ਪੰਜਾਬ ਭਰ ’ਚੋਂ ਪਹਿਲੀ ਲੜਕੀ, ਜਿਸ ਨੇ ਲੇ-ਲੱਦਾਖ ’ਚ ਫੌਜ਼ ਵਿੱਚ ਭਰਤੀ ਹੋ ਕੇ ਚਮਕਾਇਆ ਮਾਪਿਆਂ ਦਾ ਨਾਮ

*ਨਰਮਾ ਚੁਗ ਕੇ, ਝੋਨਾ ਲਾ ਕੇ ਅਤੇ ਦਿਹਾੜੀਆਂ ਕਰਕੇ ਫੌਜ ਵਿੱਚ ਭਰਤੀ ਹੋਈ ਨਵਦੀਪ ਕੌਰ*

*ਘਰ ਪੁੱਜਣ ’ਤੇ ਮਾਤਾ-ਪਿਤਾ ਅਤੇ ਪਿੰਡ ਵਾਸੀਆਂ ਨੇ ਸਲਿਊਟ ਮਾਰ ਕੇ ਦਿੱਤੀ ਵਧਾਈ*

ਕੋਟਕਪੂਰਾ/ਬਰਗਾੜੀ, 8 ਦਸੰਬਰ (ਟਿੰਕੂ ਕੁਮਾਰ/ਵਰਲਡ ਪੰਜਾਬੀ ਟਾਈਮਜ਼)

