ਭਗਤ ਪੂਰਨ ਸਿੰਘ ਦੀ ਯਾਦ ’ਚ ਰਾਜੇਵਾਲ ਵਿਖੇ ਵਿਰਾਸਤੀ ਸਮਾਗਮ ਦੌਰਾਨ ਪੰਜ ਪ੍ਰਮੁੱਖ ਸਖਸ਼ੀਅਤਾਂ ਨੂੰ ਕੀਤਾ ਗਿਆ ਸਨਮਾਨਿਤ

ਪੰਮੀ ਬਾਈ, ਸੁੱਖੀ ਬਰਾੜ, ਨਵਜੋਤ ਜਰਗ ਸਮੇਤ ਹੋਰਾਂ ਨੇ ਖੂਬ ਰੰਗ ਬੰਨ੍ਹਿਆ

ਪਾਇਲ/ਮਲੌਦ, 12 ਫਰਵਰੀ ( ਹਰਪ੍ਰੀਤ ਸਿੰਘ ਸਿਹੌੜਾ/ਵਰਲਡ ਪੰਜਾਬੀ ਟਾਈਮਜ਼)

ਪੰਜਾਬੀ ਸੱਥ ਜਰਗ ਦੇ ਮੁੱਖੀ ਨਵਜੋਤ ਸਿੰਘ ਜਰਗ ਵੱਲੋਂ ਪਿੰਡ ਰਾਜੇਵਾਲ ਦੇ ਪਤਵੰਤਿਆਂ ਦੇ ਵੱਡਮੁੱਲੇ ਸਹਿਯੋਗ ਨਾਲ ਮਨੁੱਖਤਾ ਦੀ ਸੇਵਾ ਤੇ ਸ਼ਾਂਤੀ ਦੇ ਪੁੰਜ ਪਿੰਗਲਵਾੜਾ ਅੰਮ੍ਰਿਤਸਰ ਦੇ ਬਾਨੀ ਭਗਤ ਪੂਰਨ ਸਿੰਘ ਦੀ ਯਾਦ ਨੂੰ ਸਮਰਪਿਤ ਉਹਨਾਂ ਦੇ ਜੱਦੀ ਪਿੰਡ ਰਾਜੇਵਾਲ ਵਿਖੇ ਵਿਰਾਸਤੀ ਸਮਾਗਮ ਬੜੀ ਹੀ ਸ਼ਾਨੋ ਸ਼ੌਕਤ ਨਾਲ ਕਰਵਾਇਆ ਗਿਆ।ਵਿਰਾਸਤੀ ਸਮਾਗਮ ਦੀ ਸ਼ੁਰੂਆਤ ਭਗਤ ਪੂਰਨ ਸਿੰਘ ਜੀ ਦੀ ਸਮਾਰਕ ਤੇ ਸਿਜਦਾ ਕਰਕੇ ਕੀਤੀ। ਇਸ ਸਮਾਗਮ ਨੂੰ ਪਿੱਪਲਾਂ, ਬੋਹੜਾਂ ਦੇ ਥੱਲੇ ਪੁਰਾਤਨ ਵਿਰਸੇ ਰਾਹੀ ਨੌਜਵਾਨ ਜਸਕੰਵਰ ਮੰਡੇਰ, ਨਵਕੰਵਰ ਜਰਗ ਅਤੇ ਮਨਿੰਦਰ ਨੇ ਹੁਸਨ, ਜਵਾਨੀ, ਮਾਪੇ ਮਿਲਦੇ ਨਾ ਦੁਕਾਨਾਂ ਤੋਂ ਗਾ ਕੇ ਵਾਹ ਵਾਹ ਖੱਟੀ ਅਤੇ ” ਕਲਹਿਰੀਆਂ ਮੋਰਾਂ ਵੇ ਮੈ ਨਾ ਤੇਰੇ ਰਹਿੰਦੀ ” ਗਾ ਕੇ ਔਰਤਾਂ ਨੂੰ ਗਿੱਧਾ ਪਾਉਣ ਲਈ ਮਜ਼ਬੂਰ ਕਰ ਦਿੱਤਾ। ਇਸ ਮੌਕੇ ‘ਤੇ ਕੌਮੀ ਪਹਿਲਵਾਨ ਅਮਰੀਕ ਸਿੰਘ ਰੌਣੀ ਨੂੰ ਸ਼ਹੀਦ ਲੈਫਟੀਨੈਂਟ ਜਤਿੰਦਰਜੀਤ ਸਿੰਘ ਮੰਡੇਰ ਪੁਰਸਕਾਰ, ਲੋਕ ਢਾਡੀ ਗੁਰਦਿਆਲ ਸਿੰਘ ਲੱਡਾ ਨੂੰ ਪ੍ਰਿੰਸੀਪਲ ਹਰਦੇਵ ਸਿੰਘ ਜਰਗ ਯਾਦਗਾਰੀ ਪੁਰਸਕਾਰ, ਲੋਕ ਗਾਇਕ ਫ਼ਜਲ ਮੁਹੰਮਦ ਨੂੰ ਬੇਬੇ ਨੰਦ ਕੌਰ ਪੁਰਸਕਾਰ, ਸਾਹਿਤਕਾਰ ਬਲਜਿੰਦਰ ਨਸਰਾਲੀ ਨੂੰ ਡਾ. ਗੁਰਦੇਵ ਸਿੰਘ ਭੰਦੋਹਲ ਪੁਰਸਕਾਰ ਅਤੇ ਵਿਰਾਸਤੀ ਵਸਤਾਂ ਦੇ ਸੰਗ੍ਰਿਹਕਾਰ ਪਰਮਿੰਦਰ ਸਿੰਘ ਨੂੰ ਧਲਵਿੰਦਰਜੀਤ ਸਿੰਘ ਸਿਹੌੜਾ ਪੁਰਸਕਾਰ ਦੇ ਕੇ ਸਨਮਾਨਿਤ ਗਿਆ। ਇਸ ਸਮਾਗਮ ਦੇ ਮੁੱਖ ਮਹਿਮਾਨ ਪਿੰਗਲਵਾੜਾ ਅੰਮ੍ਰਿਤਸਰ ਦੇ ਉਤਰਾਧਿਕਾਰੀ ਬੀਬੀ ਇੰਦਰਜੀਤ ਕੌਰ ਸਨ। ਇਸ ਮੌਕੇ ‘ਤੇ ਉੱਘੇ ਲੋਕ ਗਾਇਕ ਤੇ ਬੋਲੀਆਂ ਦੇ ਬਾਦਸ਼ਾਹ ਪੰਮੀ ਬਾਈ, ਸਤਿੰਦਰਪਾਲ ਸਿੰਘ ਸਿੱਧਵਾਂ, ਅੰਤਰਰਾਸ਼ਟਰੀ ਲੋਕ ਗਾਇਕਾ ਸੁੱਖੀ ਬਰਾੜ ਨੇ ਪੁਰਾਤਨ ਸਭਿਆਚਾਰ ਤੇ ਅਲੋਪ ਹੋ ਰਹੇ ਵਿਰਸੇ ਦੀਆਂ ਲੋਕ ਬੋਲੀਆਂ ਤੇ ” ਮਿਰਜਾ ” ਸੁਣਾ ਕੇ ਸਮਾਰੋਹ ਨੂੰ ਚਾਰ ਚੰਨ ਲਾਏ। ਇਸ ਸਮੇਂ ਪੰਜਾਬੀ ਸੱਥ ਯੂਐੱਸਏ ਦੇ ਮੁੱਖੀ ਡਾ .ਸ਼ਿਵਰਾਜ ਸਿੰਘ ਨੇ ਪੰਜਾਬੀ ਦੇ ਅਮੀਰ ਵਿਰਸੇ ਪੰਜਾਬੀ ਸੱਭਿਆਚਾਰ ਦੀ ਤਰਾਸਦੀ ‘ਤੇ ਬੋਲਦਿਆਂ ਕਿਹਾ ਕਿ ਅਜੋਕੇ ਸਮੇ ਵਿੱਚ ਸਾਡਾ ਸੱਭਿਆਚਾਰ ਪੱਛਮੀ ਸੱਭਿਆਚਾਰ ਦੇ ਬੁਰੇ ਪ੍ਰਭਾਵ ਹੇਠ ਲਤਾੜਿਆ ਜਾ ਰਿਹਾ ਹੈ। ਉਹਨਾਂ ਅੱਗੇ ਕਿਹਾ ਕਿ ਅਸਲੀ ਸਿੱਖ ਉਹੀ ਹੈ ਜੋ ਗੁਰੂਆਂ ਦੀਆਂ ਸਿੱਖਿਆਵਾਂ ਦਾ ਪਾਲਣ ਕਰਦਾ ਹੈ। ਇਸ ਮੌਕੇ ‘ਤੇ ਪ੍ਰਿੰਸੀਪਲ ਪਰਮਜੀਤ ਕੌਰ ਮੰਡੇਰ ਦੀ ਪੁਸਤਕ ” ਵੇ ਵਣਜਾਰਿਆ ” ਅਤੇ ਤਰਸੇਮ ਚੰਦ ਕਲਹਿਰੀ ਦੀ ਪੁਸਤਕ ” ਲੋਕ ਖੇਡਾਂ ” ਰਿਲੀਜ਼ ਕੀਤੀ ਗਈ।
