਪੰਜਾਬ ਅਤੇ ਪੰਜਾਬ ਵਾਸੀਆਂ ਦੀ ਮਾੜੀ ਕਿਸਮਤ ਹੀ ਕਿਹਾ ਜਾ ਸਕਦਾ ਹੈ ਕਿ ਪਿਛਲੇ  ਕਰੀਬ 70 ਸਾਲਾਂ ਤੋਂ ਲੋਕਾਂ ਦੇ ਚੁਣੇ ਹੋਏ ਨੁਮਾਇੰਦੇ ਹੀ ਸੂਬੇ ਦੇ ਲੋਕਾਂ ਨਾਲ ਵਿਸ਼ਵਾਸਘਾਤ ਕਰਕੇ ਜਿੱਥੇ ਆਪਣੇ ਘਰਾਂ ਦੇ ਨਾਲ ਨਾਲ ਆਪਣੇ ਵਿਦੇਸ਼ੀ ਬੈਂਕ ਖਾਤੇ ਭਰਦੇ ਆ ਰਹੇ ਹਨ ਉੱਥੇ ਹੀ ਆਏ ਦਿਨ ਪੰਜਾਬ ਨੂੰ ਗਰੀਬੀ ਅਤੇ ਕਰਜ਼ੇ ਥੱਲੇ ਦਬਦੇ ਆਏ ਹਨ। ਪਿਛਲੀਆਂ ਸਰਕਾਰਾਂ ਜਾਂ ਇਹ ਕਹਿ ਲਈਏ ਕਿ ਰਵਾਇਤੀ ਪਾਰਟੀਆਂ ਤੋਂ ਅੱਕੇ ਲੋਕਾਂ ਨੇ ਇਸ ਵਾਰ 2022 ਵਿਧਾਨ ਸਭਾ ਚੋਣਾਂ ਵਿੱਚ ਜਿਹੜੀ ਆਮ ਲੋਕਾਂ ਦੀ ਅਖਵਾਉਣ ਵਾਲੀ ਆਮ ਆਦਮੀ ਪਾਰਟੀ ਨੂੰ ਬੜੀਆਂ ਉਮੀਦਾਂ ਨਾਲ ਭਾਰੀ ਬਹੁਮਤ ਦੇ ਨਾਲ ਪੰਜਾਬ ਦੀ ਸੱਤਾ ਸੌਂਪੀ ਸੀ ਪਰ ਉਸ ਪਾਰਟੀ ਨੇ ਲੋਕਾਂ ਨਾਲ ਸਭਤੋਂ ਵੱਧ ਵਿਸ਼ਵਾਸਘਾਤ ਕਰਦਿਆਂ ਪਿਛਲੀਆਂ ਸਰਕਾਰਾਂ ਦੇ ਕਰੀਬ ਪੰਜਾਹ ਸਾਲ ਦੇ ਕਾਰਜਕਾਲ ਦੇ ਬਰਾਬਰ ਦਾ ਕਰਜ਼ਾ ਮਾਤਰ 4 ਸਾਲਾਂ ਚ ਚਾੜ੍ਹ ਅੱਜ ਪੰਜਾਬ ਨੂੰ ਪ੍ਰਤੀ ਵਿਆਕਤੀ ਵੱਧ ਕਰਜ਼ਾਈ ਸੂਬਿਆਂ ਦੀ ਕਤਾਰ ਚੋਂ ਪਹਿਲੇ ਸਥਾਨ ਤੇ ਲਿਆ ਖੜ੍ਹਾ ਕੀਤਾ ਹੈ।