ਬਰਗਾੜੀ ਕਸਬੇ ਦੇ ਵਸਨੀਕ ਇਕ ਮਜਦੂਰੀ ਕਰਨ ਵਾਲੇ ਬਲਜੀਤ ਸਿੰਘ ਅਤੇ ਮਨਦੀਪ ਕੌਰ ਦੀਆਂ ਤਿੰਨ ਧੀਆਂ ’ਚੋਂ ਇਕ ਧੀ ਨਵਦੀਪ ਕੌਰ ਨੇ ਪੰਜਾਬ ਦੀ ਪਹਿਲੀ ਲੜਕੀ ਵਜੋਂ ਲੇ-ਲੱਦਾਖ ਵਿੱਚ ਇੰਡੀਅਨ ਆਰਮੀ ਦੇ (ਆਡਰਨਸ ਕਰੂਪ) ਡਿਪਾਰਟਮੈਂਟ ਵਿੱਚ ਭਰਤੀ ਹੋ ਕੇ ਆਪਣੇ ਮਾਪਿਆਂ, ਇਲਾਕੇ ਅਤੇ ਪੰਜਾਬ ਦਾ ਨਾਮ ਰੁਸ਼ਨਾਇਆ ਹੈ। ਬੇਟੀ ਨਵਦੀਪ ਕੌਰ ਦੇ ਪਹਿਲੀ ਵਾਰ ਘਰ ਆਉਣ ’ਤੇ ਹਾਰ ਪਾ ਕੇ ਮੂੰਹ ਮਿੱਠਾ ਕਰਵਾਇਆ, ਪਿੰਡ ਵਾਸੀਆਂ ਅਤੇ ਪਰਿਵਾਰ ਵਲੋਂ ਸ਼ਾਨਦਾਰ ਸੁਆਗਤ ਕੀਤਾ ਗਿਆ। ਮਜਦੂਰ ਪਰਿਵਾਰ ਦੀ ਧੀ ਨਵਦੀਪ ਕੌਰ ਨੇ ਦੱਸਿਆ ਕਿ ਉਸ ਨੇ ਪੰਜਾਬ ਦੀ ਪਹਿਲੀ ਲੜਕੀ ਵਜੋਂ ਲੇ-ਲੱਦਾਖ ਵਿੱਚ ਬਤੌਰ ਫੌਜ ਵਿੱਚ ਭਰਤੀ ਹੋਣ ਦਾ ਜੋ ਸੁਭਾਗ ਪ੍ਰਾਪਤ ਹੋਇਆ ਹੈ, ਉਸ ਪਿੱਛੇ ਉਸ ਦੇ ਮਾਤਾ-ਪਿਤਾ ਦਾ ਹੱਥ ਹੈ। ਜਿੰਨਾ ਨੇ ਆਰਥਿਕ ਤੰਗੀਆਂ ਦੇ ਬਾਵਜੂਦ ਮਿਹਨਤ ਮਜਦੂਰੀ ਕਰਕੇ ਉਸਨੂੰ ਪੜਾਇਆ-ਲਿਖਾਇਆ ਤੇ ਉਹਨਾਂ ਦੀ ਮਿਹਨਤ ਦਾ ਫਲ ਮਿਲਿਆ। ਉਹਨਾ ਦੱਸਿਆ ਕਿ ਉਹ ਖੁਦ ਝੋਨਾ ਲਾਉਂਦੀ ਰਹੀ ਹੈ, ਸੰਤਰੇ ਤੋੜਦੀ ਰਹੀ, ਨਰਮਾ ਚੁਗਦੀ ਰਹੀ ਅਤੇ ਹਰ ਕੰਮ ਵਿੱਚ ਦਿਹਾੜੀ ਮਜਦੂਰੀ ਕਰਦੀ ਰਹੀ ਹੈ, ਉਸਦੀ ਸੋਚ ਸੀ ਉਹ ਪੰਜਾਬ ਪੁਲਿਸ ਵਿੱਚ ਨੌਕਰੀ ਕਰੇ ਪਰ ਪ੍ਰਮਾਤਮਾ ਨੇ ਉਸਨੂੰ ਫੌਜ ਵਿੱਚ ਸੇਵਾ ਕਰਨ ਦਾ ਮੌਕਾ ਬਖਸ਼ਿਆ ਹੈ, ਜਿਸ ਲਈ ਉਹ ਦਿਲੋਂ ਧੰਨਵਾਦ ਕਰਦੀ ਹੈ ਤੇ ਹੋਰਨਾ ਲੜਕੇ/ਲੜਕੀਆਂ ਨੂੰ ਆਪਣੇ ਮਾਤਾ-ਪਿਤਾ ਦੀ ਮਿਹਨਤ ਦਾ ਮੁੱਲ ਇਸੇ ਤਰਾਂ ਚੁਕਾਉਣ ਦੀ ਗੱਲ ਆਖੀ। ਨਵਦੀਪ ਕੌਰ ਦੇ ਦਾਦਾ ਬਾਬੂ ਸਿੰਘ, ਪਿਤਾ ਬਲਜੀਤ ਸਿੰਘ, ਮਾਤਾ ਮਨਦੀਪ ਕੌਰ ਅਤੇ ਭਰਜਾਈ ਕੰਵਲਦੀਪ ਕੌਰ ਨੇ ਦੱਸਿਆ ਕਿ ਇਹ ਸਾਡੀ ਲੜਕੀ ਨਹੀਂ ਸਾਡਾ ਪੁੱਤਰ ਹੈ, ਅਸੀਂ ਪਹਿਲਾਂ ਤੋਂ ਤਿੰਨਾਂ ਲੜਕੀਆਂ ਨੂੰ ਦਿਹਾੜੀਆਂ ਕਰਕੇ ਪੜਾਇਆ ਹੈ, ਉਹਨਾ ਨੇ ਵੀ ਪੜ ਕੇ ਸਾਡਾ ਨਾਮ ਬਣਾਉਣ ਦੀ ਸੋਚ ਰੱਖੀ ਸੀ, ਉਹ ਅੱਜ ਪੂਰੀ ਹੋਈ ਹੈ, ਅਸੀਂ ਬਹੁਤ ਖੁਸ਼ ਹਾਂ ਕਿ ਸਾਡੀ ਲੜਕੀ ਖੁਦ ਦਿਹਾੜੀ ਮਜਦੂਰੀ ਕਰਦੀ ਰਹੀ ਹੈ।