ਸਮਾਗਮ ਦੌਰਾਨ ਪੰਜਾਬੀ ਮਾਂ ਬੋਲੀ ਦਾ ਪ੍ਰਚਾਰ ਤੇ ਪ੍ਰਸਾਰ ਕਰਨ ਵਾਲੇ ਪ੍ਰੋਫੈਸਰ ਪੰਡਿਤ ਰਾਓ ਧਰੇਨਵਰ ਤੇ ਮਨੁੱਖਤਾ ਦੀ ਨਿਰਸੁਆਰਥ ਸੇਵਾ ਕਰਨ ਵਾਲੇ ਉੱਘੇ ਸਮਾਜ ਸੇਵਕ ਗੁਰਪ੍ਰੀਤ ਸਿੰਘ ਮਿੰਟੂ ਨੂੰ ਵਿਸ਼ੇਸ਼ ਤੌਰ ‘ਤੇ ਸਨਮਾਨਿਤ ਕੀਤਾ ਗਿਆ। ਇਸ ਮੌਕੇ ‘ਤੇ ਪ੍ਰਿੰਸੀਪਲ ਜਸਵੀਰ ਕੌਰ ਮੰਡੇਰ ਜਰਗ, ਪ੍ਰਗਟ ਸਿੰਘ ਪਾਲਾ ਰਾਜੇਵਾਲੀਆਂ, ਹਰਵਿੰਦਰ ਸਿੰਘ ਚਹਿਲ ਕੈਨੇਡਾ, ਨਰਿੰਦਰ ਸਿੰਘ ਮੰਡੇਰ ਜਰਗ, ਪਹਿਲਵਾਨ ਲਾਡੀ ਗਿੱਲ ਪਹਿਲਵਾਨ ਜੱਬੋਮਾਜਰਾ ,ਭੋਲਾ ਕਲਹਿਰੀ, ਹਰਿੰਦਰ ਸਿੰਘ ਕਾਕਾ ਪ੍ਰਧਾਨ ਸਪੋਰਟਸ ਕਲੱਬ ਰਾਜੇਵਾਲ,ਮੱਖਣ ਸਿੰਘ ਖਾਲਸਾ,ਇਕਬਾਲ ਸਿੰਘ ਬਾਲੀ, ਗੁਰਿੰਦਰ ਸਿੰਘ ਗਿੰਦਾ,ਸਵਰਨ ਸਿੰਘ ਪ੍ਰਧਾਨ, ਕਰਨੈਲ ਸਿੰਘ ਰਾਜੇਵਾਲ, ਬਲਜਿੰਦਰ ਸਿੰਘ ਪਿੱਲਾ ,ਸਿਕੰਦਰ ਸਿੰਘ, ਕਹਾਣੀਕਾਰ ਜਤਿੰਦਰ ਹਾਂਸ, ਗੁਰਦੀਪ ਸਿੰਘ ਮੰਡਾਹਰ, ਲੈਕਚਰਾਰ ਪ੍ਰਕਾਸ਼ ਸਿੰਘ ਜਰਗ, ਨਗਿੰਦਰ ਸਿੰਘ ਪਾਇਲ,ਬਲਵੀਰ ਸਿੰਘ ਕੈਨੇਡਾ , ਸਿਟੀ ਪ੍ਰੈੱਸ ਕਲੱਬ ਪਾਇਲ ਦੇ ਪ੍ਰਧਾਨ ਦੇਵਿੰਦਰ ਸਿੰਘ ਜੱਗੀ, ਜੱਗਾ ਮਕਸੂਦੜਾ,ਸਾਹਿਤਕਾਰ ਹਰਪ੍ਰੀਤ ਸਿਹੌੜਾ,ਗੀਤਕਾਰ ਬਿੱਲਾ ਲਸੋਈ, ਬਹੁਪੱਖੀ ਕਲਾਕਾਰ ਜੋਗਿੰਦਰ ਸਿੰਘ ਆਜ਼ਾਦ ਜਰਗ, ਸ਼ਾਹ ਨਿਵਾਜ ਖਾਂ ਬਿੱਲੀ ਸਮੇਤ ਵੱਡੀ ਗਿਣਤੀ ਵਿੱਚ ਪਤਵੰਤੇ ਹਾਜ਼ਰ ਸਨ।