 ਪੀ ਆਰ ਐੱਸ ਲਾਜਿਸਲੇਟਿਵ ਰਿਸਰਚ ਇੰਸਟਚਿਊਟ ਦੇ ਤਾਜਾ ਅੰਕੜੇ ਦੱਸਦੇ ਹਨ ਕਿ ਅੱਜ ਪੰਜਾਬ ਦੇ ਹਰੇਕ ਨਾਗਰਿਕ ਦੇ ਸਿਰ ਔਸਤ ਸਵਾ ਲੱਖ ਦੇ ਕਰੀਬ ਕਰਜ਼ਾ ਹੈ ਅਤੇ ਕਰਜੇ ਦੀ ਪੰਡ ਅਏ ਦਿਨ ਹੋਰ ਭਾਰੀ ਹੁੰਦੀ ਜਾ ਰਹੀ ਹੈ। ਇਸ ਦੇ ਮੁਕਾਬਲੇ ਜੇਕਰ ਦੂਜੇ ਸੂਬਿਆਂ ਦੀ ਗੱਲ ਕੀਤੀ ਜਾਵੇ ਤਾਂ ਦੂਜੇ ਸਥਾਨ ਤੇ ਕੇਰਲ 1,20,444 ਰੁਪਏ ਪ੍ਰਤੀ ਨਾਗਰਿਕ ਕਰਜ਼ਾ, ਤੀਜੇ ਸਥਾਨ ਤੇ ਮਹਾਰਾਸ਼ਟਰ 65,568 ਰੁਪਏ ਪ੍ਰਤੀ ਨਾਗਰਿਕ, ਚੌਂਥੇ ਨੰਬਰ ਤੇ ਗੁਜਰਾਤ 54,655 ਰੁਪਏ ਪ੍ਰਤੀ ਨਾਗਰਿਕ ਅਤੇ 21,220 ਰੁਪਏ ਪ੍ਰਤੀ ਨਾਗਰਿਕ ਕਰਜ਼ੇ ਦੀ ਦਰ ਨਾਲ ਬਿਹਾਰ ਦੇਸ ਦੇ ਪੰਜਵੇ ਨੰਬਰ ਦਾ ਕਰਜ਼ਾਈ ਹੈ।

 ਦੱਸ ਦਈਏ ਕਿ ਸੂਬੇ ਦਾ ਪ੍ਰਤੀ ਵਿਅਕਤੀ ਕਰਜਾ ਉਹ ਔਸਤ ਕਰਜਾ ਹੈ ਜੋ ਕਿਸੇ ਸੂਬੇ ਦੇ ਹਰ ਨਾਗਰਿਕ ਸਿਰ ਉਸ ਦ ਕੁੱਲ ਸਰਕਾਰੀ ਕਰਜੇ ਦੇ ਅਧਾਰ ਤੇ ਬਕਾਇਆ ਹੁੰਦਾ ਹੈ। ਇਸ ਦੀ ਗਣਨਾ ਸੂਬੇ ਦੇ ਕੁੱਲ ਕਰਜੇ ਨੂੰ ਉਸਦੀ ਕੁਲ ਆਬਾਦੀ ਨਾਲ ਵੰਡ ਕੇ ਕੀਤੀ ਜਾਂਦੀ ਹੈ। ਇਹ ਸੂਬੇ ਦੀ ਵਿੱਤੀ ਸਥਿਤੀ ਅਤੇ ਕਰਜੇ ਦੇ ਬੋਝ ਦਾ ਇੱਕ ਮਹੱਤਵਪੂਰਨ ਸੂਚਕ ਹੈ।

     ਹੁਣ ਜੇ ਕਰ ਪੰਜਾਬ ਦੀ ਵਿਧਾਨ ਸਭਾ 2022 ਦੀਆਂ ਵੋਟਾਂ ਤੋਂ ਪਹਿਲਾਂ ਦੀ ਗੱਲ ਕੀਤੀ ਜਾਵੇ ਤਾਂ ਪੰਜਾਬ ਦੀ ਸੱਤਾ ਤੇ ਕਾਬਜ਼ ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਦੀਆਂ ਲੋਕਾਂ ਨੂੰ ਵਿਖਾਈਆਂ ਗਈਆਂ ਪਾਲਸੀਆਂ ਜਿੰਨਾ ਚ ਕਿਹਾ ਗਿਆ ਸੀ ਕਿ ਆਉਂਦੇ ਪੰਜ ਸਾਲਾਂ ਚ ਪੰਜਾਬ ਦੇ ਕਰਜ਼ੇ ਦੀ ਪਾਈ ਪਾਈ ਉਤਾਰ ਦਿੱਤੀ ਜਾਵੇਗੀ ਅਤੇ ਅਗਲੀਆਂ ਵੋਟਾਂ ਵੇਲੇ ਪਾਰਟੀ ਆਪਣੇ ਕੰਮਾਂ ਦੇ ਅਧਾਰ ਤੇ ਵੋਟਾਂ ਮੰਗਣ ਲੋਕਾਂ ਦੇ ਦੁਆਰ ਜਾਵੇਗੀ ਕੇਵਲ ਹਵਾਈ ਮਹਿਲ ਹੀ ਸਾਬਿਤ ਹੋਏ ਹਨ।